Mark 8 - Udél Dwata: Gna Kesfasad ne Lomi Kesfasad

Kehken Jisas yó kem fat libu tau

¹ Sotu kdaw bè yó, tey tau wen bud stifun ebè Jisas. Timbow laen dù bud ken le, tnaba Jisas ebéléen yó kem gel lemolò du, monen mò kul,

² “Tey kkoduhu kul ni kem tau ni. Deng tlu kdaw le ni ne nô béléu bè ni, ne laen kô dù bud ken le.

³ Ne là se móyóe hulék kul là mken, kô lenmek le gu bè lan, abay se wen bélê le mayuk gónó le gu lemwót.”

⁴ Ne mon yó se kem gel lemolò du, “Bang tô gónó tekuy ma mò hken kul bè nim benwu laen dù tau menwu du ni kem tey tau wen nii.”

⁵ Ne bud mon Jisas se, “Hilu botù de mambang nô bélê ye?” Mon le se, “Tek hitu.”

⁶ Omin Jisas gotu hyón kul bè tonok yó kem tey tau wen. Ne nwahen yóm hitu botù mambang, ne nan mni bè Dwata. Tikóng deng knihen, ominen kembéng du, ne hsagiden yó kem gel lemolò du ebè yó kem tau. Ne tahu se, nmò le.

⁷ Ne wen se ngà utón él nô bélê le. Bud nwa Jisas snéen, ne nan bud mni bè Dwata, ne ominen hsagid du yó kem gel lemolò du.

^8-9 Tódô kdê le se gotu mken yó kem tau, ne gotu le se gemtu. Dô fat libu yóm kwen le. Timbow deng kken le, sentifun yó kem gel lemolò du yóm lukasen, botong hitu abì. Omin Jisas yó he gotu hulék yó kem tau,

¹⁰ Ominen tódô bud motun elem yóm ówóng, mung du yó kem gel lemolò du. Mówóng le ebè yóm sotu benwu boluyen Dalmanuta.

Kóyô yó kem Farisi ke wen hentaw ton nmò Jisas

¹¹ Bè yóm benwu yó, wen kem Farisi sut bè Jisas na a mit du skuya mon. Móyô le ke wen gónó le dmuón du, yó gónó le mon du mò du, “Moi kum kun sotu hentaw ton mò gónó me hemtahu du yóm khógów Dwata kóm.”

¹² Okóm hbong Jisas knawahen, monen, “Moen ni kem tau kmoen ni ke alì tógón le yóm hentaw ton? Tódô tulónu kuy ktahuhen, laen kô dù ilô hegfan Dwata bélê ye.”

¹³ Ne tódô tnagak Jisas lu, motun le elem ówóng, hlós le efatu yóm lanaw.

Ketgama yóm kul gel tolok yó kem Farisi ne yóm kun tolok Hirod

¹⁴ Bè yóm kógów le yó, klifót le mit bnotu yó kem gel lemolò ke Jisas, ne tek sbotù dù mambang nô bélê le lem yóm ówóng.

¹⁵ Ne wen tulón Jisas kul, bede hlanen bè hlingón, monen, “Hol ten-gama ye yóm kul bulung henok mambang yó kem Farisi, dalang se yóm ke Hirod.”

¹⁶ Stulón le són lu yó kem gel lemolò ke Jisas, mon le, “Yó dô gónón mon du yóm yó, yakà klifót tekuy du mit mambang.”

¹⁷ Tódô tngón Jisas yóm sentulón le, yó gónón mon du mò kul, “Moen de ke sentulón ye yóm là kegwit ye bnotu? Là glileb ye du dilóu lan yóm monu. Ilóem là deng tngón ye du?

¹⁸ Igoen sem wen mata ye, ewenem là kô ye mton. Igoen sem wen klingu ye, ewenem là kô ye mungol. Hentulón ye nawa dé

¹⁹ yóm kekbéngu limu botù mambang bè yó kem limu libu tau, hilu abì de yóm lukasen sentifun ye?” Mon le se, “Sfolò lewu.”

²⁰ Ne bud mon Jisas, “Ne yóm kekbéngu hitu botù mambang bè yó kem fat libu tau, hilu abì de bud tehe lukasen?” Mon le se, “Hitu.”

²¹ Ne yó bud mon Jisas mò kul, “Ilóem là getnef ye du kô yóm deng nmou yó?”

