Mark 10 - Udél Dwata: Gna Kesfasad ne Lomi Kesfasad

Ktolok Jisas bè keskó tau syehen

¹ Bud lemwót Jisas bè yó, mlan elem yóm prubinsya Judiya, ne mifal yóm él Jurdan. Timbow kól fi fatu, ya tey tau tendo sbung ebéléen, ne gel tmolok bélê le snéen, lómón se yóm gel nmoen.

² Yóm knóen bè yó, wen kem Farisi mógów ebéléen, wen snólók le béléen mò dalil duón le du, mon le, “Là sideken bè hlau tekuy kô ke skó bè yehenen yóm logi?”

³ Bnalà Jisas se lu, monen, “Tedu se yóm monen bè hlau Musis?”

⁴ Mon le se, “Là sideken bè hlau Musis ke skó, syan ke wen sulat gónón fema yóm logi mò ilô yóm deng kkóhen du.”

⁵ Bnalà Jisas se, monen, “Yó gónó Musis smulat du yóm hlau yó lemwót bè yóm alì kgel tmolok kuy se.

⁶ Okóm bè yóm hol kbuten, bè yóm kedlimun Dwata yóm kdéen, yó monen bè Sulat Dwata, ‘Nmò Dwata yóm tau, logi ne libun.

⁷ Yó gónóm mon, gtagaken maen ne yéen yóm logi ne setnù le yóm kun tuha libun,

⁸ ne baling le ssotu yóm lewu le yó.’ Yó gónóm mon,” mon Jisas, “là kô le bud stólóng ne yó kem tau syehen, deng le baling ssotu ne.

⁹ Duhen yó, yóm deng kun sensotu Dwata, béen abay wen tau bud semkó kul.”

¹⁰ Timbow le bud husek elem gónô, snólók le bè Jisas yó kem gel lemolò du yóm sentulón le yó koni.

¹¹ Ne bnalà Jisas lu, monen, “Yóm tau ke kóhen tuha libunen, ne bud myehen dumu libun, deng ndaen ne yóm gna tuha libunen.

¹² Senged se yóm libun, ke kóhen tuha logihen, ne bud myehen dumu logi, deng ndaen ne yóm gna yehenen.”

Kni Jisas kul bè Dwata yó kem ngà lemnek

¹³ Wen se kem tau mit ngà ebè Jisas na le e tô hnok du. Okóm mom bnólów le lu yó kem gel lemolò ke Jisas.

¹⁴ Timbow ton Jisas nim nmò le ni, botong lenbuten lu, monen mò kul, “Heflós ye lu edini yó kem ngà yó, bê ye abay henseng lu. Abay se yó kem tau nogot Dwata, hol le mkél bè knawa ni kem ngà lómón ni.

¹⁵ Tódô tulónu kuy ktahuhen,” mon Jisas, “yóm tau ke là gtud nawahen ke Dwata lómón se yóm kul kegtud nawa yó kem ngà, là kóen na a gmung bè yóm kogot Dwata tau.”

¹⁶ Omin Jisas smiwi yó kem ngà, ket kul na sotu, ne nenoken lu, ne mni bélê le bè Dwata.

Yóm tau wen kendengenen

¹⁷ Timbow le deng bud tô lemwót le Jisas, wen sotu tau mlóy ebéléen, tódô tuden bukolen bè soluhen, ne monen mò du, “Ó Sér, uu se yóm tau hyu kmoen. Wen tô snólóku béléem. Tedu de tô nmou du anì gutahu yóm klowil laen dù sónen?”

¹⁸ Ne mon Jisas se mò du, “Moen de ke monem mò dou, ‘Tau hyu kmoem?’ Laen kô dù dumu hyu kmoen, tek són Dwata.

¹⁹ Deng tngónem se yó kem hlau Dwata, yóm monen, ‘Béi monok. Béi mdà yehen. Béi mnagaw. Béi tmifù kéng. Béi lemugi. Nadatem maem ne yéem.’ ”

²⁰ Ne mon yóm tau smólók ke Jisas yó koni, monen, “Tódô mbut bè yóm hanà kegenu ngà, Sér, laen kô deng gel nuléhu du se dou ni kem hlau Dwata ni.”

