Lista 20 - Udél Dwata: Gna Kesfasad ne Lomi Kesfasad

Kulé le Musis ne Aron du yóm hlolò Dwata kul

¹ Bè yóm tanay bulón, lemwót yó kem tau Israél gefet le bè yóm sotu benwu laen hol wen tauhen boluyen Dsin ne kmamfù le bè yó bè yóm sotu benwu lemen boluyen Kadis. Bè yóm benwu yó gónó Miryam matay ne bè yó snéen gónó le lembeng du.

² Bè yóm benwu gónó le kmamfù yó laen kô dù élen. Ne yó nmò yó kem tau Israél, gotu le stifun e klohok Musis ne Aron ne nsel le lu, mon le,

³ “Mom hyu ne ke tehe me mung matay bè yó kem dumu me Israél ditu bè solu yóm Gónô Dwata.

⁴ Moen du ke nwit ye mi edini bè nim benwu laen hol wen tauhen nii? Yó kô atul ye anì gotu me mung matay bè yó kem ógóf me bè ni?

⁵ Moen de ke tehe nwit ye mi gu bè Idyip ebè nim benwu alì sidek nii? Balù udì ke wen tmowok du. Benwu laen dù halayen, laen dù bungu koyuhen. Balù él ninum laen duen.”

⁶ Omin le Musis lewu le Aron mdó bè yó lem blóng yó kem tau ne mdà le bè bak dól yóm Gónô Dwata. Tódô le lemfen bè tonok bè yó ne mni le bè Dwata. Ne hegfan bélê le Dwata mung du yóm tey keslinangen.

⁷ Yó mon Dwata mò ke Musis,

⁸ “Nwahem yóm tuged nô bè solu yóm Slungan Fasad ne gotu sentifun ye yóm kdéen tau lewu ye Aron. Bè yó bè solu le, tódói mudél ebè yóm botu nô bè yó ne angat wen él tódô semfut gu lemen. Bè nim nmoem ni, wen tey él gu lem yóm botu mò ninum yó kem tau ne yó kem ógóf le.”

⁹ Tahu se, lemwót Musis nwahen yóm tuged lómón yóm deng mon Dwata mò du.

¹⁰ Yó nmò le lewu le Aron, gotu sentifun le yóm kdéen tau bè solu yóm botu mon Dwata. Ne yó udél Musis ebélê le, “Yu kem tau gel smonol ke Dwata, hol hnungol ye. Yó hol kóyô ye kô ke wen él hesfut me gu lem nim botu ni mò ninum ye?”

¹¹ Omin Musis kmayang du eta yóm tuged hwa Dwata du yó koni ne lewu duléken mfes du bè yóm botu ne tódô sen-gengen se semfut gu lemen yóm tey él bong ne gotu le minum yó kem tau dalang se yó kem ógóf le.

¹² Okóm nudél Dwata Musis lewu le Aron, monen, “Lemwót bè yóm là hol ksalig ye do ne yóm là kehdilô ye du lem blóng yó kem tau Israél yóm klaen dù belenu, là kô galak ye kul ni kem tau ni etu bè yóm benwu fasadu kul.”

¹³ Nim ksel kem tau Israél ke Dwata ni, nô le bè yóm benwu boluyen Miriba yóm benwu gónó Dwata hegfan du bélê le yóm klaen dù belenen.

Yóm là kóyô yóm tau hol geta bè Idom ke mlan le bè benwuhen yó kem tau Israél

¹⁴ Wen kem tau Israél dók Musis lemwót bè yó bè Kadis etu bè yóm tau hol geta bè Idom. Bè yóm kkól le ditu yó mon yó kem tau dóken, “Ni se udél lemwót bè yó kem dumum setwoli kem tau Israél. Deng tngónem yóm tey keglayam me.

¹⁵ Deng tngónem snéen yóm tehe kógów le ebè Idyip yó kem tehe fù me ne tey kegenen yóm knô me ditu. Yó kem tau Idyip, tey khesek le yó kem tehe fù me dalang se mi kem ból le.

¹⁶ Ne yó nmò me, tey kehkodu me bè Dwata anì tnóbóngen mi. Ne tahu se, gungolen yóm kehkodu me yó, yó gónón wen hógówen gu bè longit hwiten ebélê me mò malak kum hewà gu bè Idyip. Ne ni kmoen ni, deng me kól bè Kadis, yóm ngà benwu gkilil bè yóm benwu nogotem.

¹⁷ Ke yó dum hyu béléem, hol hlanem mi lem yóm kuy benwu. Bè yóm klan me dalang se yó kem ógóf me, là kô me semyat ebè yó kem tonok gónó ye mò hulu dalang se ebè yó kem gónó ye mulu grép ne là kô me se na a minum bè yó kem kokol ye. Tódô lolò me yóm tahu lan efet gku me yóm kuy benwu.”

¹⁸ Okóm yó balà le kul yó kem tau Idom, mon le, “Là kô me móyô hlan kuy lem yóm kum benwu. Ke yó tô nmò ye, ngem kà gotu nundug me kuy.”

¹⁹ Yó bud mon yó kem tau Israél, “Ke hlan ye mi, tódô hekteng lolò me yóm tahu lan. Ke minum me bè yó kem él ye dalang se yó kem ógóf me, bnayad me yu. Olo ye hlan kum dé.”

²⁰ Yó bud udél yó kem tau Idom, mon le, “Là kô me móyô hlan kuy.” Mom yó nmò le, gotu nit le yó kem tey sendalù wen le na le e tô nundug yó kem tau Israél.

²¹ Lemwót bè yóm là kóyô yó kem tau Idom hlan yó kem tau Israél, yó gónó le bud beklil mulék yó kem tau Israél, lolò le tólóng lan.

Katay Aron

²² Tódô kdê yó kem tau Israél, gotu tnagak le yóm benwu Kadis kól le bè Bulul Hor,

²³ yóm bulul gkilil bè benwu Idom. Bè yóm bulul yó gónó Dwata bud mudél ebè le Musis lewu le Aron. Yó monen mò kul,

²⁴ “Là kóen gefet edu kun ke Aron yóm benwu deng tehe fasadu yó kem tau Israél. Bang kukol towoken ne kun abay se yóm lewu ye, là kô dog nmò ye du yóm hlolou kuy bè yóm knô ye bè Miriba.

²⁵ Yó ne, Musis, nwitem Aron ne yóm ngaen Ilisar eta yóm Bulul Hor.

²⁶ Bè yó tahen gónóm mlus du bè Aron yóm nes gel leseken bè yóm keseblóngen tau ebéléu ne hesekem ke Ilisar. Bè yó tahen gónó Aron matay.”

²⁷ Tahu se, nmò Musis yóm hlolò Dwata du. Mneged le eta yóm Bulul Hor igò le temngel yó kem tau Israél.

²⁸ Ditu tahen gónó Musis mlus du bè Aron yóm nes gel leseken bè yóm keseblóngen tau ebè Dwata ne heseken ke Ilisar. Bè yó ta yóm bulul yó gónó Aron matay ne fen le bud mulék mosol kul le Musis lewu le Ilisar.

²⁹ Deng tódô tngón yó kem tau Israél yóm deng katay Aron ne botong tlu folò kdaw le kegen le lemangag du.