Mark 3 - Udél Dwata: Gna Kesfasad ne Lomi Kesfasad

Kkó Jisas des bè Kdaw Kehegnô

¹ Omin Jisas bud mulék ebè yóm gónó le stifun yó kem Ju. Wen sotu tau nô bè yó kimoy doli sigelen.

² Wen se kem dumu tau nô bè yó, tenngel le Jisas anì ton le ke hkóhen des yóm tau kimoy yó bè yóm Kdaw Kehegnô anì wen dalil le dmuón du.

³ Ne mon Jisas mò yóm tau kimoy sigelen, “Ó Wè, mógówi edini kun béléu.” Tahu se, mógów ebè Jisas yóm tau yó.

⁴ Ne mudél Jisas ebè yó kem tau sbung, snólóken lu, monen, “Tedu de bang nmò tekuy bè yóm Kdaw Kehegnô anì là gsalà tekuy du yóm hlau tekuy? Hyu kô yóm tmóbóng duhen ke hensidek? Ke lemowil tau, duhen ke tódô hnatay?” Okóm tódô le neb yóm kdê le.

⁵ Bè yóm ketngel Jisas ebélê le, tey kebuten kul. Okóm nô bè yó se klayuk nawahen kul, abay se dilóen bélê le yóm tey kgel kulu le ne yóm klaen dù keskodu bélê le. Ominen bud haking ebè yóm tau kimoy sigelen, monen mò du, “Ó Wè, bentolem sigelem.” Ne tahu se, bentolen, ne hol lómón ke laen dù tehe desen.

⁶ Okóm yó kem Farisi, tódô le lemwót bè yó, mógów le ebè yó kem tau genlal bè Hirod, sensatul le yóm kmò khatay le ke Jisas.

Ktolok Jisas bè kilil lanaw

⁷ Lemwót Jisas mung du yó kem gel lemolò du, mógów le etu bè kilil Lanaw Galili, ne tey tau wen mung du. Lemwót le bè prubinsya Galili ne Judiya,

⁸ ne bè yóm syudad Jirusalim, ne bè klamangen prubinsya Idumiya. Ne wen se lemwót fi dmata kdaw yóm él boluyen Jurdan, kkólen bè yó kem syudad bè kilil mohin boluyen Tayal ne Sidon. Yó gónó le mógów ebè Jisas, abay se deng gungol le yó kem gel nmoen.

⁹ Ya tey tau wen segdendel ebéléen, botong hwahen yó kem gel lemolò du yóm sotu ówóng mò gónóhen myón te él anì là katen gilad béléen yó kem tey tau.

¹⁰ Deng dê ne bélê le hkóhen des le. Yó gónóm mon alì wen kem dumu tau gemnóm des alì segdendel ebéléen anì gdù le.

¹¹ Ne yó kem tau wen busaw malak kul, sok ton le Jisas, tódô le hegdungul bè soluhen, ne ya tey gel klangat le, mon le, “Uu se yóm hol Ngà Dwata.”

¹² Tey kget kbólów Jisas yó kem busaw gel malak kul anì là tulón le du yóm ketngón le du.

Kélék Jisas yó kem sfolò lewu mò gel hógówen

¹³ Bud kewót Jisas bè yó, mógów elem bulul, ne htabahen yó kem tau nóyô niten. Tahu se, mógów le ebéléen.

¹⁴ Ne sfolò lewu tau néléken ne yó boluyen kul aposol. Yó monen mò kul, “Deng néléku yu mò tau hol mung dou ne mò tau gel hógówu snéen mit yóm dou tulón.

¹⁵ Ne wen kwalis blayu kuy anì gbek ye hdó busaw.”

¹⁶ Ni se boluy yó kem sfolò lewu tau néléken: Simun (yóm bnoluyen Pitér).

¹⁷ Jim ne yóm twolihen Jan (kem ngà Sibidi. Yó iba Jisas kul, Buanirgis. Yó lanen, “Kem Ngà Lugung.”)

¹⁸ Ne Andru ne Filip ne Bartulumyu ne Matyu ne Tumas ne yóm sotu Jim ngà Alfiyus ne Tadiyus ne yóm sotu Simun, yóm tau tehe mung mofin yóm kul benwu

¹⁹ ne Judas Iskariyut, yóm fen bemlay ke Jisas sumóng.

Kemgis Jisas senta Seitan

²⁰ Omin Jisas bud mulék ebè gónóen, mung du yó kem gel lemolò du. Ne ya tey tau wen bud stifun ebéléen, botong là getngón le du mken.

²¹ Timbow gungol yó kem fes lówó Jisas nim ni, tódô le mógów ebéléen anì tô nwit le mulék, yakà deng wen kem tau mon du deng lengel matahen mò ke Jisas.

²² Wen se bè yó kem tau tmolok hlau lemwót bè Jirusalim nô bè yó. Yó udél le ebè Jisas, mon le, “Nalak Seitan, yóm kul ogot yó kem busaw. Yó gónón gembek hdó yó kem busaw.”

²³ Okóm tnaba Jisas yó kem tau mudél yó koni, wen monen mò kul, bede hningónen, monen, “Ke tahu Seitan se malak do, là kô nan e hdó kul yó kem dumuhen busaw.

²⁴ Ke wen benwu mesgólól nawa tauhen, ne ke sónmò le sfatay, angat meglà.

²⁵ Senged se ke wen sotu gmónô, ke là ssotu nawa le ne ke sónmò le sfatay, kaem angat le meglà.

²⁶ Duhen yó,” mon Jisas, “ke deng mesgólól nawa yó kem kun nogot Seitan, là kóen gfu yóm kun kogot, nénégem kà angaten meglà bè sónen.

²⁷ Yóm kul ogot yó kem busaw,” mon Jisas, “hol lómón yóm tau kemgis. Laen dù gusek elem gónóen na a ma yó kem kimuhen ke là nan gna nfét yóm tau kemgis yó. Ke deng gféten, yó he kegwahen yó kem nóyóen lem gónóen. Hol lómón yó se,” mon Jisas, “yóm deng nmou bè Seitan.

²⁸ Tódô tulónu kuy ktahuhen, gbek Dwata hmifót du yóm tau balù kihu salà nmoen ne balù kihu udélen sidek gbak ebéléen.

²⁹ Okóm là kô gbek Dwata hmifót du yóm tau ke sidek kudélen ebè yóm Tulus Dwata. Ne laen kô tul kkóhen tahen yóm salaen yó.”

³⁰ Yó gónó Jisas mon du yóm yó, abay se mon le nalak busaw mò ke Jisas.

Kebel le ke Jisas le yéen ne kem twolihen

³¹ Ne sut le bè yó le Yê Jisas ne yó kem twolihen, bede mdà le bè lewà. Ne wen tau hógów le ebè Jisas anì nan hewà ebélê le.

³² Tey tau wen myón hilol Jisas, ne wen bélê le mon du mò du, “Tu le yéem ne kem twolihem ne kem libunem, nô le bè lewà, tô le móyô stulón kóm kun.”

³³ Yó balà Jisas du, monen, “Wen se dumu yéu, ne wen se dumu twolihu.”

³⁴ Ominen temngel ebè yó kem tau myón hilolen ne monen, “Ngem ni kem tau nii, hol lómón ke yéu, ne hol lómón ke twolihu.

³⁵ Yó se mimón yóm kun kóyô Dwata, yó se hol twolihu ne libunu ne yéu.”