Mark 6 - Udél Dwata: Gna Kesfasad ne Lomi Kesfasad

Kekbê le ke Jisas bè Nasarit, yóm hol kun benwu

¹ Bud kewót Jisas bè yó, mulék ebè kun benwu, mung du yó kem gel lemolò du.

² Timbow deng bud kól bè yóm Kdaw Kehegnô, yó nmò Jisas tmolok bè yóm kul gónô gel stifun yó kem Ju bè yó. Tey tau wen stifun hmungol du, ne tey ketnga le, mon le, “Gónón ma du yóm alì khulungen tmolok nim tau ni? Ne gónón lemwót yóm tey ketngónen? Tedum mò kmoen du yó kem hentaw ton gel nmoen?

³ Igoen du yóm tau gel mò gónô, ne Midi yéen, ne du se twogu le Jim ne Jusif ne Judas ne Simun, ne wen se kem libunen nô gu bè ni.” Yó se gónó le kembê du.

⁴ Mon Jisas mò kul, “Yóm tugod Dwata, laen kô dù madat du bè hol kun benwu. Dalang se yó kem hol kun fes lówó, là kô nadat le du. Tek són yó kem dumu tau bè tólóng benwu madat du.”

⁵ Lemwót bè yóm là kehtahu le du, là wenen yóm hentaw ton nmò Jisas bè yó. Wen nenoken bè yó kem tau gemnóm des, ne hkóhen des le, bede là hol le wen.

⁶ Ne tey ketngahen du yóm là kehtahu le béléen yó kem tau bè yó. Timbow bud lemwót bè yó Jisas, nan e tmolok bè yó kem dumu benwu hmilol.

Khógów Jisas yó kem sfolò lewu tau néléken

⁷ Ominen semtifun kul yó kem sfolò lewu gel lemolò du, ne wen gónón e hógów kul, bede ket kul na lewu kmò khógówen kul. Ne wen ktued blayen kul anì gbek le hdó busaw.

⁸ Ne wen hlauhen kul, monen, “Bè nim kógów ye ni, olo ye mit tuged, béen abay wen dumu nwit ye. Bê ye abay mit bnotu, duhen ke bag, duhen ke filak.

⁹ Olo ye lemsek snilas ye, ne olon sotu kgal lesek ye, bê ye abay mit mò gewuhen.

¹⁰ Yó se gónô gónón wen hmódó kuy, yó se gónó ye mefet efet kól bè kulék ye.

¹¹ Ne ke wen benwu là hmódó kuy, ne ke là dog hnungol le kuy, tódô tnagak ye yóm benwu yó, olo ye tmótók kfung bè ti ye mò ilô yóm angat ktafak Dwata kul.”

¹² Tahu se. Kewót le bè yó na le e tmolok. Yó gel mon le, “Hegsel ye ne, knogol ye yóm sidek deng gel nmò ye.”

¹³ Ne tey dê busaw hdó le gu bè yó kem tau. Ne lenunol le hnolo yó kem tau gemnóm des, ne gotu mkó se yó kem des le.

Kegbelen bè nawa Hirod yóm tehe kehfatayen ke Jan gel mabtays

¹⁴ Ngangen mból yóm gel nmò le Jisas efet gefet bè Hirod, yóm tau hol geta bè Galili. Deng tey baling tótól yóm boluy Jisas lemwót bè yóm gel nmoen. Wen se mon du, “Deng bud mowil yóm Jan tehe mabtays, yó gónón wen ktueden mò du yó kem hentaw ton gel nmoen.”

¹⁵ Mon kem dumu, “Du se yóm tehe Ilaydya.” Ne wen se mon du, “Du se sotu tugod Dwata, mkél bè yó kem gna tugoden ekni.”

¹⁶ Timbow gungol Hirod, monen, “Du kun yóm Jan gel mabtays. Deng tehe heklengu liholen, okóm deng bud mowil.”

¹⁷ Yó gónó Hirod mon du yóm yó, abay se du se tehe hekfô ke Jan, ne hféten, ne heblangguen. Yó gónón mò du béléen yóm yó, lan Jan tehe mólów du bè yóm tehe kalawen ke Hirudiyas, yehen yóm twolihen boluyen Filip.

