Malakay 2 - Udél Dwata: Gna Kesfasad ne Lomi Kesfasad

Yóm eles hetgama Dwata yó kem tau gel semblóng tau ebéléen

¹ “Duhen ni,” mon yóm Dwata laen dù là gbeken du, “wen hlauhu kuy, yu kem tau gel semblóng tau ebéléu.

² Ke là hnungol ye du yóm monu mò kuy ni ne ke là sù ye du bè nawa ye yóm kadat ye do, angat wen tey tafak sidek hwitu ebélê ye. Balù yó kem dsù gel nwit kem tau ebélê ye mò lowil ye, bud gomong megtafak. Bè ktahuhen, deng tlesu du tafak yóm kdê hyu gel blayu kuy abay se là nóen bè nawa ye madat do.

³ Yó kmò ktafaku kuy là kô ye bud mból, laen kô dù bud ngà ye. Ne angat gotu tudau elem uyó ye kê yó kem ógóf gel dsù ye ebéléu ne mung botu yu e desenfól.Omin ye yó he temngón du ou se deng hlolò du kuy yóm dou hlau anì laen dù sengen yóm deng tehe senfasad me yó kem sfu Libay, duhen yóm kehlós yóm keseblóng le kem tau Israél ebéléu. Ke tódô bayau yóm kmò ye sidek, là gbeku du ke là genbau du yóm tehe senfasad me yó,” udél yóm Dwata laen dù là gbeken du.

⁴ “Omin ye yó he temngón du ou se deng hlolò du kuy yóm dou hlau anì laen dù sengen yóm deng tehe senfasad me yó kem sfu Libay, duhen yóm kehlós yóm keseblóng le kem tau Israél ebéléu. Ke tódô bayau yóm kmò ye sidek, là gbeku du ke là genbau du yóm tehe senfasad me yó,” udél yóm Dwata laen dù là gbeken du.

⁵ “Yó lemen yóm tehe senfasad me yó kem sfu Libay, duhen yóm kwen klowil le ne kenek nawa le ne ni se yóm deng tehe blayu kul. Ne yó tehe hendónu bélê le ke nadat le ou. Ne tahu se, tey tehe kadat le dou ne wen klikò le yóm dou boluy.

⁶ Gotu tulón le bè yó kem tau yóm ktahuhen lemwót béléu. Laen dù kéng nmò le. Tey tilob klolò le do, hono hyu ne hono tedeng yóm gel nmò le. Tey dê tau tnóbóng le anì knogol le yóm sidek.

⁷ Yó kem tau gel blóng ebéléu, hyu ke hol tngón le yóm dou kóyô ne ke hol tolok le bè yó kem tau. Ke wen tau móyô temngón du yóm hlau Dwata bélê le gónón smólók, abay se lu hógów yóm Dwata laen dù là gbeken du.

⁸ Okóm kuy, kem tau blóng ebéléu nim kmoen ni, tey tólóng se yóm kuy kmò. Deng knogol ye yóm tahu lan. Ne lemwót bè yóm sekban gel tolok ye, tey dê tau nwit ye elem salà. Deng genbà ye yóm tehe senfasad me yó kem sfu Libay,” udél yóm Dwata laen dù là gbeken du.

⁹ “Duhen yó, lemwót bè nim deng nmò ye ni, angat heglaanu yu bè solu yóm kdéen tau Israél ne angat kenhisik le yu lemwót bè yóm là kimón ye yóm dou kóyô. Ke gel ye kmukum là tedengen, sal wen nfi ye,” udél Dwata ebè yó kem tau mò blóng tau ebéléen.

Là kteneb le lemolò ke Dwata yó kem tau Juda

¹⁰ Là tek sotu du kô yóm Mà tekuy kem tau Juda? Là tek sotu du kô yóm Dwata tehe mifil tekuy? Na ke lómón yó, moen de ke deng mom nulé tekuy yóm deng senfasad tekuy? Moen de ke deng mom genbà tekuy yóm tehe kesfasad le Dwata yó kem tehe fù tekuy?

¹¹ Tekuy kem tau Juda, deng mom nulé tekuy yóm tehe kesfasad tekuy bè Dwata. Bè yó bè Israél ne bè Jirusalim yó nmò yó kem tau Juda, deng le mom myehen bè yó kem tólóng libun hemtahu bè dwata kéng. Yóm nmò le yó, deng mom gholu le yóm kun Gónô Dwata yóm Gónô alì kenbong nawa Dwata.

¹² Yóm tau mò du yó, Dwata he hol mkó du lem blóng yó kem tau Israél yóm tau lómónen yó nmoen. Là buden hyu ke bud wen nwiten se kun mò blayen ebè yóm Dwata laen dù là gbeken du.

¹³ Bud sotuhen, tey gel kkik ye ta yóm gónó gel demsù ebè Dwata, dnumu nkik ye yóm là kehmóyô Dwata yóm gel blay ye du ne yóm là kehligalen du yóm lemwót lem hólól ye.

¹⁴ Sal gel mon ye, “Moen de ke là henmóyô Dwata du yó kem gel blay me du?” Yó gónón là hemmóyô du abay se bè yóm tehe kyehen ye bè yóm hanà klomi ye tau, tehe nô bè yó se Dwata fen temksì du yóm deng senfasad ye yóm libun yehen ye, yóm libun deng ndà ye nim kmoen ni, igoen lu yóm mò dumu ye sbalà, deng dumu ye sfasad.

¹⁵ Dwata se deng tehe semsotu kuy yóm libun yehen ye. Yóm lówó ye ne lóyóf ye ke Dwata funen. Yó mu Dwata du yóm kesyehen ye anì wen kem ngà ye mò bud lemolò yó kem hloloen kuy. Yó gónóm mon, hol ye eles temgama, tódô ye hol hteneb bè yóm kuy tahu yehen lemwót bè klomi ye tau.

¹⁶ Yó udél yóm Dwata yó kem tau Israél, monen, “Tey kutó nawahu du yóm tau skó bè yehenen. Yóm kehdes logi nawa yóm yehenen, tey kutó nawahu du. Yó gónóm mon, hol ye eles temgama, tódô ye hteneb bè yóm hol kuy tahu yehen,” udél yóm Dwata laen dù là gbeken du.

¹⁷ Deng tey kehtakas ye ke Dwata bè yó kem gel udél ye. Déke snólók ye, mon ye, “Udél du du gónó me deng htakas ke Dwata?” Yó udél ye htakas ke Dwata yóm gel kmon ye du, “Moen de ke tódô bayà Dwata lu yó kem tau gel mò sidek, là kô dog tnafaken kul? Nô se du yóm Dwata tedeng kkukumen?”