Lista 11 - Udél Dwata: Gna Kesfasad ne Lomi Kesfasad

Yóm benwu Tabira

¹ Nbut le bè yó ne yó kem tau Israél tmalaw du ebè Dwata yóm keglayam le. Bè yóm kungol Dwata du yóm ktalaw le yó, ya tey sidek kebuten kul botong hemwit ofi elem blóng le ne gotu ntemen sfu yóm kamfù le.

² Lemwót bè yóm tey ofi yó, gotu le lemangat mni tóbóng bè Musis yó kem tau. Tahu se, mni bélê le bè Dwata Musis, tódô mnà se yóm ofi.

³ Ne yó gónó le moluy du Tabira yóm benwu yó abay se bè yó gónón mken lem blóng le yóm ofi Dwata.

Kélék Musis yóm hitu folò kem tau mò malak

⁴ Bè yóm kehewà le gu bè Idyip yó kem tau Israél, wen kem tólóng tau mung kul. Tey sidek kélék lihol le. Ne balù yó kem tau Israél gbót le tmalaw se kul, yó mon le, “Yake wen utón tekuy dé ni.

⁵ Yake yóm tehe knô tekuy bè Idyip, tey tehe gel kutón tekuy utón él ne là kô benli tekuy du. Tey gel wen tu kem timun ne sgiten ne ksuna kufil ne dumu ksuna ne ahos.

⁶ Okóm ni, tek són nim mana tendo senflós ken tekuy ket kdaw ne laen dù bud óyô iwol tekuy du.”

⁷ Nim mana mon le ni, hol skél bè yóm lem hulu alì lemnek malù bukay mélél.

^8-9 Tódô hgasà gu hmilol yóm kamfù le ke kifu mung bè amù. Ke sok hlafus, gotu le hewà yó kem tau na le e mulut. Yó kmò le du, wen se gnaling le ne wen se ndek le efet baling arina, omin le hkodok du ne nmò le mambang lufi. Lómó kmò nómen yóm mambang wen hnolo uliben.

¹⁰ Gotu gungol Musis yóm udél le tmalaw yóm kdéen tau bè yóm igò le sbung mdà bè bak dól yóm gónô le. Tey sidek kegnómen du abay se tngónen deng bud lenbut Dwata lu

¹¹ ne yó monen mò ke Dwata, “Moen ni du, Dwata, ke alì sidek kmoem ebéléu? Moen ni du ke là hligali ebéléu? Moen du ke sigangem tahu ni kem tey tau wen nii?

¹² Là kô ou du tehe mò kul ne là se ou du tehe mngà kul. Moen du, Dwata, ke ou fen hesegyokem kul? Hol lómón ke hsiwihem do ni kem tau ni efet le kól bè yóm benwu tehe fasadem yó kem tehe fù le.

¹³ Gónów tô ma utón du mò hutónu kul ni kem tau ni? Sónmò le tmalaw là mutón.

¹⁴ Là kô gbeku mit kul ni kem kdê tau ni ke tek són ou. Tey gedlug nim hbóem dou ni.

¹⁵ Ke seflós lómón ni tô hmoem do hol henkoduhu béléem, tódô hnatayem o ni ne anì là bud gnómu du yóm alì ksidek keblat yóm hbóem do.”

¹⁶ Omin Dwata bud mudél ebè Musis, monen, “Semtifuni hitu folò bè yó kem tau malak yó kem tau Israél, yó kem tau hol nadat le. Nwitem lu ebéléu dini bè dou Gónô ne hdaem lu klohokem.

¹⁷ Mnaule elaan naw e stulón kóm bè yó. Wen yóm Tulusu tehe suu béléem, wen nwahu bè yóm Tulusu yó mò suu bélê le anì yó, tnóbóng le uu fen malak kul ni kem tey tau ni anì là tek són du uu fen malak kul.

¹⁸ Ne ni, eles hetngónem bè yó kem tau, hol le eles hólós abay se haya wen utón le. Tulónem kul deng gungolu yóm tey ktalaw le du yóm klaen dù utón le ne yóm tendo gel kmon le du hyu klowil le kun bè yóm tehe knô le bè Idyip. Ne ni, wen utón blayu kul, hol ken le.

¹⁹ Nim utón blayu kul ni, là olon tek sendaw kutón le du duhen ke lewu kdaw duhen ke limu kdaw duhen ke sfolò kdaw duhen ke lewu folò kdaw.