²¹ Yóm ketngel Jisas ebéléen mom gkoduhen, monen mò du, “Sotu he duen tolo gónóhem là deng sikof. Tu ne muléki, nam e hbalù yóm kdê nô béléem, ne blayem bè tu kem tau élél yóm blihen, ne angat wen tey kendengenem bè longit. Lemwót yó dum kóm, loloem o.”

²² Timbow gungol nim tau ni koni yóm udél Jisas ebéléen, tódô dilô lem uyóhen yóm tey sidek keblat nawahen. Tódô mulék igò yóm tey sidek kegnómen du, abay se tey wen kendengenen.

²³ Omin Jisas temngel ebè yó kem gel lemolò du, ne monen mò kul, “Tey mgel bè yóm tau wen kendengenen ke tô hogoten ke Dwata yóm klowilen.”

²⁴ Tey ketnga le du yó kem gel lemolò du yóm monen yó. Okóm bud mon Jisas, “Tey mgel, kem Wè, ke tódô tô hogoten ke Dwata klowilen yóm tau.

²⁵ Mom mahil bè yóm kamél ke hfusek tekuy bè yóm sol dalum, olo yóm tau wen kendengenen, tey mgel béléen ke tô hogoten ke Dwata klowilen.”

²⁶ Bè yóm kmon Jisas du yóm yó, deng mom bud sidek ketnga yó kem gel lemolò du, stulón le són lu, mon le, “Ke lómón yó, tau du de gembek gemwa du yóm klowil laen dù sónen?”

²⁷ Temngel ebélê le Jisas, monen, “Ke bè tau, là gbeken du. Okóm bè Dwata, laen dù là gbeken du.”

²⁸ Mudél se ke Pitér kun, monen, “Ngem ni dém mi, Sér, glok me tódô gemtagak yóm kdéen lan me lemolò kóm.”

²⁹ Ne mon Jisas se mò kul, “Tódô tulónu kuy ktahuhen, ke deng gloken gemtagak gónóen yóm tau, ne yó kem dumuhen setwoli, kólen bè yó kem tuhahen, ne yó kem ngaen, duhen ke tonoken lanen lemolò do ne lanen hból du yóm Tulón Hyu,

³⁰ angat tey wen blay Dwata du bè nim klowilen te tonok ni. Botong bud lematu duléken he bud hulék du ebéléen yóm deng gtebelen, yóm gónóen ne kem dumuhen setwoli ne kem yéen ne kem ngaen ne tonoken. Okóm nan gel wen gónóhen glayam bè yó kem tau là hemtahuhen. Bede hulin kdaw, angat gutahen yóm klowil laen dù sónen.

³¹ Okóm bè yóm kdaw yó, angat tey dê bè yó kem tau deng gegna nim kmoen ni, angat le bud ghuli. Ne yó kem tau ghuli nim kmoen ni, angat le bud gegna bè yóm kdaw yó.”

Yóm getlu dulék Jisas tmulón du yóm angat katayen

³² Bè yóm ksubô le ebè Jirusalim le Jisas ne yó kem gel lemolò du, fen tukô gna kul Jisas. Ne tey ktafa nawa le du yó kem gel lemolò du, lel le likò yó kem dumu tau huli kul. Omin Jisas bud mit kul htólóng yó kem sfolò lewu gel lemolò du, tulónen kul yóm angat nmò le béléen.

³³ “Ngem nim kógów tekuy ebè Jirusalim ni,” monen, “sok kuy kól ditu, angat eted le yóm Ngà Tau elem tdok yó kem geta bè yó kem gel demsù ebè Dwata ne yó kem tau gel tmolok hlau. Yó angat kukum le du, hatay. Ne angat blay le elem tdok yó kem tau sundu Ju du.

³⁴ Tey angat kehlowon le du, ne lel le semdulak du, ne angat nfes le, ngangen efet hnatay le. Bede bè getluhen kdaw, angat bud mowil.”

