Lista 14 - Udél Dwata: Gna Kesfasad ne Lomi Kesfasad

Yóm bud alì ktalaw yó kem tau Israél

¹ Timbow deng gungol yó kem tau Israél yóm tulón yó kem tau hemkana, tódô suloy le buteng dmumu mkik bè yóm alì ksidek ktafa nawa le.

² Tendo nsel le Musis ne Aron, mon le, “Mom hyu he ke tehe me matay ditu bè Idyip duhen ke bè nim benwu laen hol wen tauhen.

³ Moen du ke nwit Dwata mi etu bè benwu Kanan? Angat me matay ditu bè gida ne yó kem yehen me ne kem ngà tekuy gotu negef le lu. Mom hyu ne ke gotu me bud mulék ebè Idyip.”

⁴ Duhen yó, gotu le stulón, mon le, “Mélék tekuy tau mò malak kut, omin tekuy yó bud mulék ebè Idyip.”

⁵ Lemwót le Musis lewu le Aron tódô le lemfen bè tonok bè solu yó kem tau mni le bè Dwata.

⁶ Ne yó nmò Juswa yóm ngà Nun lewu le Kalib yóm ngà Jifuni, yóm lewu bè yó kem tau hemkana, botong kensê le nes le lemwót bè yóm alì ksidek kegnóm le du.

⁷ Yó udél le ebè yó kem tau, mon le, “Hnungol ye dé nim kum tulón. Yóm tonok deng hnalak me tu hol tonok hyu.

⁸ Ke hyu nawa Dwata ebélê tekuy angat nalaken tu etu ne blayen tekuy yóm tonok alì hyu, tonok alì mabù huluhen.

⁹ Bê ye mom natù Dwata dé ne bê ye abay knikò tu kem tau menwu ditu. Là kóen legen keglà tekuy kul tu kem tau tu abay se tendo eles nô bélê tekuy Dwata ne laen kô dù gónó le hofin se kul. Yó gónóm mon, hol bê ye abay hlikò.”

¹⁰ Okóm yó kem tau, mom tô hnatay sentudà le lu botu le Juswa ne Kalib okóm tódô kendel ton le se yóm tey layag Dwata alì sminang ta yóm Gónóen.

Kni Musis bè Dwata bè yó kem tau Israél

¹¹ Yó udél Dwata ebè Musis, monen, “Deng tódô senflós le kembê do ni kem tau ni. Tódô senflós le là smalig do igoen deng tey dê hentaw ton nmou lem blóng le.

¹² Tódô genlau lu ne hlanu bè yóm des mekto hwitu elem blóng le. Bong béléem kóm, Musis, hol hbegelu yó kem bólem ne henbalingu uu mò mà yóm sotu bung tau alì wen senta ni kem tau ni.”

¹³ Okóm yó balà Musis ke Dwata, monen, “Ó Dwata, lemwót bè kegbekem se gónóm mit kul hewà gu bè Idyip ni kem tau ni. Mò kmoen se ke gungol yó kem tau Idyip yóm tô nmoem bè ni kem tauhem ni?

¹⁴ Nénégem ke là gotu tulón le du bè yó kem tau Kanan. Igò le deng hónô mungol du yó kem tau Kanan uu se yóm Dwata tendo gel nô bélê me ne geli hegfan bélê me mlan bè yóm lobun gel nô ta me. Ne deng hónô gungol le uu se yóm tendo gel tukô gna kum mlan bè yóm lobun tmahà tukô gna kum ke kemdaw ne baling ofi ke kifu.

¹⁵ Ne ni, Dwata, ke gotu hnatayem yó kem tauhem, yó angat sentulón yó kem dê dumu but tau deng mungol yóm któtólem, mon le,

¹⁶ ‘Gotu hnatay Dwata yó kem tauhen bè yóm benwu laen hol wen tauhen abay se là gbeken mit kul hlós etu bè yóm benwu deng fasaden kul.’

¹⁷ Duhen ni, Dwata, hkoduhe béléem, hol hegfanem bélê me yóm kegbekem ne hendohoem yóm tehe fasadem kum. Yó tehe monem mò kum,

¹⁸ ‘Ou se yóm Dwata hol gónó mogot. Là kóe mahil lembut ne sal gel hegfanu yóm tey kbong nawahu tau. Ne gotu hnifótu yó kem salà le ne yóm alì katù le do. Okóm là kô gbeku là tmafak kul bè yó kem salà le. Lemwót bè salà yó kem tuha le, là kô gbeku du ke là se tnafaku yó kem ngà le ne témê le efet kól bè getluhen ne bè gfat yóm lugod le.’ Yó se, Dwata, yóm tehe udélem ebélê me.

¹⁹ Ne ni, Dwata, lemwót bè yóm là konol yóm tey kbong nawahem kum mnihe béléem, hol hnifótem bélê le salà le ni kem tau ni lómón se yóm deng tendo gel nmoem bélê le lemwót bè yóm tehe kehewà le gu bè Idyip efet nim kmoen ni.”

²⁰ Yó balà Dwata du yóm hni Musis yó, monen, “Yó ne, hnifótu lu, tódô nmungu bè yóm deng hnihem béléu.

²¹ Okóm ni eles tulónu kóm ne là kóen na a bud mulék elem baku nim monu ni. Tahu se yóm klaen dù sónen yóm klowilu ne bud tahu se yóm tendo kegfanen bè klamangen benwu yóm tey kegetahu.

²² Bud tahu snéen nim monu ni, balù sotu bè ni kem tau là mimón ni ke gehlós edu tum benwu deng fasadu kul. Igò le deng hónô mton du yóm tey keslinangu bè yóm knóu lem blóng le ne deng hónô ton le snéen yó kem hentaw ton tehe nmou bè Idyip dalang se bè ni bè nim benwu laen hol wen tauhen. Okóm deng mom sónmò le tendo gel htakas do ne là kô nimón le do.

