Lanu Jirimaya 3 - Udél Dwata: Gna Kesfasad ne Lomi Kesfasad

Lanu Jirimaya

¹⁹ Tey sidek khééten béléu yóm tendo keglayamu ne yóm klaen dù gónóhu nô.

²⁰ Efet katayu là kô naw e klifót du yó kem kdawu alì glayam, tey sidek kegnómu du.

²¹ Igou hemdem du yóm kgelen, bud gehedemu yóm kwen nefet nawahu,

²² duhen yóm kbong nawa Dwata tekuy laen kô dù nan e són. Lemwót bè kkoduhen tau là sulék le matay bè yóm tey kwen glumfak le.

²³ Là gbekem hmingón du yóm tey kteneb Dwata bélê tekuy. Yóm kkoduhen tekuy, ket hlafusen tendo lomi.

²⁴ Yó mon nawahu, “Tek són Dwata se yóm là lanahen béléu. Yó gónóm mon, du se nefet nawahu.”

²⁵ Tey hyu yóm Dwata bè yó kem tau hemdón du ne mebel du.

²⁶ Yó gónóm mon, tey hyu ke tódô tekuy henek, nangat tekuy yóm kegewà lemwót béléen.

²⁷ Ne tey hyu bè yó kem lomi lemnok ke henmóyô le yóm hdalang Dwata kul. Là gomongen bè nili yóm tsaptér 3:28 kól bè tsaptér 5:22. Yó tulónen bè ni yó kem hlau Jirimaya ke wen yó kem hlayam sut. Yóm Dwata tey hulung kmodu, là kô nan e tódô bayà tekuy. Gotu tngónen yóm kdéen bè tau. Bud tulónen yóm deng kmò yóm syudad Jirusalim kogol yóm kehegbà Dwata du yó kem hohon le lemwót bè salà yó kem tauhen. Hol néen yóm salà yó kem tugoden ne yó kem tau gel blóng ebéléen. Yó kem tey blówón bè yó, laen dù bud ktataw le, ne yó kem botu bè Gónô Dwata deng le gotu masà bè lan. Deng le baling temfólól ken myón bè yó kem lan. Yó kem tau tehe gmónô bong, deng le mebel ken desenfól. Baluen ke mlóy le etu lem bulul, bud ktes le lu yó kem hohon le. Kogolen bè yó, tey kehkodu le bè Dwata. Tulón le du yóm tey khééten bélê le yóm glumfak le. Deng nwa kem tólóng tau bélê le yóm kdê deng nfun le, lómón ke hikit le. Glok le mógów ebè Idyip ne ebè Asirya na le e mni ken ditu. Tey keheblat le du yóm hmò le kul, baling hesek le lu ne laen dù gembek hewà kul. Deng tey sidek kegnóm le du là gbek le du ke là bud tnóbóng Dwata kul.