Lista 13 - Udél Dwata: Gna Kesfasad ne Lomi Kesfasad

Kehkana le bè Kanan yó kem tau Israél

¹ Yó bud udél Dwata ebè Musis, monen,

² “Méléki sfolò lewu tau, ket sotu bélê le lemwót bè ket ktol yóm sfolò lewu kem but tau Israél, bede hono lemwót bè yó kem tau gel malak bélê le. Hógówem lu etu bè benwu Kanan mò hemkana ditu bè yóm benwu blayu yó kem tau Israél anì na le e hnénég mò kmoen yóm benwu yó.”

³ Tahu se, nimón Musis yóm mon Dwata mò du yó. Ne bè yó bè Paran, bè yóm benwu laen hol wen tauhen gónón hewót kul yóm sfolò lewu kem tau malak néléken. Là gomongen bè nili yóm bérs 4 efet kól bè bérs 16. Hono boluy yóm sfolò lewu kem tau nélék Musis mò na a hemkana bè benwu Kanan.

¹⁷ Bè yóm kehewót Musis kul yó kem tau hemkana yó koni, yó monen mò kul, “Bè yóm kógów ye ni, lenwót ye bè ni lan ye e mool efet ye gefet ditu bè bulul yóm benwu Kanan, omin ye hlós etu elem bululen.

¹⁸ Hnénég ye mò kmoen yóm benwu yó ne ke hilu tau menwu bè yó, ke tey le wen duhen ke là ne ke tedu yóm kmò kbegel le.

¹⁹ Hnénég ye mò kmoen yóm benwu yó ke hyu duhen ke sidek. Ne hnénég ye gónó le nô yó kem tauhen, ke nô le bè yó kem syudad wen beng hilolen duhen ke là.

²⁰ Ne yóm tonoken, hnénég ye ke mabù huluhen ne ke wen kem koyuhen. Bè yóm khusek ye edu hol hfól ye nawa ye ne bè yóm kulék ye, hol ye mit kut bungu yó kem koyu tmowok bè yó.” (Uma kóm bè yóm kdaw yó, bulón le mbut tógó yó kem bungu grép.)

²¹ Tahu se, subô le, na le e hnénég yóm benwu yó, nbut le bè yóm benwu laen dù tau nô du boluyen Dsin efet le kól etu bè yóm benwu boluyen Rihub moni bè yóm benwu Libu-hamat.

²² Lolò le e mool mius le bè yóm benwu boluyen Négéb efet le kól bè Hibron, yóm benwu gónó le menwu yó kem sfu Anak, le Ahiman ne Sisay ne Talmay. (Yóm benwu Hibron yó, deng hitu halayen ne mdà gu laanen là deng mdà yóm syudad Suan yóm syudad yó kem tau Idyip.)

²³ Tikóng le kól bè Datal Iskol, senfék le sotu kanguy grép. Tódô sfungu bunguhen nô du ne tey bong, botong le lewu semtihang du. Bud wen se kem dumu bungu koyu boluyen pumigrinit ne fig nwit le mulék.

²⁴ Yó gónó le moluy yóm benwu yó Datal Iskol, lemwót bè yóm hungu bungu grép senfék yó kem tau Israél bè yó. (Yó lanen “sfungu.”)

Yóm tulón le kól yó kem tau hemkana

²⁵ Timbow deng fat folò kdawen kegen le hmalak du yóm benwu Kanan yó kem tau hemkana yó, omin le bud mulék

²⁶ ebè le Musis ne Aron ne ebè yóm kdéen tau Israél tolo kmamfù bè Kadis glem lem Paran, yóm benwu laen hol wen tauhen. Gotu tulón le yóm kdê deng ton le ne gotu tolok le se yó kem bungu koyu nwit le mulék.

²⁷ Yó tulón le ke Musis, mon le, “Deng gotu bniwel me yóm klamang benwu Kanan gónóm e hógów kum, ton me tey tilob tonoken ne tey mabù kem huluhen. Ni dé yó kem dumu bungu koyu nwit me gu ditu.

²⁸ Okóm yó kem tau menwu ditu, tey le setgel ne tey lamang yó kem syudad le ne hono mbegel yó kem beng hilol le. Yó alì sidek du yóm ton me duhen yó kem ból Anak, hono kem tau alì lembang lel le tahà.

²⁹ Bè fi leged bè yóm benwu yó, wen yó kem tau Amalikayt nô du. Bè yó kem bululen, yó menwu du yó kem tau Hitayt ne yó kem tau Jibusayt ne yó kem tau Amurayt. Lemwót kul yó kem tau Kanan, nô le bè kilil mohin Miditiranyan ne hilol él Jurdan.”

³⁰ Bè yóm kungol kem tau Israél du yóm tulón le yó, tey sidek klikò le ne tey dê udél le. Okóm ke Kalib kun, yóm sotu bè yó kem tau hemkana yó nmoen, fen ten-gelen nawa le, monen mò kul, “Tódô géhél nundug tekuy lu yó kem tau Kanan yó, nwa tekuy tonok le kaem gbek tekuy lu yó kem tau yó.”

³¹ Okóm yó mon yó kem tau dumu Kalib hemkana, mon le, “Adéy, là kô gbek tekuy kul. Yó kem tau yó, tey le setgel senta tekuy.”

³² Omin le gotu semsból du lem blóng yó kem tau Israél yóm tulón gónón blat nawa le gbak ebè yóm benwu deng henkana le, mon le, “Tum benwu deng henkana me tu, là mowil tekuy du. Tódô ket tau ton me hono kem tau alì tahà tendo mit sgida.

³³ Gotu ton me snéen yó kem ból Anak, yó kem tau alì lembang lel le tahà. Bè yóm kton me kul, lómón kegnóm me du lómón ke tek kebang me kfadang. Ne déke lómón yó se yóm kul kton kum.”