Lista 12 - Udél Dwata: Gna Kesfasad ne Lomi Kesfasad

Ktafak Dwata ke Miryam

¹ Lemwót bè yóm kyehen Musis yóm libun tau Kusayt, yó nmò Miryam lewu le Aron, tey dê udél le etahen.

² Yó mon le, “Ilóem són ebè Musis kô gónó Dwata gel hlan du ke wen udélen? Igoen sem deng hlan du bélê me du?” Gotu gungol Dwata se yóm mon le yó.

³ Blaem nim Musis, tey tau hulung heglaan laen kô gemsenged du bè kdéen tau talak tonok yóm khulungen heglaan.

⁴ Timbow gungol Dwata yóm udél le yó koni, tódô kendel mudél ebè Musis tlu le Aron ne Miryam, monen mò kul, “Na ye mógów etu bè yóm dou Gónô yóm tlu ye.” Tahu se, lemwót le.

⁵ Bè yóm kkól le bè yó, mnaul Dwata mung bè yóm tey lobun btol gu tta ne mdà bè bak dól yóm Gónóen ne tnabahen Aron ne Miryam, monen, “Ó Aron ne Miryam.” Tahu se, hloni le yóm lewu le.

⁶ Ne yó mon Dwata mò kul, “Ni mò hnungol ye. Ke wen yó kem tugodu nô lem blóng ye, tódô wen yóm gel htonu kul ne gele stulón kul mlan bè kna le.

⁷ Okóm tólóng ke mudéle ebè Musis kun, yóm tóbóng lówóhu. Deng gotu sigangu tahen yó kem dou tau Israél.

⁸ Yó gónóm mon, ke stulón me tódô me suyó ne tey mtukul kestulón me, là hlanu du bè hléd. Deng tódô tonen yóm kmou. Kihol ye kóem mlos mudél etahen, yóm dou tóbóng lówó?”

⁹ Tey sidek kebut Dwata kul. Tódô tnagaken lu ne mdó se yóm lobun ta yóm Gónóen.

¹⁰ Tódô sen-geng Miryam se gemnóm du yóm des mifù, tódô baling tógó bukay lówóhen. Bè yóm kton Aron du yóm des mifù tódô tfeng bè lówó Miryam,

¹¹ botong monen mò ke Musis, “Ó Woli, uu se yóm gónó me mogot, hol béem abay hegfà kum nim tafak ni lemwót bè ungel me.

¹² Béem nmò bè yóm libun te nim ni. Yóm kbolok lówóhen, hol lómón ke ngà deng matay lem lówó yéen ne deng sóól lówóhen bolok bè yóm ksuten.”

¹³ Tahu se, tódô hgel Musis udélen mni bè Dwata, monen, “Ó Dwata, hol kóhem bè libun me yóm desen ni.”

¹⁴ Tahu se, bnalà Dwata yóm knihen. Yó udélen, monen, “Ke yó dum deng denfut maen lem uyóhen mò gónón hemyak du, botong hitu kdawen kegenen mbô du yóm kyaken yó. Duhen yó, na ye hlun hdó gu bè kamfù ye sotu fedyan, htólóng ye bè lewà. Sok deng yó, bud nit ye elem blóng ye.”

¹⁵ Tahu se, hdó le gu bè kamfù le Miryam ne hitu kdaw kegenen nô bè lewà. Là tagad nili le du yóm gónó le kmamfù yó kem tau ke là dengen bud kól lem blóng le Miryam.

¹⁶ Bè yóm kkólen lem blóng le, bud kewót le bè yó bè Hasirut ne yó bud gónó le kmamfù bè yóm benwu laen hol wen tauhen boluyen Paran.