Mark 9 - Udél Dwata: Gna Kesfasad ne Lomi Kesfasad

¹ Bud mon Jisas mò kul, “Tódô tulónu kuy ktahuhen, wen he bélê ye gmafit mton du gu laan ye là deng matay yóm kogot Dwata tau ne yóm tey kegbeken.”

Kesfili kton le ke Jisas

² Timbow deng bud nem kdawen bè yó, lemwót Jisas mneged ebè yóm sotu bulul bè yó, nwiten Pitér ne Jim ne Jan, tek sónen lu. Bè yóm knô le bè yó, tódô sfili kton le ke Jisas.

³ Yóm nesen, tódô gotu sminang bukay, laen kô dù gónóm e hmingón du talak tonok yóm alì kbukayen.

⁴ Ne tódô hetnga ton le se tehe Ilaydya ne Musis, stulón le ke Jisas.

⁵ Mung tódô kudél Pitér se kun ebè Jisas, monen, “Tey hyu ni, Sér, deng me nô bè ni. Hemdà me tlu lowig dé, sotu kóm, sotu ke Musis, sotu se ke Ilaydya.”

⁶ Okóm tódô kem óyô Pitér mon du yóm monen yó, bà mon yóm tey sidek klikò le.

⁷ Yóm igò Pitér tolo mudél, tódô sut se yóm tey lobun lememek eta le, gnolungen lu, ne tódô gungol le se yóm mudél gu lemen, monen, “Ni se yóm hol dou Ngà gónón nô nawahu. Hol gel hnungol ye.”

⁸ Omin le tódô kendel hból ketngel le, okóm laen kô dumu ton le tek són Jisas.

⁹ Kewót le bè yó, mulék le mosol. Tey kget kmon Jisas du mò kul, “Hol bê ye tagad tulón yóm deng ton ye yó koni efet nan mowil he yóm Ngà Tau.”

¹⁰ Tahu se, là kô tulón le du. Okóm gel sentulón le sónen lu lan yóm mon Jisas mowil.

¹¹ Ne wen snólók le bè Jisas, mon le, “Tahu kô yóm gel mon yó kem tau tmolok hlau, nan gna bud sut he yóm tehe Ilaydya, ominen yó sut yóm tau deng kun nélék Dwata?”

¹² Bnalà Jisas se lu, monen, “Tahu se yó, gna sut Ilaydya mò fen na a hemtifes yóm kdéen. Okóm monen bè Sulat Dwata, nan hol glayam he yóm Ngà Tau, ne angat senkbê le.

¹³ Okóm tódô tulónu kuy,” mon Jisas, “deng sut se Ilaydya, okóm tódô nmò le béléen yóm kul knóyô, hol lómón se yóm deng kmon Dwata du bè Sulaten gbak ebéléen.”

Kehdó Jisas yóm busaw malak yóm ngà logi

¹⁴ Tikóng le deng bud gefet bè yó, yó kem dumu gel lemolò ke Jisas, tódô glo le yó kem tey tau wen smibut kul. Wen se kem tau tmolok hlau nô bè yó, nit le skuya mon yó kem tau lemolò ke Jisas.

¹⁵ Bè yóm kton le ke Jisas yó kem tey tau sbung bè yó, tey ketnga le du, ne gotu le mlóy ebéléen na le e hnódó.

¹⁶ Snólók Jisas yó kem gel lemolò du, monen, “Tedu senkuya ye yó du?”

¹⁷ Fen bnalà yóm sotu tau nô lem blóng yó kem tey tau wen bè yó, monen, “Wen ngau lengel matahen, Sér, tô nitu ebéléem. Là kóen bud gudél lemwót bè yóm busaw malak du.

¹⁸ Sok gel gefet béléen yóm busaw malak du, tódô mugod, ne hono bulok gu lem baken, tódô senséhéken beengen, ne tódô htudel. Denge hkodu bè yó kem gel lemolò kóm, okóm là kô gbek le hdó du yóm busaw gel malak du.”

¹⁹ Ne mon Jisas se mò kul, “Yu kem tau kmoen ni, alì ye gel hemda. Igò tey deng kegenu nô lem blóng ye, ne tey klawi nawahu bélê ye. Nitem edini sen yóm ngaem.”

²⁰ Tahu se, nwit le ebéléen. Timbow tonen Jisas yóm busaw gel malak du yóm ngà yó, tódô lugoden talak tonok yóm ngà nalaken, ne tódô hgilu bè yó yóm ngà, ne hono bulok gu lem baken.

²¹ Ne snólók Jisas yóm maen, monen, “Deng kegenen gemnóm du de nim desen ni?” Ne mon maen se, “Lemwót bè kegenen hanà udì.

²² Deng dê duléken ne tô hmatay du yóm busaw malak du, tódô gel lugoden elem ofi ne elem él. Ke gbekem tmóbóng kum, hol knoduhem mi.”

²³ Mon Jisas se mò du, “Moen de ke monem mò do, ‘Ke gbekem?’ Igoen laen dù là gbek Dwata du bè yóm tau hemtahu béléen.”

²⁴ Ne bud mudél se mà yóm ngà yó koni, hgelen udélen, monen, “Deng wen se kehtahuhu, Sér, okóm là kóyówen. Hol tennuem dou dé.”

²⁵ Timbow ton Jisas yóm tey dê tau hloni ebélê le bè yó, ominen tódô hdó yóm busaw malak yóm ngà yó, monen mò du, “Uu se humew du nim ngà ni, ne hbokong du, mdóhi ne, hol béi abay bud mulék ebéléen.”

