Mika 1 - Udél Dwata: Gna Kesfasad ne Lomi Kesfasad

¹ Bè yóm tehe kesetles le kmamal bè Juda le Jutam ne Ahas ne Hisikaya, wen udél Dwata ebè Mika, yóm tau lemwót bè yóm benwu udì boluyen Murisit. Hton Dwata du yóm angat gefet bè yóm lewu kem syudad Samarya ne Jirusalim.

Klangag Mika yóm syudad Samarya ne Jirusalim

² Ó kem kdéen tau, ni mò hol hnungol ye. Yóm kdéen tau mowil talak tonok, hol hnungol ye yóm udélen ebélê ye yóm Dwata hol dandónen geta. Mudél ebélê ye gu lem tum Gónóen bè longit.

³ Ngem, kól Dwata. Tebelen yóm gónón myón kmamal bè longit, mógów edini talak tonok mlan gu ta yó kem bulul.

⁴ Yó kem bulul gónón mlan yó, gotu le mnò laan tihen hol lómón ke tolu mnò lem ofi ne tódô molo ebè datal lómón ke él molo gu lem bulul.

⁵ Yó gónón angat sut, lemwót bè kegsalà yó kem tau bè Israél ne yó kem tau bè Juda, hono kem tau là mimón ke Dwata. Tau du se dnuónen bè yóm là kimón le ke Dwata yó kem tau bè benwu Israél? Kaem yó se kem tau bè Samarya yóm dnuónen yóm yê yó kem syudad le. Gónón mbut se kehtahu le bè yó kem dwata kéng yó kem tau bè benwu Juda? Kaem mbut bè yó kem tau bè Jirusalim yóm yê yó kem syudad le.

⁶ “Yó gónóm mon,” ni se udél Dwata, “yóm syudad Samarya, angat sulék genbau ne nmou mò gónó hmulu grép. Angat gotu dngélu etu bè datal yó kem beng botu deng gbà bè yóm syudad yó anì tódô hnas yóm tehe gónón mteg yóm mò hbegel yó kem bengen.

⁷ Kdê yó kem dwata lennged nmò le bè yó, angat gotu lenusok yó kem hohon le. Kdê yó kem alì mebtes tehe gel blay le ebè yó kem libun hdóyón henek nô bè yó, tódô gotu mlób bè ofi. Gotu genbau kdê yó kem dwata lennged le. Ni kem ni hono bli yóm filak gel blay le ebè yó kem libun hdóyón tódô henek bè yó ne bud gotu nwit le lu yó kem hohon le mò bayad le yó kem libun hdóyón bè kul benwu.”

⁸ Ominen yó udél Mika, monen, “Lemwót bè yóm deng nmò le ni botonge langag, yó gónów lemanu. Tódóe mógów hono hólól ti ne mógów hlówó lemwót bè klangagu. Tmoule lómón ohu dyakal lem bnes ne mudéle lómón kol.

⁹ Abay se deng tey nelem ne halì yó kem tau bè Samarya ne là bud gbek bnulung du. Balù bè Juda deng gefet ditu ne yóm hlayam yó ne balù bè bak tikeb Jirusalim, benwu gónón nô yó kem dou dumu, deng bud gefet bè yó snéen.

¹⁰ Hol bê tekuy abay tulón bè yó kem hohon tekuy bè syudad Gat yóm deng gefet bélê tekuy ni. Bê ye hton kul yóm kkik ye. Ó kem tau bè Bit-lifra, hlulid ye lem kfung mò gónó ye hegfan du yóm alì ksidek kegnóm ye du.

¹¹ Ó kem tau bè Syafir, hol ye hyak bè yóm kegef le kuy laen dù nes. Yó kem tau bè Saanan, là kô le hewà gu lem syudad le, likò le. Yó kem tau bè Bit-isil, gotu le langag, abay se laen dù gónó le hofin bè yó.

¹² Yó kem tau bè Marot, tey kehdeen le du ke wen tmóbóng kul, okóm là. Abay se wen tey héét hwit Dwata ebélê le ne deng sana gefet bè bak tikeb Jirusalim.

¹³ Yu kem tau bè Lakis, leket ye bè yó kem klitun gel nit bè gida yó kem kudà alì metlasik anì géhél ye mlóy. Yu se yóm tanay syudad bè Juda gna lemolò yó kem tau Israél bè yóm ktaba le ebè yó kem dwata kéng. Yu se malak yó kem tau bè Jirusalim mò du yóm salà yó.

¹⁴ Ó kem tau, géhél hwit ye ebè benwu Murisit Gat yóm hol són basa ye du, abay se móyón lana bélê ye. Yóm benwu Aksib, deng mom tnondo le yó kem tau hol geta bè Israél, fasad le yóm któbóng le kul, okóm là dohoen.

¹⁵ Ó kem tau bè Marisa, angat blay Dwata yu elem tdok yó kem hohon ye, tódô nled le yóm benwu ye. Ne yó kem tau malak bè Israél, angat le hebnos lem yóm kilib bè Adulam.

¹⁶ Yu kem tau bè Juda, nki ye wek ye, lenangag ye yó kem ngà alì kenbong nawa ye. Hetbulud ye lómón klalang yóm onuk gel mken matay, abay se angat negef le lu ebè benwu mayuk yó kem ngà ye.”