Lista 16 - Udél Dwata: Gna Kesfasad ne Lomi Kesfasad

Yóm katù le Kura kul le Musis ne Aron

^1-2 Wen sotu tau boluyen Kura ngà Isar, lemwót bè fes lówó Kuhat, tau semfu gu bè Libay. Yó nmò Kura, kenbéen yóm kalak Musis kul. Wen tlu tau semfu gu bè yóm tehe Rubén mung béléen. Yó boluy le Datan ne Abiram kem ngà Ilyab, ne On yóm ngà Pilit. Ne wen lewu latu limu folò dumu tau Israél mung kul snéen, hono kem tau deng nélék yó kem tau Israél mò malak kul ne tey le tótól bè yóm kalak le.

³ Gotu le mógów ebè le Musis lewu le Aron ne yó mon le mò kul, “Deng tey gulé ne yóm nmò ye. Kdê tekuy se kem tau Israél hono kem kun tau Dwata ne bélê tekuy se gónóhen nô. Moen du, Musis, ke fen ye hegeta senta yó kem dumu tau Dwata?”

⁴ Timbow gungol Musis yóm udél le yó koni, tódô lemfen bè tonok ne mni bè Dwata.

⁵ Ominen mudél ebè Kura ne bè yó kem lemolò du, monen, “Hlafus haya hegfan Dwata bélê tekuy yóm tau deng néléken. Yóm tau deng néléken, du se henmóyóen mò mtem insinsu ditu bè soluhen.

^6-7 Hlafus haya nwitem yóm gónóhem gel mit ofi dalang se yó kem gel lemolò kóm. Hensù ye bala ofi lemen ne bnulus ye insinsu ne omin ye mit du ebè solu Dwata. Bè yó gónó tekuy temngón du ke mahil du bélê tekuy yóm deng nélék Dwata. Yu kem tau semfu gu bè Libay, yu se yóm deng gulé nmoen.”

⁸ Yó bud mon Musis mò ke Kura, “Hnungol ye kem tau Libay.

⁹ Bè kuy kehedem du, là dengen gsengel nawa ye du he kô yóm deng kélék Dwata kuy bè yó kem dumu ye tau Israél mò tau gfi ebéléen mò du yóm hmoen kuy lem yóm kun Gónô? Yóm gel któbóng ye yó kem dumu ye Israél, tek udì bélê ye kô yóm hogoten kuy yó?

¹⁰ Igoen tey bong yóm deng sigang Dwata ta ye, yu kem tau Libay. Okóm ni móyô ye ke yu tles tau mò blóng ebè Dwata.

¹¹ Bè yóm kekbê ye ke Aron ni deng Dwata ne yóm kenbê ye.”

¹² Omin Musis tminok kul le Datan ne Abiram okóm yó balà le du, mon le, “Là mógów me.

¹³ Là kóyówen béléem he kô yóm tehe kwitem kum hewà gu bè Idyip, gu bè yóm benwu tilob tonoken, anì nam e gotu hnatay mi bè nim benwu laen hol wen tauhen ni? Ne ni, kóyóem he kô ke bud henbalingem mi mò hesekem?

¹⁴ Là kô dog nwitem kum ebè yóm benwu hyu tonoken, yóm benwu tehe tulónem kum. Laen sem dù tonok blayem kum ne laen se dù gónó me mò hulu mò kum nfun. Ne ni, tô snukatem mi. Là kô me móyô mógów edyó.”

¹⁵ Tey sidek kebut Musis bè yóm kungolen du yóm mon le yó, botong monen mò ke Dwata, “Ó Dwata, hol béem abay henmóyô ke wen blay le kóm ni kem tau ni. Balù sotu bélê le ke deng wen sidek nmou bélê le. Ne balù sotu kudà asnu le ke deng tódô nwahu bélê le.”

¹⁶ Bud mon Musis mò ke Kura, “Haya mógówi ebè Gónô Dwata, mung kóm yóm lewu latu limu folò kem lemolò kóm. Ne nô bè yó snéen kun ke Aron.

