Malakay 1 - Udél Dwata: Gna Kesfasad ne Lomi Kesfasad

Kbong nawa Dwata yó kem tau Israél

¹ Ni se udél yóm sana Dwata hol gónó mogot ebè yó kem tau Israél hlanen bè Malakay yóm tugoden.

² Yó monen, “Tey kbong nawahu kuy lemwót bè kbuten.” Okóm mom yó balà ye du, “Gónóm deng hegfan du de yóm kbong nawam kum?” Ne yó balà Dwata kuy, monen, “Yóm Jakub ne Iso segeng ksut le. Okóm tey kbong nawahu ke Jakub kun yóm kuy fù dalang se yó kem lugoden.

³ Fen là ke Iso ne yó kem lugoden, laen dù nawahu ebélê le. Ne yóm kul bulul gónó nô boluyen Idom deng tódô sulék genbau, henbalingu benwu là hyu menwu du mò gónó le nô yó kem ohu lem bnes,” yó se udél Dwata.

⁴ Ke yó udél yó kem sfu Iso bè Idom, ke mon le, “Baluen ke deng gotu gbà yóm benwu tekuy, bud tenlob tekuy yó kem deng gbà.” Okóm ni se udél yóm Dwata laen dù là gbeken du, monen, “Ke bud hdà le, angat bud genbau he. Yó angat boluy kem tau du yóm kul benwu, ‘Benwu hono sidek gel nmò kem tauhen.’ Yó gónóm mon, laen dù tul sónen yóm kebut Dwata kul.”

⁵ Yó bud udél Dwata ebè yó kem tau Israél, monen, “Angat hol kuy mata se mton du yóm kegbau yóm benwu Idom. Bè yóm kton ye du, botong mon ye, ‘Tey bong mfasang yóm sana kut Dwata hol gónó mogot, tódô gefet sentu benwu tekuy yóm tey kfasangen.’ ”

Yóm dsù là knóónen bè Dwata

⁶ Yó udél yóm Dwata laen dù là gbeken du ebè yó kem tau gel blóng ebéléen, monen, “Hol gel nadaten maen yóm ngà ne yóm tóbóng lówó hol gel wen klikoen yóm amohen. Igoen ou mà ye, moen de ke là nadat ye dou? Igoen ou se gónó ye mogot, moen de ke laen dù klikò ye dou? Yu kem tau blóng ebéléu, yu se yóm deng hemgnok do.” Okóm mom yó mon ye mò dou, “Tedu de deng gónó me hemgnok kóm?”

⁷ Yó balà Dwata kul, monen, “Deng hen-gnok ye ou lemwót bè yóm kedsù ye yóm dsù là mólósen bè yóm dou gónó demsù.” Omin ye mon du, “Tedu deng nmò me gónón là mólós yóm dsù me?” Mon Dwata se, “Yó gónón là mólós yóm dsù ye ebéléu lemwót bè yóm là kadat ye dou.

⁸ Knóón béléu kô yóm kedsù ye ebéléu yó kem ógóf butô ne yó kem ógóf tugô ne yó kem ógóf wen desen? Tilów blay ye ebè gubérnor ye dé kun yó kem ógóf wen óngó le yó, hnénég ke hligal du ne ke wen blayen kuy,” udél yóm Dwata laen dù là gbeken du.

⁹ “Duhen ni, kem tau mò blóng ebéléu, tilów ye hkodu béléu nénég ke knoduhu yu. Ke lómón yó yóm gel blay ye do, henmóyóu yu kô? Là kô naw e henmóyô kuy,” udél yóm Dwata laen dù là gbeken du.

¹⁰ Yó bud udélen, “Hyu béléu ke wen sotu bélê ye mlos tmikeb du yóm bak dól yóm dou Gónô anì laen dù tau bud hbong ofi bè yó mò hkekeb yóm dsù laen dù muhen. Balù udì ke wen gónóhu hligal bélê ye. Là kô naw e henmóyô du yó kem gel blay ye ebéléu,” udél yóm Dwata laen dù là gbeken du.

¹¹ “Okóm yó kem tólóng tau bè dumu benwu, tódô lenwóten bè yó kem benwu fi dmata kdaw kól bè yó kem benwu fi desdef, tey kadat le du yóm dou boluy. Tódô keten benwu wen gel hboo le ebéléu yóm alì tilob boohen ne dsù le ebéléu yóm dsù alì knóón béléu,” udél yóm Dwata laen dù là gbeken du.

¹² “Okóm kuy, kem tau Israél, tey tólóng. Gfan bè yóm dsù ye yóm là kadat ye do. Yóm kwit ye yóm dsù là knóónen béléu, yó se gónón gfan yóm là kebtesen bélê ye yóm dou gónó demsù.

¹³ Yó gel mon ye, ‘Tey mgel bélê me lemolò du yóm dê hlolò Dwata ni,’ ne deng ye meklit lemolò yóm dou hlau,” udél yóm Dwata laen dù là gbeken du. “Ngem, deng mom dsù ye ebéléu yóm ógóf hennagaw ne ógóf tugô ne ógóf wen desen. Henmóyóu kô yóm ógóf lómónen yó? Là kô naw e henmóyô du,” mon Dwata.

¹⁴ “Yóm sotu tau, ke deng hol fasaden dou yóm keblayen du do yóm hol hyu bè yó kem ógófen, okóm mom yó blayen do yóm ógóf wen óngóhen, yóm tau mò kéng yó deng hol tahu golu elem hatay. Kiholen mò du béléu yóm yó, igoen ou se yóm hol geta bè kdéen ne gotu le likò dou yó kem tólóng tau bè dumu benwu,” udél yóm Dwata laen dù là gbeken du.