Kun Snulat Jan 8 - Udél Dwata: Gna Kesfasad ne Lomi Kesfasad

Yóm libun gafit le bè kdaen yehen

¹ Lemwót ke Jisas kun, mógów ebè Bulul Ulib.

² Timbow deng mwas bè yó, tódô bud mulék ebè Gónô Dwata. Tey tau wen stifun ebéléen, ominen myón nan na tmolok bélê le.

³ Bè yóm ktolok Jisas yó, wen libun gafit le mdà yehen nwit le ebè yó yó kem tau tmolok hlau ne yó kem Farisi. Hdà le bè yó lem blóng yó kem tey tau wen.

⁴ Mon le mò ke Jisas, mon le, “Ó Sér, nim libun ni, gafit me mdà yehen.

⁵ Bè yóm tehe hlau Musis,” mon le, “hnatay sentudà botu yóm libun ke lómón ni kmoen. Tedu se kóm kmon du du?”

⁶ Yóm snólók le bè Jisas ni, mò tô dalil le dmuón du. Okóm ke Jisas kun, lekohong ebè tonok, sulaten bè tonok tdoken.

⁷ Tódô henlel le se smólók ke Jisas yó kem tau mit klamo ebéléen yó koni. Omin Jisas bud hemtedeng du kyónen, monen mò kul, “Ke wen bélê ye laen dù salaen, yake du dé tanay tmudà du botu nim libun ni.”

⁸ Ominen bud lekohong ne bud sulaten bè tonok tdoken.

⁹ Bè yóm kungol le du yóm kbalà Jisas kul yó, tódô le gotu hlana lemwót ket kul na sotu, gna hlana yó kem tuha bélê le. Ngangen tek són Jisas tebel bè yó. Sana kdaen bè yó se yóm libun.

¹⁰ Omin Jisas bud hemtedeng du kyónen ne snólóken yóm libun, monen mò du, “Gónó le nô se yó kem tau mit kóm yó koni? Laen dù bélê le tmudà kóm kô?”

¹¹ Monen se, “Laen duen, Sér.” Mon Jisas se, “Là se nmou du béléem snéen dou. Muléki ne, okóm béi abay bud mò salà.”

Jisas se yóm layag lem benwu

¹² Ne yó bud udél Jisas ebè yó kem Farisi, monen, “Ou se yóm layag kól lem benwu. Yó se tau lemolò do, là kóen bud gógów elem kifu ne, okóm wen layag mò htonen lanen gmuta yóm klowil laen dù tul sónen.”

¹³ Deng mom yó udél le ebè Jisas yó kem Farisi, mon le, “Là hentahu me du yóm gel tulónem, abay se tódô són uu tmulón du yóm kóm knô.”

¹⁴ Bnalà Jisas lu, monen, “Balù yóm ktulónu du yóm dou knô, laen kô dù kéng du, hono tahu. Abay se tngónu gónóhu gu lemwót ne tngónu snéen yóm gónóhu e solu. Okóm kuy, là kô tngón ye du.

¹⁵ Bélê ye kuy,” mon Jisas, “bè yóm gel kehdeng ye kun kmò sotu tau, tódô nmung ye yóm kun kehedem tau tonok. Béléu dou, là kô hendengu du kun kmò yóm sotu tau.

¹⁶ Okóm ke nawahu se mò du, tódô hlanu bè yóm ktahuhen. Abay se là kô tek són du ou mò du, sal me gel lewu Mà, yóm deng hógów do edini.

¹⁷ Wen snulat bè yóm kuy hlau,” mon Jisas, “yó monen, ‘Ke lewu tau gemtanud yóm nmò, ne senged tulón le, tahu se yó.’

¹⁸ Duhen yó,” mon Jisas, “ou gemtanud du yóm dou knô ne bud Mà snéen gemtanud dou, yóm deng hógów dou edini.”

¹⁹ Bud mon yó kem Farisi, “Nô se maem du?” Mon Jisas se, “Là kô tngón ye dou, sélét mom tô tngón ye Mà ne. Ke deng tngón ye ou, tngón ye se Mà.”

²⁰ Ni se udél Jisas bè yóm ktoloken bè Gónô Dwata igoen myón bè yóm dfél gónóhen nô yó kem kahun gónó le gel hemsù filak mò blay le ebè Dwata. Laen kô dù tau kemfô du, abay se là dengen kól du he yóm kdaw Dwata hemlus du.