¹⁷ Sket ye mit yóm gónó ye gel hemsù ofi, hensù ye bala ofi lemen ne bnulus ye insinsu ne nwit ye ebè solu Dwata.”

¹⁸ Tahu se, hayahen bè yó, sotu kun ma yóm gónón hemsù ofi, hensù le bala ofi lemen ne bnulus le insinsu ne mdà le bè bak dól yóm Gónô Dwata. Mung kul Musis ne Aron.

¹⁹ Omin Kura semtifun yó kem dumu tau Israél gel lemolò du ne mdà le bè bak dól yóm Gónô Dwata se kul. Tódô mekto sut bélê le yóm tey layag sminang lemwót gu bè Dwata

²⁰ ne yó mon Dwata mò ke Musis ne Aron,

²¹ “Hlayuk ye bélê le ni kem tau ni anì tódô géhél genlau lu.”

²² Okóm tódô le lemfen bè tonok le Musis ne Aron ne yó mon Musis mò ke Dwata, “Ó Dwata, uu se hlowil yóm kdéen mowil. Ke olohen tek sotu tau yóm mò sidek gotu homong lenbutem kô yóm kdéen tau?”

²³ Mon Dwata se mò ke Musis,

²⁴ “Hol tulónem yó kem tau, hol le hlayuk bè gónô le Kura ne Datan ne Abiram.”

²⁵ Tahu se, tódô kendel heslò lemwót Musis, mung du yó kem malak yó kem tau Israél, mógów le ebè Datan ne Abiram.

²⁶ Yó udél Musis ebè yó kem dumu tau mdà bè yó, monen, “Hol ye hlayuk bè gónô le ni kem tau mò sidek nii ne bê ye abay nogot yó kem kimu le. Ke nogot ye gotu ye gomong megtafak bélê le bè yó kem salà le.”

²⁷ Tahu se, gotu le hlayuk yó kem tau bè gónô le Kura ne Datan ne Abiram. Blaem kul le Datan ne Abiram, deng le sana mdà bè bak dól yóm gónô le, mung kul yehen le ne kem ngà le.

²⁸ Yó mon Musis mò yó kem tau, “Ni wen mò gónó ye temngón du yóm deng kdók Dwata do mò fen mò du yóm kun kóyô lem blóng ye ne là kóen lemwót bè yóm dou kóyô.

²⁹ Ke tódô le matay hkawang là tnafak Dwata kul ni kem tau nii, bè yó gónó ye temngón du là dók Dwata do.

³⁰ Okóm ke wen nmò Dwata yóm là deng sulék gungol tau du ne ke tódô setngag yóm tonok ne ke gotu le geblos elemen ni kem tau ni, gomong kem kimu le, geblos le elemen igò le tolo mowil ebè benwu yó kem tau deng matay, bè yó gónó ye temngón du natù le Dwata ni kem tau ni.”

³¹ Unihen deng kudél Musis, tódô setngag se yóm tonok gónó le nô le Datan ne Abiram

³² ne gotu le geblos elemen, dalang se yó kem fes lówó le, gomong snéen kdê yó kem tau lemolò ke Kura ne yó kem kimu le.

³³ Tódô le gotu geblos etlaan igò le tolo mowil, elem benwu yó kem tau deng matay, gomong yó kem kimu le. Ominen bud stikom se yóm tonok ne tódô le gotu lana yóm kdê le.

³⁴ Gotu le mlóy yó kem dumu tau Israél nô bè yó bè yóm kungol le yóm langat yó kem tau geblos etlaan. Gotu le lemangat se kul yó kem tau mlóy, mon le, “Mlóy tekuy, déke gotu tekuy gomong geblos bélê le.”

³⁵ Omin Dwata hesut yóm tey dilóf ofi ne gotu sulék kenen yóm lewu latu limu folò tau mit insinsu yó koni.

