Mark 13 - Udél Dwata: Gna Kesfasad ne Lomi Kesfasad

Ktulón Jisas yóm angat kegbà yóm Gónô Dwata

¹ Bè yóm kewót Jisas bè Gónô Dwata, monen mò du yóm sotu tau gel lemolò du, “Ngem, Sér, tey tilob kmò le kul ni kem gónô ni, tey tilob botu beng le.”

² Mon Jisas se mò du, “Ni kem kdê gónô lembang ton tekuy ni, laen kô dù angat tebel du ni kem beng botu nii, angat gotu gbà.”

Ilô yóm hol són kdaw

³ Ngang Jisas mógów efet kól bè Bulul Ulib, fi fatu yóm Gónô Dwata yó koni, ominen myón bè yó. Ne mógów le se ebéléen le Pitér ne Jim ne Jan ne Andru, tek són lu, ne snólók le bè Jisas, mon le,

⁴ “Ó Sér, kilón kdohoen yóm deng tulónem kum yó koni? Tedu se mò ilô me du yóm móyón ksuten ni kem monem ni?”

⁵ Ne mon Jisas se mò kul, “Hol ten-gama ye anì laen dù tau gónó ye gsukat.

⁶ Abay se angat dê tau sut tô hlingu béléu. Yó angat mon le, ‘Ou se yóm Misaya.’ Ne angat tey dê se tau gsukat bélê le.

⁷ Sok wen gungol ye tau sgida moni bélê ye, duhen ke sentulón le gida bè dumu benwu snéen, bê ye abay hlikò. Angat gotu dohò ni kem ni, okóm là yó du he yóm hol són kdaw.

⁸ Angat wen kem benwu mit sgida bè kem dumu benwu. Angat tey dê benwu gónón e mbel linol bong ne bitil bong. Yó se ayawen yóm móyón kkól yóm hol són kdaw. Lómón yóm libun mlutut, sok kmuleng, ayawen sut yóm ngaen.

⁹ Eles hol ten-gama ye,” mon Jisas, “abay se angat wen kem tau kemfô kuy, nit le yu ebè yóm gónô skukum, angat nabid nfes le yu bè yó kem kul gónô gel stifun yó kem Ju. Lemwót bè yóm klolò ye do, angat nit le yu bè solu yó kem gubérnor, ne bè yó kem dumu tau hol geta. Yó se yóm kdaw tnana keheglileb ye yóm Tulón Hyu.

¹⁰ Bede nan glalag bè kdéen tau bè klamangen benwu he yóm Tulón Hyu yó, ominen yó kól yóm hol són kdaw.

¹¹ Ke angat kenfô le yu, ne nit le yu ebè yóm gónô skukum, bê ye abay tnafa nawa yóm kmò kbalà ye kul. Dwata he bemlay kuy yóm kmò angat kbalà ye kul sok sut yóm kdaw yó. Abay se là kô kuy udél du yóm angat mon ye, udél tódô suen bélê ye yóm Tulus Dwata.

¹² Bè yóm kdaw yó,” mon Jisas, “angat wen se tau glef hekfô le yó kem hol kul dumu setwoli mò hfatay le. Wen se kem tau, glef hekfô le yó kem hol kul ngà mò hfatay le. Dalang se yó kem ngà, angat glef le hfatay yó kem hol kul tuha.

¹³ Angat tey dê tau kmutó nawa kuy lemwót bè yóm klolò ye do,” mon Jisas. “Okóm yóm tau gbeken hembala du yó kem gónón glayam efet kól bè hol sónen, du se gmuta du yóm klowil laen dù sónen.”

Yóm tô matù ke Dwata

¹⁴ Bud mon Jisas, “Angat wen ton ye yóm alì sidek knikò, tódô mdà bè Gónô Dwata, yóm tô matù ke Dwata.” Yóm tau semfala du nim ni, hol hennagien kmò klanen. “Ke sok kól yóm kdaw yó, eles le mlóy elem bulul ne yó kem tau menwu bè prubinsya Judiya.

¹⁵ Ke wen tau tolo nô bè kun gónó henos bè gónóen, hol béen tlek husek elem gónóen ke mebel mò niten.

¹⁶ Ke wen tau tolo nô bè tnibahen, hol béen tlek bud mulék eta ne ke mebel kgal mfól mò niten.

