Mark 11 - Udél Dwata: Gna Kesfasad ne Lomi Kesfasad

Khódó le ke Jisas bè Jirusalim

¹ Ngang le Jisas mógów efet le moni bè Jirusalim. Móyón le sut bè yó kem lewu benwu lemnek boluyen Bitfid ne Bitani, nô lem henfek yóm Bulul Ulib. Ne hegna Jisas yóm lewu bè yó kem gel lemolò du,

² monen mò kul, “Mógów ye ebè tum benwu udì tuu. Sok ye kól ditu, angat wen ton ye ngà nati fét. Yóm ngà nati yó, laen kô deng gemsakay du. Tódô ntó ye, nit ye dou edini.

³ Ke wen tau smólók kuy, ‘Moen yó du ke ntó ye?’ yó mon ye mò du, ‘Wen muhen du yóm gónó tekuy mogot, bud kendel huléken he kun.’ ”

⁴ Tahu se, lemwót yó kem lewu hógówen yó koni. Tikóng le kól ditu, tódô ton le yóm ngà nati nô bè lan, deng fét le bè bak dól yóm gónô. Bè yóm któ le du,

⁵ mon yó se kem tau mdà bè yó, “Moen yó du ke ntó ye yóm ngà nati yó?”

⁶ Ne tulón le kul se yóm deng mon Jisas yó koni. Ne tahu se, tódô hlus le kul.

⁷ Omin le malak du ebè Jisas yóm ngà nati. Ne tódô afid le du nes le, ne hsakay le ke Jisas.

⁸ Ne tey dê bè yó kem tau mung ke Jisas, gotu nból le gu bè lan yó kem dumu nes le. Ne wen se bélê le ma doun koyu, gotu hasà le mulit lan mò gónó le hegfan yóm kadat le du.

⁹ Gotu le mensag yó kem tau tukô gna du ne yó kem fen huli du, mon le, “Hol dóyón tekuy dé Dwata. Dwata he hol tmóbóng du nim tau deng hógówen ni.

¹⁰ Dwata he tmóbóng du bè yóm angat kkamalen yóm tehe kun benwu nogot yóm tehe fù tekuy Dabid ekni. Hol dóyón tekuy dé Dwata.”

¹¹ Ngangen ne gefet bè Jirusalim Jisas, ominen hlós ebè yóm Gónô Dwata, ne husek elemen, gotu tenngelen kdê yó kem nmò le bè yó. Ominen bud lemwót mulék ebè Bitani, ne mung du yó kem sfolò lewu gel lemolò du, abay se deng móyón sdef kdaw.

Kudél Jisas yóm koyu fig

¹² Timbow hayahen bè yó, bud le lemwót gu bè Bitani le Jisas. Yóm tolo knóen bè lan, gnómen ne kbitilen.

¹³ Ne wen tonen sotu koyu gel ken bunguhen boluyen fig, deng bud lomi dmoun bede tolo mayuk udì bélê le. Omin Jisas mógów etu, nénégen ke wen bunguhen, okóm laen duen, hono doun, abay se là dengen kól bè yóm bulónen mungu.

¹⁴ Mung kudél Jisas ebè yóm koyu là munguhen yó, monen, “Nbuten ni ne là kói bud mungu.” Ne gungol yó se kem gel lemolò du yóm udélen ebè yóm koyu yó.

Klo Jisas yó kem tau hembalù lem Gónô Dwata

¹⁵ Timbow bud gdek bè Jirusalim Jisas, ominen hlós ebè yóm Gónô Dwata, ne tódô glohen yó kem tau bemli ne yó kem tau hembalù lemen. Yó nmoen, gotu lohen lu. Gotu lugoden yó kem lemisa yó kem tau gel lemuluk filak bè yó. Dalang se yó kem gónó le gel myón yó kem tau hembalù kfati, gotu lugoden.

¹⁶ Ne là bud hloloen du yó kem tau wen nwit le yóm lan gel hnahil lan le bè lósól yóm Gónô Dwata.

