Mark 5 - Udél Dwata: Gna Kesfasad ne Lomi Kesfasad

Bud kehdó Jisas busaw

¹ Ngang le mówóng le Jisas efet le kól sendifal yóm Lanaw Galili bè benwu yó kem tau Girasin.

² Timbow le dmuung bè kilil, omin Jisas kmó ete kembu. Tódô senlong yóm sotu tau wen busaw malak du lemwót bè yó kem kilib gónó lembeng.

³ Són bè yó gónóhen gel nô nim tau ni. Laen kô dù tau gembek mfét du, baluen ke kedina.

⁴ Deng dê dulék le ne kemdina sigelen ne tihen, ewenem tódô gotu bkas yóm kedina le du. Laen kô dù tau gembek mafas du.

⁵ Tódô senflósen kdaw ne kifu tendo mógów sembeweg gu lem blóng yó kem lebeng ne gu lem bulul. Tódô gel hendlaen lemangat, lelen gel migad du bè knóen yó kem botu telem efet hnalì.

⁶ Bè yóm ktonen ke Jisas, hanà tolo mayuk béléen. Yó nmoen, tódô kendel mlóy ebéléen na a mtud bukol bè soluhen,

⁷ ne ominen tódô hendlà lemangat, monen, “Ó Jisas, yóm hol Ngà yóm Dwata alì geta bè kdéen. Tedu hendufem béléu ni du? Smafai do bè Dwata kun anì là kendel tnafakem do ni.”

⁸ Yó gónón mon du nim ni, abay se deng eles mudél Jisas ebè yóm busaw, monen mò du, “Mdóhi béléen.”

⁹ Ne snólók Jisas yóm busaw, monen, “Tedu de boluyem?” Bnalaen se, monen, “Yó dou boluy ‘Genged’ abay se tey me wen.”

¹⁰ Tódô henlelen hkodu bè Jisas anì là hdóhen kul bè yóm benwu yó.

¹¹ Bè yóm kdaw yó, kulel se keswól le talak bilil yó kem tey sdô wen, uma kóm geblà klayuken bélê le.

¹² Yó henkodu le bè Jisas yó kem busaw, mon le, “Yake bè yó dé kem sdô tuu gónóm e hfusek kum.”

¹³ Tahu se, hlus Jisas lu. Ne tódô tebel yó kem busaw yóm tau yó koni, ne husek le ebè tu kem sdô. Kewót le se kul yó kem tey sdô wen, dô limu libu kwen le, gotu le sedlu mlóy mosol ebè tubaw kbu yóm lanaw, ne gotu le gekmó elemen, ne tódô le gotu lemneb yóm kdê le.

¹⁴ Kewót le se kul yó kem tau gel semgyok yó kem sdô, tódô le gotu lemwót mlóy ebè yóm benwu moni bè yó ne ebè yó kem dumu tau gmónô hmilol na le e tulón kul yóm deng ton le. Mung kungol le du, tódô le sguku etu na le e hnénég yó kem deng tulón le kul.

¹⁵ Timbow le gdofì bè Jisas, tódô ton le se yóm tau tehe genged busaw malak du myón klohok Jisas. Deng bud lemsek nes, ne deng bud hyu kehedemen. Ya tey sidek klikò le yó kem tau sguku ebè yó yó.

¹⁶ Yó kem tau mton du yóm deng nmò Jisas bè yóm tau tehe wen busaw malak du yó, bud lu se fen alì tmulón du bè yó kem dumu tau. Ne tulón le snéen yóm kmò kton le yó kem sdô.

¹⁷ Lemwót yó kem tau bè yó, henkodu le bè Jisas anì tnagaken yóm benwu le. Tahu se, lemwót le Jisas.

¹⁸ Bè yóm kotunen elem ówóng, tey kehkoduhen bè Jisas yóm tau tehe wen busaw malak du anì tô mung kul.

¹⁹ Okóm là kô henmóyô Jisas du, mom monen mò du, “Tódói mulék ne ebè yó kem fes lówóhem. Tulónem kul yóm tey deng nmoen béléen yóm gónóhem mogot ne yóm tey kkoduhen kóm.”

²⁰ Tahu se, mulék yóm tau yó. Tódô lengeben bè klamangen yóm benwu boluyen Sfolò Benwu gónón e tmulón du yóm deng nmò Jisas béléen. Ya tey kehtaw le du yó kem tau gel mungol du.

