Kun Snulat Luk 2 - Udél Dwata: Gna Kesfasad ne Lomi Kesfasad

Yóm ksut Jisas

¹ Bè yóm hanà tolo kegenen du Agustus ekni, yóm tau hol geta bélê le nô bè syudad Rom, wen udin lemwót béléen. Kwadagen tau bè klamangen yóm kun benwu nogot gotu le na a hsulat boluy.

² Ni he yóm tanay na le e kehsulat boluy. Bè yóm kdaw yó, Kirinyus gubérnor bè Sirya.

³ Tódô kdéen tau na a gotu hsulat boluy bè yóm benwu tehe fù le.

⁴ Yó gónó Jusif mógów se kun lemwót bè Nasarit, yóm sotu benwu lemnek snakuf prubinsya Galili, subô le ebè Bitlihim, yóm sotu benwu snakuf prubinsya Judiya. Nim Bitlihim ni, tehe kun benwu Dabid, yóm sotu tau tehe geta bélê le. Yó gónó Jusif mógów ebè yó, abay se semfu gu bè tehe Dabid se kun.

⁵ Slomong le Jusif Midi, yóm libun deng lenintihen, na le e hsulat boluy. Blaem deng mlutut ne Midi.

⁶ Yóm igò le nô bè Bitlihim, tódô kulel se ksut yóm bnututen.

⁷ Logi yóm ngaen, hol tebà lówóhen. Wen nes bausen du, ne heflililen ta yóm gónó le gel hemsù ken kudà, abay se là bud wen gónó le nô lem yóm gónô gónó le gel mefet tungô yó kem tau mógów.

Yó kem hógów Dwata ne yó kem mentey ubiha

⁸ Bè yóm benwu yó, wen kem tau gel semgyok ubiha ditu lem bnes.

⁹ Bè yóm kifu ksut Jisas, tódô sut lem blóng le yóm hógów yóm gónó le mogot gu bè longit. Tey kehlayag Dwata du yóm gu hmilol kul, ne ya tey sidek klikò le.

¹⁰ Okóm yó mon yóm hógów Dwata mò kul, “Bê ye abay mom hlikò. Wen hyu naw e tulón kuy yóm angat hnigal kdéen tau.

¹¹ Deng sut kifu ni bè benwu yóm tehe Dabid yóm tau angat lemwà kuy gu lem hatay. Du se Krays, yóm gónó ye mogot.

¹² Ni mò ilô yóm ktahuhen yóm deng tulónu kuy ni, angat wen ngà ton ye bnaus le nes, heflilil le bè yóm gónó le gel hemsù ken kudà.”

¹³ Na, tódô kendel ton yó kem tau semgyok ubiha yóm tey genged hógów Dwata gu bè longit. Ya tey kwen le, semngal le, dóyón le Dwata, mon le,

¹⁴ “Hol dóyón tekuy yóm Dwata nô bè yóm hol són longit geta. Ne hol wen kenek nawa kem tau te tonok, yó kem tau gel hefligal ke Dwata.”

¹⁵ Tikóng le deng mulék ebè longit yó kem hógów Dwata yó, omin le stulón yó kem tau semgyok ubiha, mon le, “Lemwót tekuy ne ebè Bitlihim, na tekuy e tenngel yóm deng hetngónen tekuy yóm gónó tekuy mogot.”

¹⁶ Tahu se, tódô le kendel hetlagad lemwót, ne sut le bè Midi ne Jusif, ne ton le yóm ngà hlilil ta yóm gónó le gel hemsù ken kudà.

¹⁷ Bè yóm kton le du, tódô gotu tulón le yóm deng monen mò kul yóm hógów Dwata gbak ebè nim ngà ni.

¹⁸ Gotu le tnga yó kem tau mungol du nim tulón le ni.

¹⁹ Bong ke Midi kun, tódô suen bè nawahen ni kem tulón le ni, ne tendo gel hendemen.

²⁰ Omin le gotu mulék yó kem semgyok ubiha. Ya tey kesngal le, dóyón le Dwata bè yóm deng gungol le ne bè yóm deng ton le. Tódô tahu edu yóm deng tulónen kul yóm hógów Dwata.

Kmò le boluy yóm ngà

²¹ Timbow deng sotu fedyanen sut yóm ngà yó, omin le htulì du. Yó boluy le du Jisas, yóm boluy tehe tulón yóm hógów Dwata gu bè longit hnikót là deng bnolu yéen du he.

Kehliton le ke Jisas ebè Dwata

²² Timbow deng gefet yóm kdaw klolò Jusif ne Midi yóm sotu hlau Musis bè yóm khólós yóm libun lomi meslóng, yó he kógów le ebè Jirusalim. Nwit le Jisas na le e hliton ebè Dwata.

²³ Ulit le bè yóm sotu hlau Dwata, yóm monen, “Ke logi yóm ngà tebà lówó yéen, hol hliton ye.”Ne bud nulit le snéen yóm sotu hlau Dwata bè yóm gel kedsù le, yóm monen, “Yó mò dsù ye, lewu obun duhen ke lewu yóm kfati hanà lomi lemnok.”

²⁴ Ne bud nulit le snéen yóm sotu hlau Dwata bè yóm gel kedsù le, yóm monen, “Yó mò dsù ye, lewu obun duhen ke lewu yóm kfati hanà lomi lemnok.”

²⁵ Bè yóm kdaw yó, wen sotu tuha logi nô bè Jirusalim boluyen Simyun. Nim tau ni, tedeng knawahen, ne tey klikoen ke Dwata. Sal gel nangaten yóm kehewà Dwata kul yó kem tau Israél. Tendo nô béléen yóm Tulus Dwata,

²⁶ ne deng eles hetngónen du yóm là tagad katayen ke là nan ne ton yóm Misaya, yóm deng tehe fasad Dwata kul mò hkamalen yóm klamangen.