Yóm tô hni le Jim ne Jan bè Jisas

³⁵ Timbow kogolen bè yó, sut le bè Jisas yó kem lewu tau setwoli Jim ne Jan, ngà Sibidi, mon le mò du, “Ó Sér, wen tô hni me béléem.”

³⁶ Mon Jisas se, “Tedu de?”

³⁷ Mon le se, “Ke hyu béléem, Sér, bè yóm angat kegetahem bè yóm kogotem benwu, kóyô me ke sotu bélê me myón bè kwananem ne sotu se myón fi bè iwóngem.”

³⁸ Mon Jisas se mò kul, “Là kô tngón ye du yóm hni ye yó. Gbek ye hembala du kô ke yu gemfà du yóm angat hlayamu, ne yóm angat hatayu?”

³⁹ Mon le se, “Gbek me.” Mon Jisas, “Tahu se, wen kdawen nmò le bélê ye lómón yóm angat nmò le béléu.

⁴⁰ Okóm laen dù kwalisu mélék du yóm tau angat myón fi bè kwananu duhen ke fi bè iwóngu. Dwata se mò du yóm yó. Deng wen eles néléken mò angat hyónen bè yó.”

⁴¹ Timbow gungol yó kem sfolò tau gel dumu le lemolò ke Jisas yóm tô hni le Jim ne Jan, ya tey sidek kebut le kul.

⁴² Omin Jisas gotu bud semtifun kul, ne monen mò kul, “Deng hónô tngón ye se kul kmò yó kem tau hol geta talak tonok, tey gel kdansók le yó kem tau nogot le. Ne yó kem tau mogot kukum, tey gulé kwit le yóm kukum nogot le.

⁴³ Okóm bélê ye kuy,” mon Jisas, “là kô yó du yóm hyu bélê ye. Ke wen sotu bélê ye móyô ke du geta bè kem dumuhen, yake hol nô béléen yóm nawa yóm tau gel heklifen.

⁴⁴ Ne ke wen bélê ye móyô ke du hol lemyu bè kem dumuhen, yake hol nô béléen dé yóm nawa yóm tau gel heklifen anì hol heklifen bè kem dumuhen.

⁴⁵ Yakà lómón ni du yóm kun nmò yóm Ngà Tau. Là kô yó du nógówen edini ke fen na a hdatù bè kem tau. Okóm yó nógówen mò fen tmóbóng kul, hamaen klowilen mò msok yó kem tey tau wen gu lem hatay.”

Kehton Jisas yóm sotu tau butô boluyen Bartimiyus

⁴⁶ Ngangen ne kól le bè Jiriku le Jisas ne yó kem gel lemolò du. Timbow le bud lemwót bè yó, tey tau wen mung kul. Wen sotu tau butô myón bè kilil lan, sónmoen gel temfólól bè yó kem tau gel mius. Yó boluyen Bartimiyus, ngà Timiyus.

⁴⁷ Timbow gungolen yóm klan Jisas bè yó, yóm Jisas lemwót bè Nasarit, tódô henmungen tmaba, monen, “Ó Jisas, sfu tehe Dabid, hol knoduhem o.”

⁴⁸ Okóm deng mom senbólów yó kem tau bè yó, mon le mò du, “Béi hebnes tmaba.” Bede mom hennolien tmaba, “Ó sfu tehe Dabid, hol knoduhem ou.”

⁴⁹ Timbow gungol Jisas yóm tabahen tódô hegsud mdà, ne monen, “Tnaba ye edini kun.” Tahu se tnaba le, mon le, “Mdai, tnabahen uu. Hyu nawahem ne yó.”

⁵⁰ Tódô kóhen legmoten yóm tau butô yó, ne hebkó mdà, mógów ebè Jisas.

⁵¹ Mon Jisas mò du, “Tedu de yóm hmoem dou?” Mon yó sem tau butô yó, “Htonem ou, Sér.”

⁵² Mon Jisas se mò du, “Yó ne, lemwót bè yóm kehtahuhem béléu, yó gónóm bud mton. Lemwóti ne.” Ne tahu se, tódô sen-gengen se bud mton yóm tau butô yó, ne tódô loloen Jisas.