²⁶ Ne tódô lemangat yóm busaw, ya tey sidek tódô kehkengkelen yóm ngà, ne ominen yó tódô mdó. Bè yóm kton le du yóm ngà yó, hol lómón ke deng matay. Botong mon yó kem dumu tau, “Deng matay ne.”

²⁷ Okóm nogot Jisas sigel yóm ngà, ne hdaen. Tahu se, tódô hlós mdà.

²⁸ Timbow le motun bè yóm gónô le Jisas, tek sónen lu nô bè yó, snólók yó kem gel lemolò du, mon le, “Moen de kum ke là gbek me hdó du yóm busaw malak du yóm ngà tu koni?”

²⁹ Mon Jisas se, “Tek sotu hdó du yóm busaw lómón yó, tek són yóm gel kni ebè Dwata.”

Yóm gewu dulék Jisas tmulón du yóm angat katayen

³⁰ Bud kewót le Jisas bè yó, mlan le gu lem prubinsya Galili. Là móyô Jisas ke wen tau temngón du yóm gónón nô,

³¹ abay se wen toloken yó kem gel lemolò du, yó monen mò kul, “Angat blay le elem tdok yó kem tau yóm Ngà Tau mò hfatay le. Okóm bè getluhen kdaw bud mowil.”

³² Okóm là kô dog tngón le du yó kem gel lemolò du yóm gónón e temnef nim mon Jisas mò kul ni, ne là se dog le mlos smólók du béléen.

Yóm hol geta bè yó kem tau nogot Dwata

³³ Timbow le kól bè Kapérnaum, tódô le hlós elem gónô le. Snólók Jisas bè yó kem gel lemolò du, monen, “Tedu de yóm tendo senkuya ye mulit lan?”

³⁴ Okóm balù sekteb ke bnalà le Jisas, abay se yóm tendo senkuya le mulit lan ke mahi du bélê le yóm hol geta.

³⁵ Omin Jisas myón, senbungen yó kem sfolò lewu gel lemolò du, ne monen mò kul, “Ke wen bélê ye móyô ke du hol geta bè kem dumuhen, yake nan hol heglaan knóen ne hol heklifen bè kem dumuhen.”

³⁶ Omin Jisas ma yóm sotu ngà, ne hdaen bè solu le, ne ominen hemgimak du, monen,

³⁷ “Yó se tau hmódó yóm sotu ngà lómón yóm ngà nii mlan bè dou boluy, lómón se ke ou ne yóm hnódóhen. Ne yó se hmódó dou, là olon ou du yóm hnódóhen, okóm gomong hnódóhen yóm hógów dou snéen.”

Yóm tau là hnohonen tekuy, hono kwen tekuy

³⁸ Ne mudél se ke Jan, monen, “Ó Sér, wen tau ton me gbót hdó busaw bè yóm tau wen busaw malak du hlanen bè boluyem. Okóm bnólów me, abay se là kut kwen du.”

³⁹ Okóm mon Jisas mò du, “Tedu mu ye mólów du du? Laen kô dù tau mò hentaw ton hlanen bè dou boluy ke mom sidek kudélen ebéléu kogolen.

⁴⁰ Yóm tau là hnohonen tekuy, hono kut kwen yó.

⁴¹ Tódô tulónu kuy, yóm tau ke olon hinum kuy él lemwót bè yóm deng klolò ye do, angat dohò se yóm ofol blay Dwata du.”

Ketgama yóm sindil

⁴² Bud mon Jisas mò kul, “Ke yó nmò yóm sotu tau, ke lemwót béléen gónóhen là bud hemtahu béléu yóm sotu ngà, mom hyu béléen he yóm tau yó ke tódô bot le elem mohin gu laanen là deng wen ngà hebtangen, tléwéng bè liholen yóm botu bong gónó le gmaling mò heblaten etlaan.

⁴³ Yó gónóm mon, ke doli sigelem mit kóm là hemtahu, tódô kenlengem. Mom hyu béléem ke lana béléem doli sigelem, syan ke gutahem yóm klowil laen dù sónen. Laen kô ofolem du yóm lewu sigelem ke deng mom niten u elem lanaw ofi, yóm ofi laen dù tul katayen.

^44-45 Ne ke doli tihem mit kóm là hemtahu, tódô kenlengem ne. Mom hyu béléem ke lana béléem doli tihem syan ke gutahem yóm klowil laen dù sónen. Laen kô ofolem du yóm lewu tihem ke deng mom tudà le u elem lanaw ofi.

^46-47 Ke sotu matahem mit kóm là hemtahu, tódô lensitem ne. Mom hyu béléem ke lana béléem doli matahem, syan ke gmungi bè yóm kogot Dwata tau. Laen kô ofolem du yóm lewu matahem ke deng mom tudà le u elem lanaw ofi.

⁴⁸ Bè yóm ofi yó, ‘wen kuled mken unged tau nô du, ne là kô le matay. Ne wen yóm ofi tendo mlób tau laen dù tul katayen.’

⁴⁹ Yóm gel dsù le ebè Dwata,” mon Jisas, “sal gel wen kahì hmung le du mò hólós du kun. Lómón se yó ne yóm gel nmò Dwata bè yóm tau, sal gel wen yóm mgel sut béléen hol lómón ke ofi, mò lan Dwata hólós du.

⁵⁰ Tey hyu yóm kahì. Okóm ke deng mkó yóm nómen, laen kô bud lanem hulék du edu. Senged se bélê ye,” mon Jisas, “hol ten-gama ye anì là mkóhen yóm nóm yóm kuy kahì, duhen yóm kessadat ye ne yóm kessotu nawa ye.”