²³ Tódô tulónu kóm, là kô le gehlós edu kul yóm benwu tehe fasadu yó kem fù le. Laen kô dù bè yó kem tau kembê do ke gehlós edu.

²⁴ Okóm ke Kalib kun yóm tau tóbóng lówóhu, tey tólóng yóm kun kmò, là kóen monol nawahen ebéléu. Yó gónóm mon, heflósu yó dum kun ebè yóm tonok deng bniwelen. Ne yó kem sfuhen angat le gemfun bè yóm kun ólól bè tum tonok tu.

²⁵ Okóm lemwót bè yóm tolo knô le bè yó bè datal yó kem tau Amalikayt ne kem tau Kanan, bê ye tagad hlós etu. Ke haya na ye haking elem yóm benwu laen hol wen tauhen, lolò ye yóm lan hlós ebè Mohin Hulô.”

Ktafak Dwata yó kem tau alì tmalaw

²⁶ Yó bud mon Dwata mò ke Musis lewu le Aron,

²⁷ “Deng tódô senflós le tendo msel do ni kem tau gel mò sidek ni. Denge tmakas hmungol du yóm tendo ksel le do yó.

²⁸ Ni tulónem kul yóm balau du yóm ksel le do yó, monem mò kul, ‘Ni hol udél Dwata ebélê ye ne là kóen mulék elem baken nim monen ni. Tódô nmoen bélê ye yóm deng gungolen lemwót gu bélê ye. Yóm sana Dwata hol gónó mogot mon du nim ni.

²⁹ Bè nim benwu laen hol wen tauhen ni, bè ni gónó ye angat matay ne gotu bélét gu lemen yó kem tiol ye. Lemwót bè yóm seflós ksel ye du laen kô dù bélê ye gehlós edu yóm benwu tu ke deng gefet lewu folò halayen duhen ke deng mukas lewu folò.

³⁰ Deng tehe fasaden kuy se yóm angat knô ye ditu okóm laen dù bélê ye gehlós edu, tek són le Kalib yóm ngà Jifuni, lewu le Juswa yóm ngà Nun.

³¹ Deng mon ye angat gotu negef kem hohon ye yó kem ngà ye okóm là. Angat gotu nwit Dwata lu etu bè tum benwu deng senkbê ye ne yó se hlós kul gónó nô.

³² Okóm kuy, angat ye gotu matay bè ni lem nim benwu laen hol wen tauhen ni.

³³ Yó kem ngà ye, nan fat folò halay kegen le smidok menwu lem nim benwu laen hol wen tauhen ni lan le mbô yóm là kgulit ye. Smidok le menwu efet ye deng gotu matay yu kem tau là mimón ke Dwata.

³⁴ Fat folò halay ye mbô du uléken yóm là kgulit ye. Deng tehe fat folò kdaw ye bemiwel du yóm benwu henkana ye yó. Bè ket kdaw ye bemiwel du, nmoen sotu halay. Angat gnóm ye he ksideken ke Dwata hmohon kuy.’

³⁵ Là buden mulék elem baken nim monen ni. Angat gotu dohò eta ye nim monen ni, yu kem tau gel mò sidek deng sensotu ye atul ye matù du. Yóm ket kuy na sotu angat ye gotu matay lem nim benwu laen hol wen tauhen ni. Yóm sana Dwata hol gónó mogot mon du nim ni.”

^36-37 Yó but gónó le alì msel ke Dwata yó kem tau, lemwót bè yóm sidek tulón le kogol yóm kkól yó kem tau tehe hógów Musis na a hemkana bè Kanan. Duhen yó, wen des mekto hwit Dwata ebè yó kem tau tmulón kéng yó koni ne tódô le gotu matay mekto.

³⁸ Tek són Juswa ne Kalib mowil bè yóm sfolò lewu kem tau hemkana.

Yóm kundug le ebè Kanan

³⁹ Timbow deng gotu tulón Musis yó kem tau Israél yóm udél Dwata ebélê le, ya tey sidek klangag le.

⁴⁰ Hol hlafus bè yó, yó nmò le tódô le gotu lemwót na le e nundug yó kem benwu gu lem bulul. Yó mon le, “Tahu se, deng me gemsalà bè Dwata. Okóm ni tódô me mógów etu bè tum benwu deng tulón Dwata kum tu.”

⁴¹ Okóm yó mon Musis mò kul, “Ke tahu yóm kehegsel ye yó, moen du ke là nimón ye du yóm khulék Dwata kuy elem yóm benwu laen hol wen tauhen? Là kô ye na a matù bè nim kundug ye ni.

⁴² Hol bê ye abay tô mundug. Là kóen nô bélê ye Dwata. Là kô ye matù bè yó kem hohon ye.

⁴³ Kesok ye sgida bè yó kem tau Amalikayt ne bè yó kem tau Kanan, matay ye bélê le. Là kóen na a mung kuy Dwata abay se là móyô ye lemolò du.”

⁴⁴ Okóm mom lusu le mundug ebè yó kem benwu nô lem bulul igò Musis ne yóm Slungan Fasad tebel bè kamfù le.

⁴⁵ Lemwót yó kem tau Amalikayt ne yó kem tau Kanan menwu lem bulul, gotu nuluk le yó kem tau Israél ne là kô le gemmò bélê le yó kem tau Israél. Ngang le kemtes kul yó kem hohon le efet le kól bè Hurma. Là gomongen bè nili yóm tsaptér 15. Yó tulónen yóm hlolò Dwata yó kem tau Israél bè yóm kmò kedsù le ebéléen.