Kun Snulat Luk 3 - Udél Dwata: Gna Kesfasad ne Lomi Kesfasad

Ktolok yóm Jan gel mabtays

¹ Deng sfolò limu halayen ne kegen Tibiryus mogot yóm klamangen benwu. Du se yóm hol tau hol geta bélê le nô bè Rom. Yó gubérnor bè prubinsya Judiya yóm sotu tau lemwót bè Rom boluyen Puntyus Paylét. Ne hkemen ke Hirod yóm prubinsya Galili. Ne lemwót yóm twoli Hirod boluyen Filip, hkem Tibiryus du yóm lewu prubinsya boluyen Ituriya ne Trakunitis. Ne hkemen ke Lisanyas yóm sotu prubinsya boluyen Abilin.

² Ne bè Jirusalim, wen lewu tau hol geta bè yó kem tau gel demsù ebè Dwata, boluy le Anas ne Kyafas. Bong ke Jan kun, yóm ngà Sekariya, tódô nô bè yóm benwu laen dù tau menwu du. Ne bè yóm kdaw yó, wen udél Dwata ebéléen.

³ Yó gónó Jan tendo mógów lem blóng yó kem tau menwu tmubé yóm él boluyen Jurdan, wen hetngónen kul, monen, “Hegsel ye ne, knogol ye yó kem sidek gel nmò ye ne hbabtays ye, ne hnifót Dwata salà ye.”

⁴ Nim nmò Jan ni, hol lómón se yóm tehe snulat Isaya, yóm sotu tehe gna tugod Dwata ekni, yóm monen, “Wen sotu tau tmaba gu bè yóm benwu laen dù tau menwu du. Yó utóm yóm tabahen, monen, ‘Eles hen-gifat ye mò lan yóm gónó tekuy mogot, hol tnedeng ye yóm lan mò loloen.

⁵ Sendatal ye tu kem gónón lebsong, ne sentunal ye tu kem bululen. Hentedeng ye tu kem gónón kigù, ne sentódô ye tu kem gónón sebesuk.

⁶ Angat hegfan Dwata bè kdéen tau yóm kmò kehewaen kul gu lem hatay.’”

⁷ Tey tau wen tendo mógów ebè Jan na le e hbabtays du. Okóm yó gel mon Jan mò kul, “Ya nim yu, deng ye mkél bè ulal, gel hemlóy ofi. Ilóu ofo kuy ke tô ye gewà lemen yóm angat tafak Dwata tau ke olo ye hbabtays.

⁸ Ke deng knogol ye yó kem sidek gel nmò ye, hol hegdilô ye bè kmò ye. Ne bê ye abay tô ken-gel nawa yóm kesfu ye gu bè yóm tehe Abraham. Tódô tulónu kuy, balù ni he kem botu nii, botong gbek Dwata hembaling du tau mò semfu gu bè Abraham.

⁹ Ke hlingónu du yóm móyón ktafak Dwata kuy, hol lómón ke beyung deng eles mléd lem but yó kem koyu mò angat sfeken kul. Ket koyu là gulit kbunguhen, angat senfeken, ne tódô legas elem ofi.”

¹⁰ Ne yó gel snólók le bè Jan yó kem tau, mon le, “Ke lómón yó kmoen, tedu de kmò me du?”

¹¹ Ne yó mon Jan mò kul, “Yóm tau lewu kun kgal, blayen yóm sotuhen bè yóm tau laen dù kun. Ke wen ken yóm sotu tau, hyu ke benlayen yóm laen dù kun.”

¹² Wen bè yó kem tau gel mtuk bwis mógów ebè Jan anì na le e hbabtays du. Yó snólók le béléen, mon le, “Ó Sér, tedu kmò me se kum du?”

¹³ Ne yó balà Jan kul, monen, “Bê ye abay gel nmò uléhen yóm gel ntuk ye.”

¹⁴ Dalang se yó kem sendalù, wen se kul snólók bè Jan, mon le, “Kmò kum du? Tedu de nmò me?” Ne yó balà Jan kul, monen, “Bê ye abay tódô gmaga filak bè yó kem tau, ne bê ye abay tódô tmifù kéng. Ne bê ye gel nalum se sukéy ye.”

¹⁵ Yóm igò le hmungol ke Jan yó kem tau, mom bud temnù kehdón le du yóm Misaya. Ofo kul mon du ke deng duhen Jan.

¹⁶ Okóm yó udél Jan ebélê le, monen, “Béléu do, él gel babtaysu kuy. Okóm wen móyón sut hol mfasang sentahu. Là kóe knóón baluen ke olohu hesek béléen. Yó kun kmò kbabtays yó kem tau mimón béléen, suen bélê le yóm Tulus Dwata. Bong yó kem tau là mimón le, ofi moen kul.

¹⁷ Hol lómón ke eles wen teef nwiten mò gónóhen tmeef du yóm angat knusuhen, ne otunen eta fol yó kem osoken. Lemwót yóm kafahen, ntemen. Ne yóm ofi gónón mtem du yó, ofi laen kô dù tul katayen.”

