Lista 24 - Udél Dwata: Gna Kesfasad ne Lomi Kesfasad

¹ Bè yóm kkól le bè yó, tódô eles tngón Balaam yóm kóyô Dwata muyag kul yó kem tau Israél, yó gónón là bud wen gónón e solu na a mebel ilô yóm kóyô Dwata lómón yóm deng gna gel nmoen. Mom yó nmoen, temngel eta yóm benwu laen hol wen tauhen

² ne tonen yó kem tau Israél kmamfù gu bè yó, tódô sbung hono kul ktol. Tódô sut bè Balaam yóm Tulus Dwata,

³ yó udél htugod Dwata du, monen, “Ni se tulón Balaam yóm ngà Biyur, Ni se udél yóm tau tikaw kton matahen du yóm nmò Dwata

⁴ ne mdengen klinguhen mungol du yóm udél Dwata. Bè yóm igou teneng temngel tódô wen hton Dwata do, yóm Dwata alì gembek. Tódóe mugod bè yóm igou tolo temngel.

⁵ Yó htonen do yóm tey ktilob yóm kamfù yó kem tau Israél.

⁶ Hol lómón ke stodol tmowok kemlol él yó kem lefò duhen ke yó kem dumu hulu. Lómón ke koyu alus ne koyu sidar hulu Dwata.

⁷ Angat tendo gel hkulón Dwata eta yó kem hulu le. Gotu hulu le bnék le bè yóm tonok tilob khéféen. Yóm tau hol geta bélê le, angat geta senta Agag ne senflósen temnù yóm benwu nogoten.

⁸ Deng nit Dwata lu hewà gu bè Idyip. Du se mit sfatay bè yó kem hohon le, hol lómón kmoen ke safì tudu alì sidek klóbóen. Angat genlaen yó kem hohonen. Gotu tenfoken yó kem tiol le, gotu gentien lu.

⁹ Yó kem tau Israél, hol lómón ke yóm liyun alì lóbô. Ke tolo tungô laen dù mlos bemtik du. Yó se tau muyag yó kem tau Israél angat bud nuyag Dwata se kun. Ne yó se tau hemmulà kul angat bud henmulà Dwata se kun.”

¹⁰ Bè yóm kungol Balak du yóm udél Balaam yó koni, tey sidek kebuten du botong gesdofien hólólen ne yó monen mò ke Balaam, “Yó gónów htaba kóm anì henmulaem yó kem hohonu, okóm deng mom tlu dulékem ne muyag kul.

¹¹ Tódói mulék ne. Deng tehe wen ofol fasadu kóm okóm deng henseng Dwata béléem yóm ofol yó.”

¹² Bnalà Balaam se, monen, “Deng tulónu yó kem tau hangayem do,

¹³ anien he ke gotu blayem do kdê tahu blówónem ne kdê blówón bukay nô bè gónô bongem, là kô naw e gbek du ke là nimónu du yóm hmò Dwata do. Són olo monu, són yóm htugod Dwata do.”

Yóm són htugod Dwata ke Balaam

¹⁴ Yó bud udél Balaam ebè Balak, monen, “Ni muléke ebè yó kem dou tau, okóm gu laanu là deng lemwót, wen eles hetgamahu kóm yóm angat nmò yó kem tau Israél bè yó kem tau nogotem elem hulin kdaw.”

¹⁵ Ominen bud tmugod du yóm htugod Dwata du, monen, “Ni se yóm tugod Balaam yóm ngà Biyur. Ni se udél yóm tau tikaw kton matahen du yóm nmò Dwata

¹⁶ ne mdengen klinguhen mungol du yóm mon Dwata ne hulung temnef du yóm hetngónen du yóm Dwata hol dandónen geta bè kdéen. Bè yóm igou tódô teneng temngel wen hton Dwata dou, yóm Dwata alì gembek.

¹⁷ Tódóe mugod igou tolo temngel. Tódô htonen do yóm mò kmoen elem hulin kdaw. Tódô eles gmatahu yó kem tau Israél. Angat wen tau hol geta bélê le kun lemwót bè kul ból hol lómón keslinangen yóm blotik alì mnóng, wen tey kegbeken. Angat genlaen yó kem tau bè benwu Muab ne gomong genlaen yó kem tau Sét.

¹⁸ Gotu genlaen yó kem hohonen bè Idom ne gotu nfunen yóm kul tonok. Yó kem tau Israél, tódô hlós yóm kegmò le bè yó kem hohon le.

¹⁹ Angat sut yóm tau malak kul ne gotu genlaen yó kem dù mowil bè yóm benwu boluyen Ir.”

²⁰ Bud hton Dwata bè Balaam snéen yó kem tau Amalikayt ne tulón Balaam yóm htugod Dwata du, monen, “Hol lemyu senta yó kem dumu but tau yó kem tau Amalikayt. Okóm yó hol són le, gotu le meglà.”

²¹ Bud hton Dwata ke Balaam yó kem tau Kinayt ne bud tulón Balaam yóm htugod Dwata du, monen, “Tey mbegel yóm benwu gónó ye nô, hol lómón kbegelen yóm sala nô bè léhék geta.

²² Okóm angat ye meglà yu kem tau Kinayt sok angat gotu negef kem tau Asirya yu.”

²³ Bud mon Balaam yóm bud htugod Dwata du, “Étey. Ke ni se nmò Dwata, tau du se tô mowil?

²⁴ Lemwót le mówóng gu bè Siprus yó kem tau gemlà. Angat nled le Asirya ne Ibir okóm angat le bud meglà se kul.”

²⁵ Omin Balaam tódô mulék ne hlós mulék se ke Balak.