¹⁷ Kodu le yó kem libun tolo mlutut bè yóm kdaw yó, ne yó kem libun tolo semlé ngà.

¹⁸ Hol hni ye bè Dwata anì là geblaen bè yóm bulónen sidek kdaw yóm klóy ye.

¹⁹ Abay se angat tey hlayam bong sok sut bélê ye yóm hlayam monu ni. Ni he yóm hlayam alì sidek bè kdéen hlayam deng sut bè tau lemwót bè hol kbut kedlimun Dwata du yóm benwu, ne là se kô bud sneefen du ne.

²⁰ Okóm lemwót bè yóm kkodu Dwata kul yó kem tau deng néléken, yó gónón là hol hegen du yóm alì hlayam yó. Ke hegenen, laen kô tau bud mowil te tonok.

²¹ Sotuhen,” mon Jisas, “hol bê ye abay hentahu ke wen tau mon du mò kuy, ‘Ngem ni sii yóm Misaya, yóm deng kun nélék Dwata.’ Duhen ke mon le, ‘Ngem, deng gdek dituu,’ hol bê ye abay hentahu.

²² Abay se angat wen sut tô hlingu bè yóm Misaya, ne tô le hlingu bè yó kem tugod Dwata. Angat tey dê hentaw ton hegfan le mò gónó le hol tô smukat yó kem tau deng kun nélék Dwata.

²³ Eles tulónu kuy ni kem ni anì hol ye getgama.”

Kmò yóm angat bud kesfulék yóm Ngà Tau

²⁴ “Timbow kogol yóm alì hlayam bè yóm kdaw yó,” mon Jisas, “angat là buden mnóng kdaw dalang se bulón.

²⁵ Angat le tódô btang gu bè longit yó kem blotik, ne là bud glolò le lesang le yó kem dumu mnóng gu bè longit.

²⁶ Ominen yó he angat gfan yóm Ngà Tau htuntun gu tta mung bè lobun. Angat ton le se yóm tey kfasangen ne yóm tey kegetahen.

²⁷ Ominen hewót yó kem gel hógówen gu bè longit mò na a semtifun yóm kdéen tau deng nélék Dwata bè klamangen benwu.”

Yóm gdalang tekuy bè koyu fig

²⁸ “Tódô henkna ye bè yó dém koyu fig,” mon Jisas. “Sok tmubed, ne nbuten mból dounen, ayawen sut bulónen mnóng kdaw.

²⁹ Senged snéen sok deng gotu gfan yóm kdê deng tulónu kuy ni koni, yó se ayawen yóm deng klonihen yóm ksutu.

³⁰ Bê ye klifót,” mon Jisas, “kesok sut ni kem deng tulónu kuy ni, tolo wen he bè ni kem tau kmoen ni gmafit mton du.

³¹ Angat tódô kmanas yóm longit dalang se yóm tonok. Okóm yóm dou udél,” mon Jisas, “là kóen na a kmanas.”

Eles ketgama yóm kkól Jisas

³² “Laen kô dù temngón du yóm kdaw angat kesfuléku,” mon Jisas, “duhen ke tedu urasen. Balù yó kem hógów Dwata gu bè longit, là kô tngón le du se kul. Dalang se do, là kô tngónu du. Tek són Mà bè longit temngón du.

³³ Yó gónóm mon, eles ye temgama, ne bê ye hlingay, abay se là kô tngón ye du yóm kdaw angat kkólu.

³⁴ Hol lómón yóm tau mógów ebè yóm sotu benwu mayuk. Gu laanen là deng lemwót, nan eles tulón yó kem tau mò nmò béléen yóm hmoen kul, yóm ket kul na sotu. Ne tulónen yóm tau fen mentey bè bak tikeb anì eles ningaten yóm kkólen.

³⁵ Senged se kuy,” mon Jisas, “hol ningat ye se kuy abay se là tngón ye du kkólen yóm fun gónô, ke deng sdef kdaw kkólen, duhen ke sóól buteng, duhen ke móyón mwas, duhen ke deng btù mata kdaw.

³⁶ Déke kulel kkólen yóm igò ye tolo tungô.

³⁷ Nim monu mò kuy ni,” mon Jisas, “tódô kdéen tau gónóhu e mon du, hol ye eles mingat.”