²⁰ Okóm sbulón le mutón du, ngangen efet tembul iwol le ne laen bud óyô le du. Yó gónóhu mò du nim ni abay se deng kenbê le ou, yóm sana kul Dwata hol gónó mogot, yóm tendo gel mung kul. Lel le msel do bè yóm ktebel le yóm benwu Idyip.”

²¹ Bnalà Musis yóm udél Dwata, monen, “Bong ni yóm tey nem latu libu logi nalaku ni, ke olohem tô bemlay kul utón sfeng bè sbulón?

²² Baluen ke mom hilu safì ne ubiha mò tnétê bélê le ni kem tau ni là kô le gemtu du. Baluen ke mom gotu guta te kdéen utón lem mohin là kóen na a kóyów bélê le he.”

²³ Ne yó balà Dwata du yóm udél Musis yó, monen, “Wen kô yóm là gbeku du? Móyón tonem ne ke tahu duhen ke là ni kem monu ni.”

²⁴ Ne omin Musis hewà bè yó nan e gotu hetngón yó kem tau yóm deng mon Dwata mò du. Wen hitu folò bè yó kem tau gónó le gel galak sentifunen ne gotu hdaen lu hilol yóm Gónô Dwata.

²⁵ Omin Dwata mnaul elaan mung bè lobun ne mudél ebè Musis. Wen nwahen bè yóm Tulusen deng tehe suen bè Musis ne bud suen bè yó kem hitu folò tau malak yó koni. Timbow gefet bélê le yóm kehtulus Dwata kul yó, tódô gotu tulón le yó kem udél htugod Dwata kul lómón yóm kul gel nmò yó kem tugod Dwata, bede tek són yó kmò le du.

²⁶ Wen lewu bè yóm hitu folò kem tau malak yó koni tebel bè kamfù, là gógów le etu bè Gónô Dwata. Yó boluy le Éldad ne Midad. Timbow gefet bélê le ditu bè kamfù yóm kehtulus Dwata kul, tódô tulón le se kul yó kem udél htugod Dwata kul lómón yóm kul gel nmò yó kem tugod Dwata.

²⁷ Wen sotu ngà logi hmungol kul ne tódô mlóy ebè Musis nan e tulón du yóm nmò le Éldad ne Midad.

²⁸ Omin Juswa hebkó mudél yóm ngà Nun. Du se yóm gel tóbóng lówó Musis nbuten bè yóm hanà klomihen tau. Yó udélen ebè Musis, monen, “Tenflokem lu, Sér.”

²⁹ Bnalà Musis se, monen, “Fen tô nalihem kô yóm kwalisu tmugod ke Dwata? Hyu nawahu dou ke tódô gotu htulus Dwata yóm kdê tauhen anì gotu le baling tau tugod Dwata.”

³⁰ Omin le gotu mulék ebè kamfù le le Musis ne yó kem tau malak yó kem tau Israél.

Kehwit Dwata ebélê le holò

³¹ Bè yóm deng kkól le Musis bè kamfù le, tódô sen-gengen se wen lenos hbel Dwata gu bè mohin gónón gmung yó kem tey holò wen. Wen dô kól lem ówók kegeta nóyóng le talak tonok. Gotu le lememek elem kamfù le ne gu hilolen. Balù kihu gónó le tô e solu yó kem tau gu hilol kamfù le, balù ke sendaw le mógów tódô hono holò ton le.

³² Duhen yó, kewóten bè yóm kdaw yó efet knoyungen kifu bud glakiten kdaw hayahen, sónmò le kemfô holò yó kem tau. Laen dù bélê le ke là gefeten lemibu kilu yóm guta le. Yó kmò le du, tódô snafuk le ne hendaw le gu hilol yóm kamfù le.

³³ Bè yóm tolo lel le mutón du, tódô sut bélê le yóm kebut Dwata kul ne wen des mekto hwiten ebélê le.

³⁴ Ne yó gónó le moluy du Kibrut Hataba yóm benwu yó. Yó lanen yóm udél yó, “Gónó lembeng yó kem tau mélék lihol le,” abay se bè yó gónó le lembeng kul yó kem tau alì mélék lihol le.

³⁵ Bud kewót le bè yó, yó kem tau Israél, hlós le etu bè Hasirut ne bè yó bud gónó le na kmamfù.