Kun Snulat Jan 9 - Udél Dwata: Gna Kesfasad ne Lomi Kesfasad

Kehton Jisas yóm tau butô

¹ Bè yóm igò Jisas tolo mógów, wen tau butô tonen. Yóm kbutóen yó, tódô mung du bè ksuten.

² Ne snólók le bè Jisas yó kem gel lemolò du, mon le, “Ó Sér, moen ke butô lemwót bè ksuten nim tau ni? Mahi du yóm wen salaen, du kô, duhen ke yó kem tuhahen?”

³ Mon Jisas se, “Là. Là kóen lemwót bè kun salà duhen ke bè salà kem tuhahen. Yó gónón butô nim tau ni anì gfan béléen yóm kfasang Dwata.

⁴ Yóm tolo knóu lem benwu,” mon Jisas, “lómón ke tolo mnóng kdaw. Tnana tekuy mò du yóm kun kóyô yóm hógów do, abay se ke sok deng kifu, laen kô dù tau bud mò nmò ne.

⁵ Bè nim tolo knóu lem benwu,” monen, “ou se yóm layag mò hlayag yó kem tau lem benwu.”

⁶ Timbow deng kudél Jisas, ominen dmulak bè tonok ne sninaen yóm dulaken, ne ominen lemumang du bè mata yóm tau butô

⁷ ne monen mò du, “Lemwóti ne, nam e mouf bè busung Silom.” (Yó lan nim Silom ni, “Hógów.”) Ne tahu se, lemwót yóm tau butô yó nan e mouf. Timbow deng koufen, tódô mton se ne tódô mulék ebè gónóen.

⁸ Timbow ton yó kem tau dumuhen sebét yóm deng ktonen, ya tey ketnga le du. Senged se kul yó kem tau tehe hónô gel mton du yóm gel ketfólólen bè kem dumun tau, botong mon le, “Là ni du kô yóm tau tehe butô tendo gel myón temfólól bè yó kem tau?”

⁹ Wen se mon du, “Duhen ni se.” Okóm mon kem dumu, “Sundu. Abay sem skél le.” Ne monen se kun yóm tau yó, “Ou se yóm tehe butô.”

¹⁰ Ne bud mon le mò du, “Tedu kmò ktonem du?”

¹¹ Ne monen se mò kul, “Yó sem tau boluyen Jisas hton dou. Yó kmoen du, sninaen yóm tonok ne lumangen bè matahu, ne ominen mdók dou na a mouf bè Silom. Ne tahu se, naw e mouf ne tódóe se mton.”

¹² Ne bud mon le mò du, “Gónón nô se yóm tau monem yó?” Ne monen se kun, “Là bud tngónu du.”

Ksólók kem Farisi yóm tau tehe butô

¹³ Ne omin le tódô mit du ebè yó kem Farisi yóm tau tehe butô yó koni.

¹⁴ Abay se bè yóm keslinà Jisas yóm tonok, ne kehtonen yóm tau tehe butô yó, nmoen bè Kdaw Kehegnô.

¹⁵ Omin le smólók du se kul yó kem Farisi, mon le, “Tedu kmò ktonem de?” Monen se kun yóm tau tehe butô yó, “Wen tau hemsù tonok minà bè matahu, ominu mouf ne tódóe mton.”

¹⁶ Wen se bè yó kem Farisi mon du, “Là lemwóten bè Dwata yóm tau hton kóm yó, abay se nmoen bè yóm Kdaw Kehegnô.” Okóm yó mon kem dumu tau, “Ke tau gemsalà yóm tau yó, là kô gbeken mò du yó kem tey dê hentaw ton nmoen.” Tey kesgólól nawa le yó kem tau bè yó.

¹⁷ Ne bud snólók yó kem Farisi yóm tau tehe butô yó, mon le mò du, “Tedu kmò kóm kehedem du yóm tau tu? Abay se u yóm deng htonen.” Monen se kun, “Hol tahu tugod Dwata tum tau tu.”

¹⁸ Okóm yó kem Ju wen glal le bè yó, là kô dog hentahu le du yóm tehe kbutô yóm tau yó koni, ne yóm deng bud ktonen. Yó he kehtahu le du yóm deng khangay le kem tuhahen, ne snólók le bélê le, mon le,

¹⁹ “Kuy ngà kô ni? Tahu butô lemwót bè ksuten kô? Tedu kmò ktonen ni du?”