²⁷ Bè yóm kdaw kul kógów le Jusif, kulel se kun khusek ke Simyun elem yóm Gónô Dwata lemwót bè yóm kalaken du yóm Tulus Dwata. Geslaen se yóm kwit le ke Jisas elemen yó kem tuhahen na le e nmò béléen yóm deng hlau Dwata kul.

²⁸ Timbow ton Simyun yóm ngà yó, henmung sniwihen, ne dóyónen Dwata, monen,

²⁹ “Ó Dwata, deng dohò ne yóm tehe fasadem do, ne bong menek kegnómu du. Bang khukolem towoku ne.

³⁰ Deng tonu ne yóm tau deng eles nélékem mò lemwà yó kem tau lem hatay,

³¹ yóm deng tgamahem bè yóm kdéen tau.

³² Du henged layag mò hegfan yóm kóm kóyô bè yó kem dumu tau là Ju le, ne bud du se gónón lemwót yóm angat kdóyón le kum mi kem tau Israél.”

³³ Ya tey ketnga yó kem tuha Jisas yóm kungol le yóm mon Simyun gtóng ebè yóm ngà le.

³⁴ Omin Simyun mni bè Dwata bélê le. Ne ominen mon du mò ke Midi, yóm yê Jisas, monen, “Nim ngà ni, deng eles nélék Dwata mò gónóhen lemwót tmafak yó kem dumu tau Israél, ne mò gónón lemwót lemwà kul gu lem hatay yó kem dumu. Du se ilô lemwót gu bè Dwata, okóm angat tey dê tau semkbê du.

³⁵ Ne bè yóm kekbê le du, yó se gónón gfan yóm kul kehedem gel gbuni bè dumu tau. Ne uu yóm yéen, angat tey sidek kegbeng lemem du snéen kóm bè yóm nmò le béléen. Angat lómó kegnómem du, lómón ke tenbek le sudeng bè kfuhem.”

^36-37 Wen se libun tugod Dwata nô bè yó snéen, boluyen Ana, ngà Fanwél, sotu tau semfu gu bè yóm tehe Asér. Nim libun ni, wen tehe yehenen bè yóm hanà klomihen tau, okóm deng matay. Tek hitu halay le syehen yóm ktebel tuha logihen du. Ni ne deng wolu folò fat halayen. Ne sana kheneken bè Gónô Dwata. Là skóhen yóm tendo gel kdóyónen ke Dwata, keten kdaw ne keten kifu. Wen se kdawen gel fasting anì mekteng knihen bè Dwata.

³⁸ Bè yóm uras yó, tódô gesmangen se kun yóm ngà yó bè Gónô Dwata, ne gbót dóyónen Dwata. Kewóten bè yó ne tendo tmulón yóm ngà ebè yó kem tau tendo gel mangat yóm angat kehewà Dwata yó kem tau Israél.

Kulék le Jusif ebè Nasarit

³⁹ Timbow deng gotu nmò Jusif ne Midi yó kem hlau yóm gónó le mogot, omin le yó he bud mulék ebè yóm sana kul benwu bè Nasarit snakuf Galili.

⁴⁰ Ngangen ne lemnok yóm ngà, ne kemgis lem lówóhen, ne tey temngón. Ne tey kuyag Dwata du.

Knô Jisas bè Gónô Dwata bè Jirusalim

⁴¹ Ket halay le gel mógów ebè Jirusalim yó kem tuha Jisas, gel le mung bè yóm mò ken bong bè yóm Kdaw Khius.

⁴² Tikóng deng sfolò lewu ne halay Jisas, bud le subô ebè Jirusalim, sana kul gel nmò, ne mung kul Jisas.

⁴³ Tikóng le deng skas gu bè yóm mò ken bong yó, mulék le ne yó kem tuha Jisas, fen tagak ke Jisas kun. Là dog tngón kem tuhahen du yóm ktagaken yó.

⁴⁴ Ofo kul ke deng mung bè yó kem dumu le tehe lemwót gu bè Nasarit. Deng sendaw le ne mógów, omin le yó he mebel ke Jisas lem blóng yó kem dumu le setwoli ne lem blóng yó kem wè le.

⁴⁵ Okóm là se dog ton le du. Omin le yó bud haking mulék ebè Jirusalim na le e hnebel ditu.

⁴⁶ Bè getluhen kdaw, ton le lem Gónô Dwata, myón lem blóng yó kem tau gel tmolok hlau. Hnungolen lu, ne wen se gel snólóken bélê le.

⁴⁷ Tey ketnga le du yó kem hmungol du bè yóm khulungen malà kul.

⁴⁸ Tikóng ton yó kem tuhahen, tey ketnga le du yóm keseyónen bélê le bè yó. Mudél ebéléen yéen, monen, “Ó Sól, moen ke ni nmoem bélê me? Tey klóngón me mebel kóm maem.”

⁴⁹ Omin Jisas malà kul, monen, “Moen de ke hnebel ye ou? Là tngón ye du kô yóm naw na knô bè gónô Mà?”

⁵⁰ Okóm là kô gtukul le du lanen yóm balaen kul yó.

⁵¹ Omin Jisas mung kul mulék ebè Nasarit, ne sal gel nimónen lu. Ne tódô kem hnô yéen bè nawahen ni kem ni.

⁵² Ngangen ne lemnok Jisas, ne tendo temnù se yóm ketngónen. Ne tendo hyu nawa Dwata ebéléen, dalang se yó kem tau.