¹⁷ Ne wen toloken yó kem tau bè yó, monen, “Igò Dwata deng mon du bè Sulaten, ‘Yó muhen yóm dou Gónô mò gónó le gel mni ebéléu yó kem tau bè klamangen benwu.’ Okóm kuy,” mon Jisas, “deng mom nmò ye gónó le nô yó kem tau gel mnagaw.”

¹⁸ Ne gungol le se kul yó kem geta bè yó kem gel demsù ebè Dwata, ne yó kem tau gel tmolok hlau yóm deng nmò Jisas yó. Yó nmò le, mebel le lan le hmatay du, okóm likò le béléen, abay se tey tau wen gel hmungol du yóm ktoloken, ne tey kehtaw le du.

¹⁹ Timbow deng sdef kdaw, bud le lemwót le Jisas bè yóm syudad yó.

Yóm dnalang tekuy bè yóm koyu fig

²⁰ Hol hlafus bè yó, bud lan le Jisas mius bè yóm koyu fig ne ton le yóm deng sana kékéngen efet kól bè dolilen.

²¹ Tódô gtulón bè nawa Pitér yóm tehe kudél Jisas ebè yóm koyu yó, ne monen mò ke Jisas, “Ngem Sér, yóm koyu le henmulaem, deng sana mékéng.”

²² Ne mon Jisas se mò kul, “Hol ye hemtahu bè Dwata.

²³ Tódô tulónu kuy ktahuhen, ke là megewu kehtahu ye, ne ke hol nô bè nawa ye yóm angat kguta ye yóm hni ye, gbek ye tódô mdók nim bulul nii anì mdó bè ni ne mili elem mohin, kaem tódô nimónen yu.

²⁴ Yó gónóm mon, ke wen hni ye bè Dwata, hol hentahu ye yóm kguta ye du, kaem angat dohò se kguta ye du.

²⁵ Bè yóm gel kni ye bè Dwata, ke tolo mokol nawa ye yóm salaen bélê ye yóm sotu tau, yake tódô hol hnifót ye. Ke yó se nmò ye, angat hnifót yóm Mà tekuy bè longit se yóm kuy salà.

²⁶ Okóm ke là hnifót ye du, là se hnifót Mà tekuy du bè longit yóm kuy salà.”

Ksólók le yóm kwalis Jisas

²⁷ Ne bè yóm bud kkól le bè Jirusalim, bud le mógów ebè yóm Gónô Dwata. Bè yóm igò Jisas tolo bliwel lemen, gotu le mógów ebéléen yó kem geta bè yó kem gel demsù ebè Dwata, ne yó kem gel tmolok hlau, kkólen bè yó kem tuha gónó le gel galak yó kem Ju,

²⁸ ne mon le mò ke Jisas, “Yóm deng nmoem bè ni, wen kô kwalisem mò du? Tau du se bemlay kóm kwalis mò du?”

²⁹ Bnalà Jisas se lu, monen, “Wen se dou snólók bélê ye. Ke tngón ye balaen, tulónu kuy se yóm gónón lemwót yóm dou kwalis mò du yóm deng nmou bè ni.

³⁰ Tulón ye do kun. Bè yóm tehe gel kbabtays Jan yó kem tau, gónón lemwót de kwalisen mò du? Lemwót bè Dwata kô, duhen ke lemwót bè kem tau?”

³¹ Omin le stulón són lu yó kem tau smólók ke Jisas yó koni, mon le, “Mò kbalà tekuy du du? Ke mon tekuy lemwót bè Dwata, angat dô monen, ‘Mò ye là hemtahu du se?’

³² Bud là hyuhen se ke mon tekuy lemwót bè tau.” Yó gónó le mon du yóm yó, abay se likò le bè yó kem tau, yakà bè kul kehedem du hol tau tugod Dwata yóm Jan.

³³ Omin le malà ke Jisas, mon le, “Là tngón me du balaen yóm snólókem bélê me.” Ne bud mon Jisas se, “Ke là tngón ye du balaen yóm snólóku, là se tulónu du kuy gónón lemwót yóm dou kwalis mò du ni kem deng nmou ni.”