Lista 33 - Udél Dwata: Gna Kesfasad ne Lomi Kesfasad

Yóm hlolò Dwata yó kem tau Israél

⁵⁰ Bè yóm igò le kmamfù yó kem tau Israél bè yó bè datal Muab moni bè Él Jurdan, fatu yóm syudad Jiriku snakuf Kanan

⁵¹ wen hlolò Dwata kul hlanen bè Musis, monen, “Ke deng nifal ye yóm Él Jurdan bè yóm kógów ye ebè Kanan

⁵² hol gotu lo ye lu yó kem tau nô bè yóm benwu yó. Gotu genbà ye yó kem dwata kéng gel nmò le bè botu ne bè yó kem dumu gel tenwél le. Gotu genbà ye snéen yó kem gónó le gel tmaba ebélê le.

⁵³ Nwa ye yóm tonok Kanan ne henek ye nô tahen abay se ni yóm tonok blayu kuy mò gónó ye hlós nô.

⁵⁴ Sensólól ye yóm tonok yó bè ket ktol tau Israél, bede hlan ye bè yóm ilô nmò ye mò gónó ye temngón du gónón seblà yóm kun tonok yóm sotu ktol Israél. Ke alì wen yóm kun ból yóm sotu ktol, hbong ye yóm tonok blay ye kul. Ne bè yóm tau là hol le wen olo ye bemlay kul yóm sfeng bélê le.

⁵⁵ Okóm ke là gotu lo ye kul yó kem tau nô ta yóm tonok yó, ngem yó kem dù tebel bélê le, hol lómón ke huling nô lem mata ye ne lómón ke sual tendo tembek bè lówó ye, senflós le sembeweg kuy.

⁵⁶ Ke là gotu lo ye kul, gotu genlau yu lómón yóm keglau kul.” Là gomongen bè nili yóm tsaptér 34. Hono boluy yó kem benwu gónón gkilil yóm tonok blay Dwata yó kem tau Israél ne hono boluy yó kem tau deng nélék Dwata mò semsólól du bélê le yóm tonok Kanan. Là gomongen bè nili yóm tsaptér 35. Hono boluy yó kem syudad gónó le nô yó kem sfu Libay ne boluy yó kem syudad deng hetfing le mò gónó le e mlóy yó kem tau wen ghatay le, yóm là lenbù nmò le du.