Yó kem gónó le gel hemsù ofi

³⁶ Omin Dwata mon du mò ke Musis,

³⁷ “Tulónem ke Ilisar yóm ngà Aron, yóm tau gel blóng ebéléu, anì gotu nwahen yó kem gónó le hemsù ofi tehe nwit yó kem tau ken ofi yó koni. Gotu koken lu hlayuk yó kem bala ofi nô lem le abay se yó kem gónó hemsù ofi yó, mólós le kul.

³⁸ Yó gónó le deng mólós, abay se deng nit le lu ebè soluhu. Yó gónóm mon, gotu hwahem lu ke Ilisar bè yó kem tau deng matay lemwót bè salà le. Lenubaken lu efet kufil mò lafin yóm gónó le demsù ebéléu. Yóm lafin yó mò hentulón nawa yó kem tau Israél anì hol le eles temgama.”

³⁹ Tahu se, gotu sentifun Ilisar yóm sotu tau blóng ebè Dwata, yó kem gónó hemsù ofi ne gotu lenubaken efet kufil ne nmoen mò lafin yóm gónó le demsù ebè Dwata.

⁴⁰ Nim lafin lenubaken ni mò eles gónó le temgama yó kem tau Israél anì laen dù tau mógów bè solu Dwata mò mtem insinsu ke là tauhen semfu gu bè Aron. Ke wen tólóng tau tô mò du angat mkél kul le Kura ne yó kem lemolò du, gotu le meglà matay. Tahu se, gotu nmò Ilisar yóm kdê deng hlolò Dwata du hlanen bè Musis.

Kehlowil Aron yó kem tau

⁴¹ Timbow hayahen bè yó, bud nsel le le Musis ne Aron yó kem tau Israél, mon le, “Deng wen hnatay ye bè yó kem tau Dwata.”

⁴² Bè yóm deng kestifun yó kem tau msel kul le Musis ne Aron yó, gotu le beklil smolu ebè yóm Gónô Dwata ne tódô ton le yóm lobun lememek etahen, mung du yóm tey slinang Dwata.

⁴³ Kewót le Musis ne Aron bè yó mdà le bè solu yóm Gónô Dwata

⁴⁴ ne yó mon Dwata mò ke Musis,

⁴⁵ “Hlayuk ye bélê le ni kem tau nii, na gotu genlà lu.” Tódô le lemfen bè tonok le Musis lewu le Aron ne mni le bè Dwata.

⁴⁶ Ne yó mon Musis mò ke Aron, “Nahem yóm gónóm gel hemsù ofi, suem lemen yóm bala ofi lemwót bè yóm gónó le gel demsù ne bnulusem insinsu. Géhél hetlasik nwitem elem blóng yó kem tau ne nmoem lem blóng le yóm sana gel nmoem bè khólós tau anì mólós le bè kton Dwata kul. Hetlasiki, abay se deng sut yóm lebut Dwata ne deng wen des mekto sut lem blóng le.”

⁴⁷ Tahu se, nimón Aron yóm mon Musis yó, ne kendel nwahen yóm gónón gel hemsù ofi ne tódô mlóy elem blóng yó kem tau sbung. Timbow tonen yóm deng kbut yóm des mekto yó, ominen mulus insinsu lem yóm bala ofi. Yó gónón mò du yóm yó anì mólós kton Dwata yó kem tau.

⁴⁸ Tódô mdà bè yó Aron lem blóng yó kem tau tolo mowil ne yó kem tau deng matay mò hemseng yóm des mekto sut lem blóng le.

⁴⁹ Yó kwen yó kem tau matay bè yóm kdaw yó, botong sfolò fat libu bud hitu latu là gomong yó kem tau mung matay bè salà Kura.

⁵⁰ Timbow deng teflok yóm des mekto yó, lemwót Aron bud mulék ebè Musis bè yóm sana gónón mdà bè bak dól yóm Gónô Dwata.