Lista 32 - Udél Dwata: Gna Kesfasad ne Lomi Kesfasad

Yóm benwu fi dmata kdaw yóm Él Jurdan

¹ Yó kem ból yóm tehe ngà Jakub boluyen Rubén ne Gad, tey genged kem ógóf le. Timbow ton le yóm tey kehyuhen bè yó kem safì le yóm tonok Jasér ne yóm tonok Gilyad

² yó nmò le, mógów le ebè le Musis ne bè Ilisar ne bè yó kem dumu tuha malak kul, mon le,

^3-4 “Nim tonok lamang ni gónó Dwata tmóbóng tekuy kem tau Israél anì nô tekuy tahen, wen yó kem benwu lemnek nô lemen boluyen Atarot ne Dibun ne Jasér ne Nimra ne Hisbun ne Ilyali ne Sibma ne Nibu ne Biun. Yóm klamang nim tonok ni, hono hyu bè yó kem ógóf ne tey wen se kem kum ógóf.

⁵ Ke yóm hyu bélê ye, hol blay ye kum nim tonok lamang ni mò kum nfun ne bê ye dog bud hifal mi efatu Él Jurdan ne.”

⁶ Yó balà Musis kul, monen, “Yó kô kóyô ye ke tô ye tebel bè ni igò le mung bè gida yó kem dumu ye?

⁷ Tey nim yu. Olo ye sembeweg kehedem yó kem dumu ye Israél anì là nifal le du yóm Él Jurdan ne là mógów le etu bè yóm tonok deng blay Dwata kul.

⁸ Nim nmò ye ni, lómón ni se yóm tehe nmò yó kem tuha ye bè yóm tehe kehewótu kul gu bè Kadis Barniya na a hemkana yóm benwu Kanan.

⁹ Bè yóm kehkana le, ngang le mò du mógów efet le kól bè Datal Iskol ne ton le yóm benwu Kanan. Okóm bè yóm kesfulék le, deng mom senbeweg le nawa yó kem tau anì là mógów le ebè yóm tonok deng blay Dwata kul.

¹⁰ Bè yóm kdaw yó, tey kebut Dwata kul, yó gónón mon du,

¹¹ ‘Là kóen bud mulék elem baku nim udélu ni. Lemwót bè yóm là kimón le do, laen dù bè yó kem logi tehe lemwót gu bè Idyip deng lewu folò halayen duhen ke deng mukas, ke gógów edu yóm tonok deng tehe fasadu kul le Abraham ne Isak ne Jakub.’

¹² Nim mon Dwata ni, tódô kdéen logi gotu gomong lemen. Són là gomongen són Kalib yóm ngà yóm tau Kinisayt boluyen Jifuni ne Juswa yóm ngà Nun. Yóm lewu le yó, tódô hotu le nawa le mimón ke Dwata.

¹³ Okóm yó kem dumu tau Israél, tey sidek kebut Dwata kul. Yó gónón htabag kul lem yóm benwu laen hol wen tauhen glem yóm fat folò halayen efet le gotu matay yó kem tau hefebut du bè yóm kdaw yó.

¹⁴ Ne ni, yu bud temles mò du yóm sidek tehe nmò yó kem tuha ye. Yu kem lomi tau nim kmoen ni, tô bud nmò ye yóm gónó Dwata bud lembut yó kem tau Israél.

¹⁵ Yu kem sfu Rubén ne sfu Gad, ke là móyô ye mimón ke Dwata ni, ngem bud tódô bayà Dwata lu lem yóm benwu laen hol wen tauhen ni kem tey tau Israél ni ne hbóen kuy yóm keglà le.”

¹⁶ Omin le hloni ebè Musis yó kem tau stulón du yó koni ne mon le mò du, “Là, Sér. Ke hyu béléem, hlusem mi anì eles me mò yó kem kukub nbeng botu bè yó kem ógóf me mò gónó le nô ne bud me eles mò beng hilol yó kem benwu gónó le nô yó kem fes lówó me.