Kehton Jisas yóm tau butô bè Bitsayda

²² Ngang le Jisas mówóng bè yó efet le dmuung bè Bitsayda. Bè yóm kkól le bè yó, wen tau butô nit le ebè Jisas, ne henkodu le béléen anì olon menok du.

²³ Tahu se. Omin Jisas malak yóm tau butô yó, niten hlayuk udì bè yóm benwu yó. Ne namuen iwol mata yóm tau butô, ne nnoken, ne monen mò du, “Deng wen tonem kô?”

²⁴ Ne temngel se yóm tau yó, monen, “El, wen tonu tau, okóm lómón tô koyu mógów.”

²⁵ Bud nnok Jisas sbalà matahen, ne ominen hmunu temngel se yóm tau yó koni, ne baling hyu ketngelen, ne tódô tikaw se ktonen du yóm kdéen.

²⁶ Ne mon Jisas mò du, “Hektengi mulék ebè gónóem ne, béi bud mlan bè yó bè gónón dê tau.”

Kdilô Pitér ke Jisas yóm Misaya, yóm deng kehkamal Dwata du yóm klamangen

²⁷ Timbow bud lemwót bè yó Jisas ne yó kem gel lemolò du, mógów le ebè yó kem benwu moni bè yóm syudad boluyen Seseriya Flipay. Bè yóm igò le mógów, snólók Jisas bélê le, monen, “Tulón ye do kun, tedu de gel kmò kehedem le do yó kem dumu tau?”

²⁸ Mon le se, “Wen se mon du uu kun Jan, yóm tehe gel mabtays. Mon kem dumu, Ilaydyahi kun. Bud wen se mon du uu se sotu bè yó kem dumu tugod Dwata ekni.”

²⁹ Ne mon Jisas mò kul, “Kmò kuy du? Tedu se kuy kmò kehedem do du?” Fen bnalà Pitér, monen, “Uu se yóm Misaya, yóm deng kun nélék Dwata.”

³⁰ Ne tey mget kmon Jisas du mò kul, “Hol bê ye abay tulón yóm mon ye yó.”

Tanay ktulón Jisas yóm angat keglayamen ne katayen

³¹ Nbuten bè yó ne tendo ktolok Jisas yó kem gel lemolò du, monen mò kul, “Là kô gbeken du ke là nan na hol glayam yóm Ngà Tau. Angat senkbê yó kem tuha gónó tekuy gel galak, ne yó kem tau hol geta gel demsù ebè Dwata, dalang se yó kem tau gel tmolok hlau. Ngang le mò du efet hfatay le. Okóm angat bud hlowil Dwata bè yóm getluhen kdaw.”

³² Tódô hnakang Jisas tmulón du kul nim ni. Lemwót ke Pitér, niten hlayuk udì Jisas, tô bnólówen yóm monen.

³³ Okóm binguy Jisas ebè yó kem gel lemolò du, ne bnólówen Pitér, monen mò du, “Hlayuki béléu, Seitan. Là kóen lemwót bè Dwata yóm kehedemem yó, kaem kehedem tau te tonok.”

³⁴ Omin Jisas sembung yó kem tey tau wen bè yó, dalang se yó kem gel lemolò du, ne monen mò kul, “Ke wen tau móyô lemolò do, song hyu ke tódô tebelen yóm kun kóyô, ne eles tnihangen yóm kun kros, ominen yó lemolò do.

³⁵ Yóm tau ke knamaen klowilen, angat lana béléen yóm klowilen yó. Okóm yóm tau là knamaen du klowilen lanen lemolò do, ne lanen hetngón yóm Tulón Hyu, angat gutahen yóm klowil laen dù sónen.

³⁶ Anien he yóm tau ke gotu gfunen yóm klamangen benwu, laen kô ofolen du yóm deng gfunen yó ke lana béléen yóm klowil laen dù sónen.

³⁷ Ke lana béléen yóm klowil yó, laen kô bud gónón ma mò tlesen.

³⁸ Ni kem tau kmoen ni,” mon Jisas, “deng knogol le Dwata lan le gel mò sidek. Yóm tau ke hnalaen yóm kloloen dou lem blóng kem dumuhen, dalang se ke hnalaen yóm gel toloku, angat hnalà yóm Ngà Tau snéen sok bud semfulék edini. Bè yóm bud kesfuléken yó, angat gfan béléen yóm tey kegeta Maen, ne gotu le angat mung du yó kem hógów Dwata gu bè longit.”