Kkó Jisas des yóm libun mdù nesen ne klowilen yóm ngà libun deng mlef

²¹ Bud kewót le Jisas bè yó, mówóng le mulék efatu lanaw. Bè yóm bud kduung le, ya tey tau wen bud sembung kul bè yó bè kilil lanaw.

²² Ne wen sotu tau sut bè Jisas, boluyen Jarus, tau wen glalen bè yóm kul gónô stifun bè yó. Bè yóm ktonen ke Jisas, tódô na a mtud bukol bè soluhen,

²³ ya tey kehkoduhen béléen, monen, “Ó Sér, tey leed desen yóm ngau libun. Holi mung dou bè gónóu nam e nnok dou anì tódô mkó tum desen, ne anì bud mowil.”

²⁴ Ne tahu se, mung du Jisas, ne lel yó kem tey tau wen tendo seklot hmilol du.

²⁵ Wen sotu libun gemnóm des tenbalung gbool bè yó kem tey tau wen huli ke Jisas. Deng sfolò lewu halayen gemnóm du yóm desen.

²⁶ Deng dê duléken ne gel hbulung bè duktur, botong gotu filaken, ewenem là kóen mkó yóm desen, deng mom temnù.

²⁷ Deng gel gungolen yóm nmò Jisas, yó gónón tódô hegbool bè yó kem tey tau wen huli du.

²⁸ Yó hendemen, “Baluen ke olohu gemdù nesen, kaem tódô mkó nim desu.”

²⁹ Tahu se, nan e gdù nes Jisas, ne tódô sennganen se teflok yóm litô tendo gu béléen, ne gnómen se yóm deng kehyuhen.

³⁰ Unin mdù du, tódô gnóm Jisas se yóm kwen ktued hkó des lemwót gu béléen. Ominen binguy ete kwangen, monen, “Tmau du mdù nesu ni koni?”

³¹ Ne mudél se yó kem gel lemolò du, mon le, “Ilóem là tonem du kô yó du kem tau seklot hmilol kóm yóó? Tlek kóm tô smólók ke tau du mdù nesem.”

³² Okóm là kóen mkó kebel Jisas du mata yóm tau mdù nesen yó.

³³ Ne tódô tngón yó sem libun, ebéléen gónón e gbak yóm mon Jisas yó. Tódô setbol kkelen lemwót bè yóm tey klikoen, na a tódô mtud bukol bè solu Jisas. Gotu benkas tulónen du yóm ktahuhen.

³⁴ Mon Jisas se mò du, “Yó ne, Lenibun, bè yóm kehtahuhem béléu, yó se gónón mkó yóm desem. Tu ne, muléki. Dwata he henek nawahem. Laen dù bud sfuhen ne yóm desem.”

³⁵ Yóm igò Jisas tolo stulón bè yóm libun yó, wen tau sut bè yó lemwót bè gónô Jarus, ne mon le mò ke Jarus, “Là bud gafitem du ne ngaem. Bê kuy dog bud hnala ne Jisas.”

³⁶ Okóm ke Jisas, là dog kenmónen du yóm mon le yó, olon mon du mò ke Jarus, “Béem htafa nawam. Tódô henlelem yóm ksaligem do.”

³⁷ Kewót Jisas bè yó, tek són Pitér ne Jim ne twolihen Jan nwiten, là nwiten kul yó kem dumu tau.

³⁸ Bè yóm kkól le ditu bè gónô Jarus, tódô glo le tey dê tau hebnes bè yó, lenangag le yóm ngà deng matay, ne tey sidek kkik le.

³⁹ Omin Jisas husek elem gónô, monen mò yó kem tau bè yó, “Mò ye alì hebnes ni du? Tedu alì nkik ye ni? Là kóen matay yóm ngà, olon tungô.”

⁴⁰ Deng mom henkéng le Jisas yó kem tau yó. Omin Jisas gotu hewà kul, tek són mà yóm ngà ne yéen ne yó kem tlu tau gel lemolò du nwiten elem tum dfél gónón nô yóm ngà.

⁴¹ Kól bè yó, nogoten sigel yóm ngà, ne monen mò du bè kul udél, “Talitha koum.” Yó lanen, “Ó Bun, btiki ne.”

⁴² Tahu se, tódô kendel btik yóm ngà, ne tódô mógów gu bè yó. Deng wen dô sfolò lewu ne halayen yóm ngà yó. Ya tey ketnga yó kem tuhahen.

⁴³ Bede tey mget kmon Jisas du mò kul, “Hol bê ye abay tulón yóm deng nmou bélê ye ni.” Ne bud monen mò kul, “Henken ye dé.”