Lista 31 - Udél Dwata: Gna Kesfasad ne Lomi Kesfasad

Keglà kem tau Midyan

¹ Omin Dwata mon du mò ke Musis,

² “Bneles ye yóm nmò yó kem tau Midyan bè yó kem tau Israél lan le mit kul tmaba ebè yó kem kul dwata kéng. Sok deng yóm kesgida ye yó, ominem yó he matay.”

³ Duhen yó, mudél Musis ebè yó kem tau Israél, monen mò kul, “Mélék ye tau mò gmida yó kem tau Midyan abay se bneles Dwata yóm deng nmò le bè yó kem tau Israél.

⁴ Hógów ye ket lemibu tau lemwót bè ket ból yó kem tau Israél mò mung bè gida.”

⁵ Tahu se, ket lemibu lemwót bè ket ból tau bè Israél, setnù kdê le sfolò lewu libu yóm kdê le deng le eles htigel mung bè gida.

⁶ Omin Musis hewót kul ket lemibu lemwót bè ket ból bè Israél. Yó fen malak kul, Finihas yóm ngà Ilisar, yóm tau blóng le ebè Dwata. Wen kem kimu Dwata eles nwit Finihas lemwót lem yóm Gónô Dwata ne wen kem féw nwit le mò ilô kbut le du yóm kesgida le.

⁷ Tódô gotu nundug le yó kem tau Midyan lómón yóm deng eles mon Dwata mò ke Musis. Gotu hnatay le kdéen logi.

⁸ Gomong hnatay le yóm limu kem tau hol geta bè yó kem tau Midyan, yó boluy le Ibi ne Rékém ne Sur ne Hur ne Riban. Hnatay le se Balaam kun yóm ngà Biyur, tnibó le kmò le du.

⁹ Gotu negef kem sendalù Israél yó kem libun Midyan ne yó kem ngà le kkólen bè yó kem safì le ne kem ubiha le. Ne gotu nuku le yó kem kendengen le.

¹⁰ Gotu ntem le yó kem syudad le ne yó kem gónó le gel kmamfù.

¹¹ Timbow deng gotu sentifun le yó kem deng negef le gomong lemen tau ne kem ógóf,

¹² gotu nwit le lu ebè Musis ne ebè Ilisar, yóm tau blóng le ebè Dwata ne ebè yó kem tau Israél kmamfù bè Datal Muab moni bè Él Jurdan sendifal yóm syudad Jiriku.

Kesfulék yó kem sendalù Israél mit sgida bè yó kem tau Midyan

¹³ Bè yóm kesfulék le gu bè gida lemwót le Musis ne Ilisar, yóm tau blóng le ebè Dwata ne kdê yó kem tau malak bè yó kem tau Israél, gotu le hewà bè kamfù le na le e senlong yó kem sendalù kól sgida.

¹⁴ Bè yóm keston le, ya tey sidek kebut Musis kul yó kem kmandér bè yó kem sendalù le.

¹⁵ Yó monen mò kul, “Moen du ke hlowil ye lu ni kem libun nii?

¹⁶ Igoen lu se yó kem libun tehe gmung bè atul Balaam ditu bè Bulul Piyor. Ne yó se yóm but gónó le kmogol ke Dwata yó kem tau Israél. Ni kem libun ni, lu se buten yóm gónó Dwata alì tmafak yó kem tau Israél.”

¹⁷ “Yó ne,” mon Musis, “gotu hnatay ye kdéen ngà logi ne gotu hnatay ye kdéen libun deng gemlan bè logi.

¹⁸ Són olo hlowil ye són yó kem sawang libun. Nit ye lu ebè gónô ye.

¹⁹ Sotuhen, yóm kdê ye deng wen tau hnatayen duhen ke deng wen tau matay nogoten, hol tebel bè lewà yóm kamfù. Hitu kdaw ye na nô bè yó. Bè yóm getluhen kdaw ne bè ghituhen kdaw, hólós ye knô ye, dalang se yó kem libun negef ye.

²⁰ Yó kem nes ye ne yó kem kimu lemwót bè kulit ógóf ne bè bul kambing duhen ke bè koyu, hol hólós ye anì mólós kton Dwata kuy.”

²¹ Omin Ilisar yóm tau blóng le ebè Dwata, mudél ebè yó kem sendalù deng bud kól gu bè gida, monen, “Yó tehe hlolò Dwata ke Musis,

²² tódô kdê yó kem kimu gel tenwél le lemwót bè tahu blówón ne bè blówón bukay ne bè tembaga ne bè bala tók ne bè lata ne bè tinggà, yó kem kimu là mlóben, hol hólós ye lu hlan ye bè ofi.

²³ Tódô kdê ni kem ni, hol bud hlan ye lu bè él anì mólós kton Dwata kul. Okóm yó kem kimu mlób, olon bè él gónó ye hólós du.

²⁴ Bè yóm ghituhen kdaw, hol nfuk ye nes ye omin ye hólós yóm kuy knô anì mólós kton Dwata kuy. Omin ye yó he mulék elem kamfù.” Là gomongen bè nili yóm bérs 25 efet kól bè bérs 47. Yó tulónen bè ni kem bérs ni yóm kmò kessólól kem tau Israél du yó kem tey kimu deng negef le. Wen blay le ebè Dwata, ne wen se blay le bè yó kem dumu le tebel bè kamfù ne wen se blay le bè yó kem sendalù mung bè gida.

⁴⁸ Omin le gotu mógów ebè Musis yó kem kmandér bè yó kem sendalù Israél,

⁴⁹ wen tulón le du, mon le, “Ó Sér, deng gotu nsó me yóm kdê sendalù nalak me ne balù sotu ke wen lana bélê le.

⁵⁰ Ne ni, gotu nwit me ebéléem ni kem tahu blówón kum ólól bè yó kem deng negef me, kem blusù ne kem tising ne kem tdé ne kem lieg. Gotu dsù me lu ebè Dwata ni kem ni mò bayad klowil me abay se là matay me.”

⁵¹ Tahu se, gotu nwa le Musis lewu le Ilisar yóm tau blóng le ebè Dwata, yó kem kimu blówón yó, hono kem ngom libun alì tilob.

⁵² Yó keblat yó kem blówón blay le ebè Dwata yó kem kmandér yó, wen dô 200 kiluhen.

⁵³ Yó gónón lómón yó kbongen abay se ket sendalù mung bè gida, wen negefen.

⁵⁴ Duhen yó, gotu henmóyô le Musis ne Ilisar yóm blówón deng blay yó kem kmandér ne nwit le ebè Gónô Dwata mò gónó le heftulón du bè nawa Dwata kun funen yó kem tau Israél.