Mark 7 - Udél Dwata: Gna Kesfasad ne Lomi Kesfasad

Tolok kem tau gnan

¹ Sotu kdaw bè yó, stifun le bè Jisas yó kem Farisi ne yó kem tau tmolok hlau lemwót gu bè syudad Jirusalim.

² Wen ton le bè yó kem dumu tau gel lemolò ke Jisas yóm tódô kken le, là na le molob tdok le, duhen yóm là klolò le du yóm sotu hlau deng nmò yó kem Farisi bè kolob le tdok gu laan le là deng mken.

³ (Abay se yó kem Farisi dalang se yó kem dumu Ju, là kô le kendel mken ke là na le nmò du yóm kul hlau yó kem tehe fù le bè kolob le tdok.

⁴ Ne yóm gel benli le bè fedyan, là kô kendel ken le du ke là na le nolob du. Ne tey dê he dumu gel lolò le. Balù bè tgayan le ne kuleng le ne tukung le, sana gónó le mò du yóm hlau yó, balù yó kem dumu ngom gu lem gónô.)

⁵ Duhen yó, wen snólók le bè Jisas yó kem Farisi dalang se yó kem gel tmolok hlau, mon le, “Moen de kul yó kem gel lemolò kóm ke là lolò le du yóm hlau yó kem tehe fù tekuy ekni bè khólós tekuy? Tódô le kendel gel mken là dog molob.”

⁶ Bnalà Jisas se lu, monen, “Yu se gónón e gbak yóm tehe udél Dwata htugoden ke Isaya ekni. Tey tau hemtedeng knô yóm yu, hol lómón yóm tehe monen, ‘Són bè sumóng gónó le madat do ni kem tau ni,’ mon Dwata, ‘okóm yóm nawa le, tey mayuk béléu.

⁷ Laen dù muhen yóm ktaba le ebéléu, abay se yóm hlau tolok le, tódô lenbù nmò tau, okóm yóm ktolok le du, hol lómón ke dou hlau.’

⁸ Tahu se yóm udél Dwata yó,” mon Jisas, “deng mom kenbê ye yó kem hlau lemwót bè Dwata, ne mom lolò ye yó kem hlau lenbù nmò tau.”

⁹ Bud mon Jisas, “Tey ye hulung kembê du yóm hlau Dwata, alì mlom klolò ye du yóm kuy hlau lenbù nmò.

¹⁰ Ngem yóm hlau Musis ekni, yóm monen, ‘Nadatem maem ne yéem.’ Ne sotuhen, ‘Yóm tau ke sidek kudélen ebè maen ne yéen, tódô hnatay kmò du.’Okóm yóm kuy gel ktolok,” mon Jisas, “là kóen sidek kun ke mon tekuy bè kem tuha tekuy, ‘Yóm tô blayu kuy, Kurban.’ Yó lanen yóm udél yó, deng ke Dwata ne.

¹¹ Okóm yóm kuy gel ktolok,” mon Jisas, “là kóen sidek kun ke mon tekuy bè kem tuha tekuy, ‘Yóm tô blayu kuy, Kurban.’ Yó lanen yóm udél yó, deng ke Dwata ne.

¹² Bè yóm ktolok ye yó, là kóen sidek ke là bud tnóbóng tekuy kem tuha tekuy.

¹³ Okóm deng mom knogol ye yóm hol tahu hlau Dwata. Hlau lenbù nmò ye hlolò yó kem tau. Ne tey dê he dumu nmò ye lómón ni.”

Yóm but gónó tau là mólós bè kton Dwata du

¹⁴ Ne bud senbung Jisas ebéléen yó kem tey tau wen, ne monen mò kul, “Hol hnungol ye nim monu ni, yóm kdê ye, anì tngón ye.

¹⁵ Là lemwóten bè yó kem kihu sungit yóm tau mit du là mólós bè Dwata. Okóm yó mit du là mólós, duhen yó kem sidek kebkó gel btang bè sumóngen.

¹⁶ Yóm tau wen klinguhen, hol hmungol.”

¹⁷ Omin Jisas tmagak yó kem tey tau sbung, ne husek elem gónô. Mógów le ebéléen yó kem gel lemolò du, snólók le béléen hol lan yóm deng monen yó koni.