Là kô ye gógów ebè yóm gónóhu e solu

²¹ Ne bud mon Jisas mò kul, monen, “Móyóne lemwót ne ni. Angat tey khebel ye dou, okóm là kô ton ye dou. Ne sok ye matay, sana tolo kbô ye du he salà ye. Là kô ye gógów edu tum gónóhu e solu.”

²² Stulón le yó kem Ju wen glal le, mon le, “Yó mon yóm tau yó, ‘Là gógów ye edu tum gónóhu e solu.’ Gónón e tô solu du? Hnatayen knóen kô?”

²³ Ne bud mon Jisas se mò kul, monen, “Tau ye lenokob longit kuy. Fene lemwót ta dou. Tau ye tonok kuy okóm là dou.

²⁴ Yó gónóhu mon du mò kuy, sana tolo kbô ye du he salà ye ke sok ye matay. Ne tahu se yó, ke là hentahu ye du yóm deng tulónu kuy bè dou ktau, sana tolo kbô ye du he yóm salà ye bè yóm katay ye.”

²⁵ Ne bud mon le mò ke Jisas, “Tmau kóm de?” Mon Jisas se, “Igou sem deng hónô tmulón du kuy lemwót bè kbut ktoloku efet nim kmoen ni.

²⁶ Tey dê he tô nóyô tulónu kuy lemwót bè yóm kuy kmò, yóm bang gónó ye megtuled. Okóm són olo tulónu yó kem tau lem benwu yóm deng gungolu lemwót gu bè yóm deng hógów dou, ne hono ktahuhen yóm tulónen dou.”

²⁷ Okóm yó kem tau hmungol du, là kô dog glileb le du yóm kegbaken ebè Dwata yóm tulón Jisas kul yó.

²⁸ Bud mon Jisas mò kul, “Ke sok deng hteg ye kros yóm Ngà Tau, yó he angat kdilô ye do. Ne dilô ye snéen yóm klaen dù tódô genbeku ke tek són ou, ne yóm klaen dù lenbù tulónu, són olo tulónu yóm deng hlolò Mà do.

²⁹ Yóm hógów dou,” mon Jisas, “là kô bayaen dou, abay se tendo nmou yóm kun knóyô.”

³⁰ Bè yóm udél Jisas yó, tey dê tau hemtahu béléen.

Yóm tau hesek ne yóm tau là heseken

³¹ Ne yó udél Jisas ebè yó kem tau deng hemtahu béléen, monen mò kul, “Ke tendo nimón ye ni kem toloku, deng ye baling tau hol tahu lemolò dou ne.

³² Ne angat tngón ye se yóm ktahuhen. Ne yóm ktahuhen yó, yó se hewà kuy bè yóm gónó ye ghesek.”

³³ Bnalà le Jisas yó kem dumu tau bè yó, mon le, “Semfu me gu bè Abraham se kum, là kô me kesfu hesek. Tedu se lanem mon du yó dum monem, ‘Angat ye gewà bè yóm gónó ye ghesek?’ ”

³⁴ Mon Jisas mò kul, “Tódô tulónu kuy ktahuhen, yó se tau mò salà, deng ghesek ne lem yóm óyóen mò salà.

³⁵ Yóm tau hesek, sal gel wen sónen yóm kegheseken bè yóm sotu tau. Okóm yóm ngà, laen kô tul sónen kngaen du yóm kun mà.

³⁶ Ke lenwaen yu yóm Ngà Dwata, deng duhen yó se hol tahu kegewà ye.

³⁷ Tngónu se yóm kesfu ye gu bè Abraham,” mon Jisas, “okóm sónmò ye tendo tô hmatay do, abay se là henmóyô ye du yóm toloku.

³⁸ Gel tulónu kuy yóm deng gel gungolu gu bè Mà. Okóm kuy, mom nmò ye yóm deng gungol ye bè yóm kuy mà.”

³⁹ Mon le se mò ke Jisas, “Abraham se yóm kum mà.” “Na,” mon Jisas, “ke semfu ye se gu bè Abraham, nmò ye sen yóm kun nmò Abraham.

