Lista 36 - Udél Dwata: Gna Kesfasad ne Lomi Kesfasad

Yóm hlolò Musis bè yó kem libun wen tonok nfun le

¹ Sotu kdaw mógów le ebè Musis ne ebè yó kem dumu tuha gónó le galak yó kem fes lówó bè kun ktol Gilyad, hono kem tau semfu gu bè Makir ngà Manasi. Yóm Manasi, du se sotu ngà yóm tehe Jusif.

² Yó mon le mò kul, “Deng mon Dwata mò kuy yu fen mólól du bè yó kem tau Israél yóm tonok Kanan, bede hlan ye bè ilô yóm kólól ye du. Bud mon Dwata mò kuy snéen, lemwót bè yóm klaen dù ngaen logi yóm sotu dumu ye boluyen Silufihad, hol blay ye bè yó kem ngaen libun yóm kun tonok.

³ Okóm ni mò knukum ye, ke myehen le bè yó kem dumu ktol Israél ni kem ngà libun ni, yóm tonok nfun le bud temnù bè kul tonok tu kem dumu ktol Israél yehen le. Ke yó se kmoen, là buden lamang yóm kum tonok.

⁴ Bè yóm halay bud gel khulék le du bè yó kem fun le yó kem tonok tehe blay le, lemwót yóm kul tonok nfun yó kem ngà Silufihad libun, bud tnù le bè kul tonok yó kem dumu ktol Israél yehen le ne hlós kul funen, là bud kum du.”

⁵ Duhen yó, tulón Musis yó kem tau Israél yóm hlolò Dwata kul bè nim ni, monen, “Tahu se yóm mon yó kem sfu Manasi.

⁶ Ne yó mon Dwata, kihu kul kóyô yehen yó kem ngà Silufihad libun, syan ke hol logi lemwót bè yóm kul ktol.

⁷ Yóm kul tonok nfun yóm ket tau Israél hol tódô hlós nfun yó kem kul ktol.

⁸ Ket libun Israél mfun tonok hol myehen bè yóm kul ktol. Bè nim nmò le ni, tódô ket tau Israél gemfun bè yóm tonok yó kem kul tehe fù.

⁹ Ne yóm tonok le yó, là kóen tlek mlan bè yóm sotu ktol tau Israél. Ket ktol tau Israél, tódô hlós nfun le yóm kul tonok.”

^10-11 Tahu se, tódô lolò yó kem ngà Silufihad libun yóm deng mon Dwata hlanen bè Musis. Yó boluy le Mala ne Tirsa ne Hugla ne Milka ne Nuwa ne myehen le bè yó kem kul dumu setwoli.

¹² Myehen le bè kun ktol Manasi, yóm Manasi ngà yóm tehe Jusif. Ne yóm tonok le, sana knóen bè boluy Manasi yóm gónón gu semfu mà le.

¹³ Yó se yóm hlolò Dwata yó kem tau Israél hlanen bè Musis bè yóm knô le bè datal Muab sendini Él Jurdan ne fatuhen yóm syudad Jiriku snakuf Kanan.