Lista 10 - Udél Dwata: Gna Kesfasad ne Lomi Kesfasad

Ktebel kem tau Israél yóm Bulul Sinay

³³ Timbow tebel yó kem tau Israél yóm bulul Sinay yóm bulul Dwata, tlu kdaw le bud mógów omin le bud kmamfù. Bè yóm kógów le, sal gel tukô gna kul yó kem tau gel mit yóm Slungan Fasad gónón nô yóm deng fasad Dwata kul mò hetngón du kul yóm gónó le bud kmamfù.

³⁴ Bè ket kógów le, tódô senflósen tendo nô ta le yóm lobun Dwata ke kemdaw.

³⁵ Kesok bang le gel hewót du yóm Slungan Fasad tukô gna kul yó, yó gel udél Musis, monen, “Yó ne, Dwata, tukói gna kum. Gotu senklahem lu yó kem hohonem, gotu hlóyem lu yó kem tau kmutó nawa kóm.”

³⁶ Ne kesok htengen mdà se yóm Slungan Fasad yó, yó bud udél Musis, monen, “Yó ne, Dwata, budi semfulék elem blóng yó kem hilu libuhen fes lówó yó kem tau Israél.”