²⁰ Omin le malà du se kul yó kem tuhahen yóm tau tehe butô yó, mon le, “Tngón me ni se kum ngà, ne tngón me se butô lemwót bè ksuten.

²¹ Okóm là tngón me du kum yóm deng ktonen ni. Ne là tngón me du snéen yóm tau deng hton du. Tódô snólók ye béléen, yakà sem dengen malù tmuha, gbeken malà kuy ke wen snólók ye béléen.”

²² Yó gónó le mon du yóm mon le yó, abay se likò le yó kem Ju wen glal le. Yakà deng mon le du, ke wen tau hemtahu ke Jisas ke du yóm Misaya, là kô bud hmung le du lem gónó le gel stifun yó kem Ju yóm tau yó.

²³ Yó se gónó kem tuhahen mon du, “Tódô snólók ye, yakà sem dengen malù tmuha.”

²⁴ Ne bud tnaba yó kem Farisi bè gewuhen dulék yóm tau tehe butô yó koni, mon le mò du, “Hol tulónem ktahuhen dé, abay se wen Dwata. Tngón me tau gemsalà tum tau hton kóm tu.”

²⁵ Okóm yó balaen kul yóm tau tehe butô yó, monen, “Là tngónu du dou ke tau gemsalà tum tau tu duhen ke là. Tek sotu olo tngónu, tehehe butô, okóm ni, denge mton.”

²⁶ Ne bud mon le se mò du, “Tedu se nmoen béléem? Tedu kmò kehtonen kóm du?”

²⁷ Ne bud monen se kun yóm tau yó, “Deng tulónu kuy se, mò ye là hmungol du du? Moen de ke alì nokol snólók ye béléu? Móyô ye kô kuy ke baling ye tau lemolò du?”

²⁸ Ya tey sidek kesedekà le du yóm tau yó, mon le mò du, “Uu se sotu lemolò du tum tau tu. Lolò me tehe Musis kum.

²⁹ Tngón me yóm tehe kudél Dwata ebè Musis ekni, okóm yóm tau yó, là kô tngón me du gónón gu lemwót.”

³⁰ Ne bud mudél yóm tau yó, monen, “Tey moen ni du ke là tngón ye du gónón gu lemwót igoen sem deng hton dou.

³¹ Hónô tngón tekuy là kô hnungol Dwata du yóm tau gemsalà. Són olo hnungolen, són yóm tau madat du ne mimón du yóm kun kóyô.

³² Lemwót bè hol kbut benwu,” monen, “laen kô deng gungol tekuy he tau gembek hton du yóm tau butô lemwót bè ksuten.

³³ Ke là lemwóten bè Dwata tum tau tu, là kô gbeken mò du béléu nim deng nmoen ni.”

³⁴ Yó balà le du se kul, “Tmau kóm de tô hegled tmolok kum? Igoem tau gemsalà he kóm lemwót bè kbutem tau.” Ne là kô bud hmung le du bè yóm kul gónô gel stifun yóm tau tehe butô yó.

Yóm tau là hemtahuhen, lómón ke butô

³⁵ Timbow gungol Jisas yóm là bud kehmung le du bè yóm kul gónô gel stifun yóm tau tehe butô yó, ominen mebel du. Timbow tonen, monen mò du, “Hentahuhem kô kóm yóm Ngà Tau?”

³⁶ Mon yó sem tau tehe butô yó, “Tmau du de yóm tau yó, Sér, anì hemtahuhe béléen?”

³⁷ Mon Jisas se, “Yó sem deng tonem, yóm mudél ebéléem ni.”

³⁸ Ne tódô mtud bukol bè solu Jisas yóm tau tehe butô yó, ne monen mò du, “Hentahuhu uu, Sér.”

³⁹ Ne yó bud mon Jisas, monen, “Ni se nógówu elem benwu anì sentólóngu kem tau. Htonu yó kem tau butô, ne hbutóu yó kem tau mton.”

⁴⁰ Ne wen se kem Farisi nô bè yó, ne gungol le yóm kmon Jisas du nim ni, mon le se mò du, “Mi kô yóm monem butô yó?”

⁴¹ Bud mon Jisas mò kul, “Ke tahu ye butô, laen kô salà nbô ye. Okóm gel mon ye, ‘Là kô me butô’ yó se gónón wen salà nbô ye.”