¹⁸ Mon Jisas, “Laen dù tngón ye se kuy senta yó kem dumu tau. Ilóem là tngón ye du kô balù kihu sungit yóm tau, là kô yó du mit du là mólós bè Dwata?

¹⁹ Abay se balù kihu sungit yóm tau, là kóen hlós elem hendemen, sal hlós elem blututen, ne ominen yó bud gel lemwà gu lem lówóhen.” (Bè nim udél Jisas ni gónó tekuy temngón du laen kô dù ken sidek bélê tekuy.)

²⁰ Bud mon Jisas, “Yó mit du là mólós bè Dwata yóm tau, yó kem sidek gel lemwót gu lem hendemen.

²¹ Abay se lemwót gu lem hendem tau yóm kdéen nmò sidek, lómón mò samuk, ne mnagaw, ne monok,

²² ne mdà yehen, ne kesbì, ne yó kem dumu nmò sidek, ne smukat, ne yóm kekdol wen nô lemen, ne yó gel sélés nawa, ne yóm gel semtulón dumu tau, ne hegmón, ne yóm mò ungel.

²³ Nim kdéen sidek ni,” mon Jisas, “hono lemwót lem hendem tau, ne ni se mit du là mólós bè Dwata.”

Kehtahu yóm sotu libun sundu Ju du

²⁴ Bud kewót Jisas bè yó, hlós ebè tum benwu moni bè yóm benwu boluyen Tayal. Yóm kkólen ditu, tódô husek bè yóm sotu gónô, kóyóen ke là tngón kem dumu tau du yóm knóen bè yó, okóm senged nóm ketngón le du yóm gónóhen nô yó.

²⁵ Bè yóm benwu yó, wen sotu libun wen ngaen libun wen busaw malak du. Ne unihen mungol yóm knô Jisas bè yó, tódô kendel mógów etu, tódô hegluduk klohok tihen,

²⁶ ne hkodu béléen anì hdóhen yóm busaw gel malak yóm ngaen. Nim libun ni, là Juhen, tau Funisya se kun, lemwót bè yóm sotu benwu boluyen Sirya.

²⁷ Omin Jisas mudél ebéléen bede hningónen, monen, “Na te na gna henken yó kem ngà. Là hyuhen ke bot bè yó kem ohu yóm kul ken yó kem ngà.”

²⁸ Ne mon yóm libun, monen, “Tahu se yóm monem yó, Sér. Okóm yó kem ohu nô laan lemisa, sal gel ken le se kul yó kem ubang ken kem ngà.”

²⁹ Mon Jisas se mò du, “Lemwót bè yóm monem yó, Lenibun, gónón mdó bè ngaem yóm busaw gel malak du. Muléki ne.”

³⁰ Tahu se, mulék yóm libun yó. Bè yóm kkólen bè gónóen, ne tonen se yóm ngaen hlilil te katri, ne deng sana mdó se yóm busaw tehe malak du.

Któbóng Jisas yóm tau bokong luken umew

³¹ Bud kewót Jisas bè yó bè Tayal, mlan etu bè yóm benwu boluyen Sidon, ne ebè yóm benwu bnoluy le Sfolò Benwu, ne hlós ebè Lanaw Galili.

³² Bè yóm kkólen bè yó, wen sotu tau bokong lelen umew nit le ebè Jisas. Henkodu le béléen anì nnoken nim tau ni.

³³ Tahu se, nwit Jisas hetsik yóm tau bokong yó koni, ne sbalà nseng Jisas tdok yóm klinguhen. Ne ominen dmulak tukô tdoken, ne duen te dilak yóm tau umew.

³⁴ Ne lengalà ebè longit, ne hbongen knawahen, ne monen mò yóm tau yó bè kun udél, “Ephphatha.” Yó lanen, monen, “Mungoli.”

³⁵ Tahu se, tódô kendel bud mungol yóm tau yó, ne bud gembaling yóm udélen.

³⁶ Ne mon Jisas bè yó kem tau bè yó, “Bê ye abay tulón bè kem dumu tau nim ni.” Okóm là kóen skas yóm ktulón le du.

³⁷ Ya tey ketnga yó kem tau hmungol du, mon le, “Hono hyu yóm kdê gel nmoen,” yóm mò ke Jisas. “Balù yó kem bokong, bud mungol, ne yó kem umew, bud gudél.”