Lista 17 - Udél Dwata: Gna Kesfasad ne Lomi Kesfasad

Yóm tuged Aron

¹ Yó mon Dwata mò ke Musis, 2 “Tulónem yó kem tau Israél anì benlay le uu sfolò lewu tuged, ket sotu tuged lemwót bè yóm tau malak bè ket but tau Israél. Ket tuged, snulatem du boluy yóm tau malak funen.

³ Bè yóm tuged kun nwit yóm ból Libay, snulatem du boluy Aron. Ket tau malak bè yó kem but tau Israél, ket kul na sotu tuged.

⁴ Gotu nwitem yó kem tuged le yó ebè yóm dou Gónô ne suem lu bè solu yóm Slungan Fasad bè yóm gónóhu gel stulón kóm.

⁵ Yóm tuged yóm tau deng dou nélék angat tódô dmoun bè yó. Bè nim nmou ni mò gónóhu temflok du yóm tendo kudél le eta ye yó kem tau Israél.”

⁶ Duhen yó, lemwót Musis mudél ebè yó kem tau Israél. Ne ket tau malak bélê le wen tuged blayen ke Musis, ket sotu tuged lemwót bè ket but tau Israél, sfolò lewu kdê le ne gomong lemen yóm kun tuged Aron.

⁷ Lemwót Musis, gotu suen lem Gónô Dwata yó kem tuged yó, suen lu bè solu yóm Slungan Fasad.

⁸ Timbow hayahen bè yó, mógów ebè Gónô Dwata Musis, tódô tonen yóm kun tuged Aron yóm fen mit yóm kun ból Libay deng sana dmoun. Ne wen bulóken hanà tolo lebotù ne wen se deng mból du ne wen se bunguhen deng tógó boluyen almun.

⁹ Gotu nwa Musis lu yó kem tuged yó ne toloken bè yó kem tau Israél. Gotu ton le se yóm mò kmoen yó kem tuged. Ne ket tau malak, bud nwahen yóm kun tuged.

¹⁰ Mon Dwata mò ke Musis, “Bud hulékem bè solu yóm Slungan Fasad yóm kun tuged Aron. Yó se hlós mò eles gónó le temgama yó kem tau Israél alì smonol do. Song gónó le là matay ke tenflok le yóm alì ktalaw le.”

¹¹ Tahu se, tódô nmò Musis yóm hlolò Dwata du yó.

¹² Yó udél yó kem tau Israél ebè Musis, mon le, “Ke lómón ni se kmoen, matay me ne yó.

¹³ Ke matay yóm tau hloni ebè Gónô Dwata, là kô hewuhem du matay me se kum yóm kdê me.” Là gomongen bè nili yóm tsaptér 18. Yó tulónen yóm hlolò Dwata yó kem sfu Libay ne yó kem tau gel blóng ebè Dwata bè yóm kmò le nmò bè Gónô Dwata. Bud tulónen snéen yóm hlolò Dwata yó kem tau Israél bè yóm kmò kólól le du bè yó kem sfu Libay yóm gel blay le ebè Dwata. Yóm kul ólól yó kem sfu Libay, bud nbad le Dwata se kul. Là gomongen bè nili yóm tsaptér 19. Yó tulónen yóm hlolò Dwata yóm tau blóngen ebéléen ke wen matay bè yó kem tau Israél. Yó hlolò Dwata yóm tau blóngen ebéléen, eles hkekeb safì libun hulô hanà ngaen ne gotu sentifunen yóm kohuen, ominen hemyu du. Duhe kóm, ke wen tau matay bè yó kem tau Israél, yó nmò yóm tau blóng le ebè Dwata yó, wen nwahen bè yóm kohù deng henyuhen, senboolen él ominen hemtsik du bè fes lówó yóm tau deng matay. Kkólen bè yó kem kimu nô lem yóm gónô gónón hto yóm matay, gotu hentsiken. Bè nim nmò le ni, bud baling mólós kton Dwata kul.