⁴⁰ Okóm kuy, sónmò ye móló hmatay do lanu tmulón du kuy yóm ktahuhen deng gel gungolu gu bè Dwata. Là kô na a yó du kun nmò tehe Abraham.

⁴¹ Yóm nmò ye béléu ni,” mon Jisas, “deng dnalang ye bè yóm kuy mà.” Bnalà le Jisas, mon le, “Bang tô dumu Mà me se kum du, tek són sem Dwata. Mi se hol tahu ngaen.”

⁴² Mon Jisas se, “Ke Dwata se hol Mà ye kaem bong nawa ye dou, abay se béléen gónóhu gu lemwót ne ni se denge kól dini. Là kô lenbuu du yóm kógówu edini, hol du se hógów do.

⁴³ Moen de ke là glileb ye du lanen yóm tulónu kuy? Yó duónen,” mon Jisas, “là móyô ye mimón du.

⁴⁴ Seitan yóm kuy mà ne tódô lolò ye yóm kun kóyô. Du se yóm hol sana monok lemwót bè hol kbuten. Là kóen tofi bè yóm ktahuhen. Hono kéng yóm kun, abay se yó se sana kun kmò, mò kéng. Hono kéng yóm gel tulónen. Du se hol gónón gu tembul kéng.

⁴⁵ Okóm,” mon Jisas, “hono tahu yóm gel tulónu kuy, ne yó se gónó ye là hemtahu dou.

⁴⁶ Wen kô salà ton ye béléu gónó ye là hemtahu dou? Laen duen. Ke tulónu kuy yóm ktahuhen, moen ke là hentahu ye dou?

⁴⁷ Yóm kun tau Dwata, hol hnungolen yóm udél Dwata. Okóm kuy, là kô ye tau Dwata. Yó se gónó ye là móyô hmungol.”

Jisas ne Abraham

⁴⁸ Deng mom yó bud balà le ke Jisas, mon le, “Tahu se yóm gel mon me, tauhi lemwót bè Samarya se kóm, lelen wen busawem.”

⁴⁹ Bnalà Jisas se lu, monen, “Laen kô busaw malak do. Tey kadatu ke Mà, okóm bélê ye kuy, balù udì ke nadat ye ou.

⁵⁰ Là kô yó du hnebel nawahu ke wen madat do. Okóm yó se hol kóyô Mà ke wen madat dou, ne du se mfi do.

⁵¹ Tódô tulónu kuy ktahuhen,” mon Jisas, “yó se tau mimón yóm dou tolok, là kóen na a matay.”

⁵² Bnalà le se, mon le mò du, “Ni deng tngón me wen busaw malak kóm. Igoen deng matay Abraham dalang se yó kem tehe gna tugod Dwata. Okóm yó monem, ke wen tau mimón du yóm tolokem, là kóen na a matay.

⁵³ Getahi senta yóm tehe fù tekuy Abraham kô? Balù yóm tey kegetahen, senged katayen se kun. Dalang se yó kem gna tugod Dwata ekni, senged katay le se kul. Tmau kóm de?”

⁵⁴ Ne bud bnalà Jisas lu, monen, “Ke tô hadatu knóu, laen kô dù gónón e kól. Kaem tódô Mà yóm madat dou. Ne hol du se yóm mon ye kuy Dwata.

⁵⁵ Okóm là kô deng tngón ye du. Fen tngónu dou. Ke tô monu là tngónu du, denge mkél bè yóm kmò ye kéng. Hol tahu tngónu dou, ne tendo nimónu.

⁵⁶ Yóm tehe fù ye Abraham,” mon Jisas, “tey kligalen, abay se deng eles tngónen yóm ksutu bè ni lem benwu. Tey kligalen yóm deng ktonen dou dini.”

⁵⁷ Ne mon le se mò du yó kem Ju, “Là kóen deng gefet limu folò he halayem, moen ke monem deng ye ston Abraham?”

⁵⁸ Ne mon Jisas se mò kul, “Tódô tulónu kuy ktahuhen, gu laan Abraham là deng sut, deng sana kem yó ne dou.”

⁵⁹ Timbow gungol le yóm mon Jisas yó, omin le gotu mulut botu mò tô hatay tudà le du. Okóm tódô lana lem mata le Jisas, tnagaken yóm Gónô Dwata.