¹⁸ Yó tehe bólów Jan du, monen, “Deng nuléhem yóm hlau tekuy yóm kalawem yehen twolihem yó.”

¹⁹ Lemwót bè yóm udél Jan yó, deng mom sidek kebut Hirudiyas du, kóyóen ke hfatayen, okóm là hlus Hirod du.

²⁰ Abay se ke Hirod, wen klikoen ke Jan. Tódô tngónen tau tedeng kmoen, bà udì ke wen belenen, yó gónón gel mofin du. Tey móyô Hirod hmungol du yóm gel tulón Jan, okóm deng mom sónmoen sbeweg kehedemen bè yóm gel khungolen du.

²¹ Ni se tehe kmoen yóm katay Jan. Bè yóm tehe kkól yóm kdaw gel kehligal le du yóm kdaw tehe ksut Hirod, deng duhen yó se kdaw Hirudiyas tnana mò yóm kóyô nmoen bè Jan. Gotu tinok Hirod yó kem tau hol geta mogot kukum, ne yó kem tau hol geta bè yó kem sendalù, ne yó kem dumu tau wen glalen bè yó bè Galili.

²² Bè yóm deng gotu kestifun le, hadal le yóm ngà Hirudiyas libun. Tey kehligal Hirod béléen dalang se yó kem kdê tau tinoken. Botong mon Hirod mò yóm ngà madal, “Tedu se tô nóyóem? Balù kihu hnihem béléu, blayu kóm.”

²³ Gloken smafà béléen he, monen, “Balù doli nim benwu nogotu, ke hnihem béléu, botong blayu kóm.”

²⁴ Ne tódô lemwót se yóm ngà libun yó nan e snólók bè yéen yóm hyu mò hnihen. Ne mon yéen se, “Hnihem béléen kulu Jan dé, yóm tau gel mabtays.”

²⁵ Tódô kendel hetlasik mulék se yóm ngà ebè Hirod, ne monen mò du, “Kulu Jan dé blayem dou, hyónem do te huyów.”

²⁶ Laen ofolem hmingón du yóm tey ksidek kegnóm Hirod du. Okóm lemwót bè yóm deng kwen fasaden lem blóng yó kem tey tau tinoken, ne mung du safaen, yó gónón myak ke là blayen du bè yóm ngà yóm hnihen.

²⁷ Ne tódô dók Hirod se yóm sotu sendaluen anì niten kulu Jan ebè yóm ngà. Ne tahu se, lemwót yóm sendalù, kenlengen lihol Jan ditu lem blanggù.

²⁸ Deng keklengen du, hyónen te huyów, ne niten ebè yóm ngà libun, ne blayen du. Lemwót kun yóm ngà libun, blayen ke yéen.

²⁹ Timbow gungol yó kem tau gel lemolò ke Jan, omin le mógów ebè yó na le e nwa lówóhen, ne lebeng le.

Kehken Jisas yó kem limu libu logi

³⁰ Timbow le gotu bud mulék ebè Jisas yó kem hógówen, gotu tulón le du yóm deng gendeng le ne yóm gel ktolok le.

³¹ Tódô setgafit gnan tau mógów ebè Jisas, botong là dogen gel gken dalang se yó kem gel lemolò du. Yó gónón mon du mò kul, “Lemwót tekuy ne, mógów kuy ebè yóm gónón tinof anì na ye gehegnô.”

³² Tahu se. Kewót le bè yó són lu, smakay le ówóng, mógów le ebè yóm gónón tinof.

³³ Okóm tey dê tau mton kul bè yóm kewót le, ne dilô le lu. Yó nmò le, lemwót le se kul bè yó kem kul benwu, tódô le hetlasik mentad hilol lanaw, ne deng le mom gna kól ditu kul.

³⁴ Timbow le dmuung le Jisas, tódô glo le yó kem tey tau wen. Ya tey kkodu Jisas kul, abay se lómón tô le ubiha laen mdengen semgyok kul. Ominen tódô mbut tmolok kul bè yó, ne tey dê toloken kul.

³⁵ Timbow deng móyón kimel, mógów le ebè Jisas yó kem gel lemolò du, mon le, “Deng tey móyón kimel ne, lelen là moni bè tau nim benwu ni.