¹⁷ Omin me yó mung bè yó kem dumu me Israél bè yóm kesgida le, tódô me tukô gna kul efet le henek bè yóm tonok hlós nfun le. Okóm bè yóm igò me mógów, deng le eles nô bè ni bè yóm benwu mbegel bengen yó kem fes lówó me anì laen dù hemen le bè yó kem dù tau tolo nô bè nim benwu ni.

¹⁸ Là kô me tagad mulék ebè gónô me ke là deng le henek se kul ta yóm tonok kul nfun yó kem dumu me Israél.

¹⁹ Ne là kô me na a bud gbót ma bè yóm kul tonok fi fatu Él Jurdan abay se deng wen yóm kum ólól bè ni bè fi dmata kdaw yóm Él Jurdan.”

²⁰ Yó balà Musis kul, monen, “Ke hol tahu se yóm udél ye yó ne ke deng ye eles htifes mung bè yóm kesgida Dwata

²¹ ne ke tódô kdê yó kem sendalù ye, gotu le mifal Él Jurdan ne mlan bè yóm kalak Dwata kuy nundug ye lu yó kem hohon tekuy efet gemmò bélê le Dwata

²² ne gwahen yóm tonok le, omin ye yó he mulék abay se deng dnohò ye yóm snolu ye bè Dwata ne bè yó kem dumu ye tau Israél. Ne bè yóm kdaw yó angat hfun Dwata kuy nim tonok nô fi dmata kdaw Él Jurdan ni.

²³ Okóm ke là dnohò ye du yóm fasad ye ni, eles tulónu kuy bè Dwata gónó ye gemsalà. Là hewuhem du, Dwata angat tmafak kuy lemwót bè yóm salà ye yó.

²⁴ Yó ne, hdà ye sen yóm ngà benwu ye ne mò ye kukub nbeng botu mò gónó ye hemsù yó kem ógóf ye, okóm hol dnohò ye yóm deng fasad ye.”

²⁵ Ne yó udél le ebè Musis yó kem sfu Gad ne sfu Rubén, mon le, “Nmò me, Sér, yóm monem mò kum yó.

²⁶ Yó kem yehen me ne yó kem ngà me ne yó kem safì me ne ubiha me, fen le tebel bè ni kul bè ni kem benwu lemnek nô lem nim tonok Gilyad ni.

²⁷ Okóm yóm kdê me, deng me eles htifes bè yóm angat kmung me sgida bè yóm kalak Dwata kum. Angat nifal me yóm Él Jurdan ne mung me bè gida lómón yóm deng monem.”

²⁸ Duhen yó, wen hlolò Musis kul le Ilisar ne Juswa ne yó kem dumu tau malak bè Israél, monen,

²⁹ “Ke nifal yó kem sfu Gad ne sfu Rubén yóm Él Jurdan anì na le e mung sgida mlan bè yóm kalak Dwata kul ne ke gwa ye yóm tonok mlan bè yóm kmung le bélê ye, hol blay ye kul yóm tonok bè Gilyad mò kul nfun.

³⁰ Okóm ke là nifal le du yóm Él Jurdan ne ke là dog le mung kuy sgida, olo ye bemlay kul yóm kul ólól bè tonok Kanan lómón yóm kuy.”

³¹ Yó balà le ke Musis yó kem sfu Gad ne sfu Rubén, mon le, “Là gbek me du, Sér, ke là nmò me du yóm deng hmò Dwata kum.

³² Lemwót bè yóm kalaken kum angat me mifal etu bè Kanan ne me e mung bè sgida anì hlós kum funen nim tonok fi dmata kdaw Él Jurdan ni.”

³³ Tahu se, gotu sù Musis bè yó kem sfu Gad ne sfu Rubén ne sóól bè yó kem sfu Manasi yóm klamang yóm tonok tehe nogot Sihun yóm tau hol geta bè yó kem tau Amurayt, ne yóm klamang yóm kun tehe nogot Ug yóm tau hol geta bè Basan. Gomong blayen kul snéen yó kem benwu lemnek hmilol kul. Là gomongen bè nili yóm bérs 34 efet kól bè bérs 42. Hono boluy yó kem benwu bud hdà yó kem sfu Gad ne sfu Rubén ne sfu Manasi bè yóm knô le bè yó kem benwu fi dmata kdaw Él Jurdan.