¹⁸ Bè yóm ktolok Jan yó kem tau, tey dê kmò kehefengen du yóm Tulón Hyu lemwót bè Dwata. Yó hol kóyóen ke tenles le kmò le.

¹⁹ Balù Gubérnor Hirod, sana kbólów Jan du yóm lanen malaw ke Hirudiyas, yóm yehen twolihen. Ne tey dê he yó kem dumu sidek nmò Hirod eddoli.

²⁰ Bede yó alì sidek du yóm nmoen, duhen yóm keheblangguen ke Jan.

Kehbabtays Jisas ke Jan

²¹ Timbow deng kehbabtays le ke Jan yó kem tau, omin Jisas sut se kun nan e hbabtays du. Timbow deng yóm kehbabtaysen, ominen mni bè Dwata, ne tódô henmungen se hnas longit,

²² ne tódô htuntun etahen gu tta bè longit yóm Tulus Dwata, hol lómón kmoen obun. Ominen wen se mudél gu bè longit, monen, “Uu se yóm hol dou Ngà tendo gónóhen nô nawahu. Tey kligalu béléem.”

Yó kem tau tehe gónó Jisas gu semfu

²³ Deng tlu folò ne halay Jisas yóm kbuten mò du yóm nmoen. Bè kul khedem du yó kem tau, Jusif yóm hol kun mà. Yóm Jusif, ngà Hili.

²⁴ Yóm Hili, ngà Matat. Yóm Matat, ngà Libay. Yóm Libay, ngà Milki. Yóm Milki, ngà Janay. Yóm Janay, ngà yóm sotu Jusif.

²⁵ Yóm Jusif, ngà Matatiyas. Yóm Matatiyas, ngà Amus. Yóm Amus, ngà Nahum. Yóm Nahum, ngà Isli. Yóm Isli, ngà Nagay.

²⁶ Yóm Nagay, ngà Mat. Yóm Mat, ngà yóm sotu Matatiyas. Yóm Matatiyas, ngà Simin. Yóm Simin, ngà Jusik. Yóm Jusik, ngà Jóda.

²⁷ Yóm Jóda, ngà Juhanan. Yóm Juhanan, ngà Risa. Yóm Risa, ngà Sirubabél. Yóm Sirubabél, ngà Syaltil. Yóm Syaltil, ngà Niri. Yóm Niri, ngà Milki.

²⁸ Yóm Milki, ngà Adi. Yóm Adi, ngà Kusam. Yóm Kusam, ngà Ilmadam. Yóm Ilmadam, ngà Ir.

²⁹ Yóm Ir, ngà Juswa. Yóm Juswa, ngà Ilisar. Yóm Ilisar, ngà Jurim. Yóm Jurim, ngà yóm sotu Matat. Yóm Matat, ngà yóm sotu Libay.

³⁰ Yóm Libay, ngà Simyun. Yóm Simyun, ngà Juda. Yóm Juda, ngà Jusif. Yóm Jusif, ngà Junam. Yóm Junam, ngà Ilyakim.

³¹ Yóm Ilyakim, ngà Milya. Yóm Milya, ngà Mina. Yóm Mina, ngà Matata. Yóm Matata, ngà Natan. Yóm Natan, ngà Dabid.

³² Yóm Dabid, ngà Jisi. Yóm Jisi, ngà Ubid. Yóm Ubid, ngà Buas. Yóm Buas, ngà Salmun. Yóm Salmun, ngà Nasun.

³³ Yóm Nasun, ngà Aminadab. Yóm Aminadab, ngà Admin. Yóm Admin, ngà Arni. Yóm Arni, ngà Hisron. Yóm Hisron, ngà Pérés. Yóm Pérés, ngà Juda.

³⁴ Yóm Juda, ngà Jakub. Yóm Jakub, ngà Isak. Yóm Isak, ngà Abraham. Yóm Abraham, ngà Tira. Yóm Tira, ngà Nahor.

³⁵ Yóm Nahor, ngà Sirug. Yóm Sirug, ngà Ru. Yóm Ru, ngà Pilig. Yóm Pilig, ngà Ébér. Yóm Ébér, ngà Sila.

³⁶ Yóm Sila, ngà Kinan. Yóm Kinan, ngà Arfasad. Yóm Arfasad, ngà Sém. Yóm Sém, ngà Nuwa. Yóm Nuwa, ngà Lamik.

³⁷ Yóm Lamik, ngà Mitusila. Yóm Mitusila, ngà Inuk. Yóm Inuk, ngà Jaréd. Yóm Jaréd, ngà Mahalalil. Yóm Mahalalil, ngà Kinan.

³⁸ Yóm Kinan, ngà Inos. Yóm Inos, ngà Sét. Yóm Sét, ngà Adam. Yóm Adam, ngà Dwata.