Mika 2 - Udél Dwata: Gna Kesfasad ne Lomi Kesfasad

Kkukum Dwata yó kem tau hemgnok yó kem tau élél

¹ Hatay ye kuy, kem tau olo le beyen hlilil kifu là dog tungô matul mò yó kem sidek. Hlafusen bè yó, tódô kendel nmò ye yóm sidek deng eles natul ye yó, abay se gbek ye mò du.

² Yó kem tau matul mò sidek yó, ke nóyô le ma tonok sotu tau, tódô nled le. Ke nóyô le gónô kem dumu le, tódô nwa le. Laen kô dù tau menek kkimuhen bélê le.

³ Yó gónóm mon, ni se udél Dwata, monen, “Deng natulu ne yóm kehwitu ebélê ye hlayam mò balà yóm gel kehlayam ye yó kem dumu ye tau ne là kô ye gewà du. Ke deng gnóm ye yóm hlayam hwitu ebélê ye yó, là kô ye bud mógów heklabak gu bè lan.”

⁴ Bè yóm kdaw yó, angat senkuli le yu yó kem hohon ye ne utóm le lingón yóm deng gfà ye, mon le, “Deng me gotu sulék meglà. Deng gotu nwa Dwata tonok me. Yó kem dnadu me, deng gotu blayen ebè yó kem tau megef kum.”

⁵ Yó gónóm mon, ke sok kól yóm kdaw bud khulék le du ebè yó kem kun tau Dwata yóm kul tonok, laen kô kuy ólól du.

⁶ Yó mon le mò do yó kem tau, “Béi tmugod bélê me. Béem tulón kum yó kem sidek yó. Là kô heglumfak Dwata du kum yóm monem yó.”

⁷ Ó kem tau Israél, yó kô udél ye? Gbek Dwata hembala du kô yóm nmò ye yó? Ke yó dum tedeng yóm tendo gel nmò ye, kaem hyu bélê ye yóm udélu ni.

⁸ Ni se balaen kuy Dwata, monen, “Efet nim kmoen ni, hol lómón ke hohon ye o lemwót bè yóm gel nmò ye bè yó kem dou tau. Botong hnékét ye yó kem tau mius bè lan, gnaga nwa ye nes le yó kem tau deng smalig kuy. Yóm nmò ye yó, lómón nmò yóm sendalù gemmò bè gida.

⁹ Yó kem libun bè yó kem dou tau, gotu lo ye lu gu lem yóm kul gónô kenbong nawa ne gotu nwa ye bè yó kem ngà le yóm tonok tehe blayu kul kól bè laen dù tul sónen.

¹⁰ Yó ne, mdó ye yu kem tau gel hemgnok yó kem tau élél. Sundu kuy tonok du yóm ni ne là kô kuy gónô du, abay se deng golu bè yóm deng nmò ye tahen, yó gónón gbà.

¹¹ Yó dô nóyô le ni kem tau ni yóm tugod Dwata tendo tmulón kéng ne tendo smukat, yóm gel mon du, ‘Eles tulónu kuy, angat tey wen tifas ye se kuy, ne tódô wen se yó kem dumu gel ninum ye.’ ”

Yóm kehgulék Dwata klowil yó kem dù tau Israél deng negef

¹² Yó bud udél Dwata ebélê le, monen mò kul, “Okóm yu kem dù tebel bè yó kem tau Israél, hulin kdaw gotu bud sentifunu yu. Gotu bud nwitu yu semfulék lómón yó kem ubiha bud mulék ebè yóm hol kul gónó nô ne lómón yó kem ógóf bud mótób bè yóm hol kul gónó mótób. Yóm benwu ye, angat tey bud genged tauhen.”

¹³ Angat hennas Dwata yóm lanen mit kul hewà gu bè yó kem benwu gónó le tehe e megef kul. Angat nwiten lu hewà gu bè yóm bak tikeb yóm syudad yó anì mulék le ebè yóm hol kul benwu. Yóm geta bélê le, duhen yóm sana Dwata hol gónó mogot, du se yóm tukô gna kul.