Lista 27 - Udél Dwata: Gna Kesfasad ne Lomi Kesfasad

Kélék Dwata ke Juswa mò tles Musis

¹² Yó udél Dwata ebè Musis, monen, “Mnegedi eta tfusù yóm bulul Abarim, tenngelem bè yó tahen yóm tonok blayu yó kem tau Israél.

¹³ Ke deng tonem tahen yóm tonok yó, bang katayem ne lómón yóm twoguhem Aron

¹⁴ abay se là nimón ye du yóm lewu ye yóm hlolou kuy bè yóm knô ye bè benwu laen hol wen tauhen boluyen Dsin. Bè yóm tehe ktalaw le ebéléu yó kem tau Israél ditu bè Miriba, là kô dog hdilô ye du lem blóng le yóm klaen dù belenu.” (Yóm Miriba yó, boluy yóm sfut él bè benwu Kadis nô bè yóm benwu laen hol wen tauhen boluyen Dsin.)

¹⁵ Omin Musis mni bè Dwata, monen,

¹⁶ “Ó Dwata, yóm dou gónó mogot. Uu se gónón lemwót yóm kdéen mowil. Mnihe béléem anì méléki sotu tau mò hlós malak kul ni kem tau ni,

¹⁷ yóm tau gbeken malak kul ebè gida anì là mkél le bè yó kem ógóf laen dù malak kul.”

¹⁸ Yó balà Dwata ke Musis, monen, “Nwitem Juswa yóm ngà Nun. Du se sotu tau gónón nô yóm dou Tulus, nnokem ta kuluhen.

¹⁹ Hdaem bè solu Ilisar yóm tau gel blóng ebéléu ne bè solu yó kem tau Israél. Bè yó bè solu le heglalagem bélê le Juswa yóm mò tlesem.

²⁰ Blayem du dumu yóm kóm kwalis anì nimón yó kem tau Israél.

²¹ Bè yóm angat kalaken tau, ke móyô temngón du yóm dou kóyô nan hol mlan bè Ilisar yóm tau gel blóng ebéléu, yóm fen gel temngón du yóm dou kóyô mlan bè ketngelen du yóm Urim ne Tumim. Bè nim nmò Juswa ni, Ilisar fen gel tmulón du ne bè yó kem tau Israél yóm mò gel nmò le.”

²² Tahu se, nmò Musis yóm hlolò Dwata du. Hdaen Juswa bè solu Ilisar yóm tau gel blóng ebè Dwata ne bè solu yó kem tau Israél.

²³ Nnok Musis ta kulu Juswa ne heglalagen bélê le, Juswa mò tlesen hol lómón yóm deng mon Dwata mò du. Là gomongen bè nili yóm tsaptér 28 kól bè tsaptér 30. Yó tulónen yóm hlolò Dwata yó kem tau Israél bè yóm gel kbad le du ne yóm gel dsù le ebéléen, ne yóm bud gel blay le du sentahen. Bud tulónen bè ni snéen yóm kmò le du ke wen fasad le ke Dwata.