³⁶ Dókem lu dé ni kem tey tau ni anì na le e bemli ken le bè tu kem benwu hmilol.”

³⁷ Okóm mon Jisas, “Tódô yu ne hemken kul.” Bud mon le se, “Ê, sukéy sotu tau bè wolu bulón gbek ken le ni kem tey tau ni. Móyói kô ke mógów me ne me e bemli bélê le mò ken le?”

³⁸ Bud mon Jisas se, “Hnénég ye kun ke hilu botù mambang nô bélê ye bè yó.” Tahu se, hnénég le, ne mon le, “Limu botù mambang, ne lewu tedek utón él.”

³⁹ Omin Jisas mdók yó kem gel lemolò du anì senbung hyón le lu yó kem tau bè yóm gónón ukol bnes.

⁴⁰ Tahu se, gotu hyón le lu, ket na lematu yóm sotu bungen, ne wen se limu folò.

⁴¹ Omin Jisas ma yóm limu botù mambang ne yóm lewu tedek utón él, ne nan lengalà ebè longit, mni bè Dwata, ominen kembéng yóm mambang, ne oguhen yó kem gel lemolò du anì sagid le ebè yó kem tau. Senged se kmoen bè yóm lewu tedek utón él, nólólen bè yóm kdê le.

⁴² Tódô le se gotu mken yóm kdê le, ne gotu le se gemtu.

⁴³ Tikóng deng kken le, gotu sentifun yó kem gel lemolò ke Jisas yó kem lukas ken le. Botong sfolò lewu abì lukasen.

⁴⁴ Yó kwen logi mken, botong limu libu.

Kógów Jisas te él

⁴⁵ Omin Jisas hotun kul elem ówóng yó kem gel lemolò du, hegnahen lu efatu yóm lanaw bè yóm benwu boluyen Bitsayda, ominen yó bud hulék yó kem tey tau wen.

⁴⁶ Timbow le deng gotu lemwót, lemwót se ke Jisas mógów elem bulul nan e mni bè Dwata.

⁴⁷ Ngangen nô ditu efet kifu tek sotuhen. Blaem yóm ówóng snakay yó kem gel lemolò du, deng kól talak lanaw.

⁴⁸ Ne ton Jisas yóm tey keglayam le kemwa, abay se mom senlongen lu yóm lenos. Song sut bélê le Jisas, deng móyón mwas, tódô mógów ta él ebélê le, ne lómón ke tô hekteng niusen lu.

⁴⁹ Bè yóm kton le du mógów ta él, ofo kul mon du ke busaw. Ya tey klangat le,

⁵⁰ abay se tódô kdê le mton du, ne tey sidek klikò le. Tódô kendel mudél ebélê le se Jisas, monen, “Hgel ye nawa ye dé, ou ni. Bê ye hlikò.”

⁵¹ Ominen motun ebélê le lem yóm ówóng, ne tódô teflok se yóm lenos. Ya tey sidek ketnga le.

⁵² Abay se ni kem lemolò ke Jisas ni, là deng glileb le du he ke du yóm tahu Ngà Dwata, balù yóm deng kton le du yóm hentaw ton nmoen mlan bè yóm mambang hkenen yó kem limu libu logi. Balù udì ke glileb le tendoken yóm deng nmò Jisas yó.

Kkó Jisas des yó kem tau bè Ginésarit

⁵³ Ngang le mówóng efet le dmuung fi fatu yóm lanaw bè yóm benwu boluyen Ginésarit.

⁵⁴ Bè yóm kekmó le gu ta yóm ówóng, tódô kendel dilô le Jisas yó kem tau bè yó.

⁵⁵ Tódô le gotu hetlasik lemwót na le e nangay yó kem tau gemnóm des anì gotu nwit le lu ebéléen. Balù kihu benwu gónó Jisas nô, sal gel wen tau gemnóm des sentihang le ebéléen.

⁵⁶ Kihu benwu gónón e solu, benwu lembang duhen ke benwu lemnek, sal gel mdengen gónó le semtifun kul yó kem tau gemnóm des. Gel henkodu le bè Jisas ke balù olo le gemdù nesen yó kem tau gemnóm des. Tahu se, tódô kdéen tau gemdù nesen, gotu le bud hyu.