Kun Snulat Jan 6 - Udél Dwata: Gna Kesfasad ne Lomi Kesfasad

Kehken Jisas yó kem limu libu logi

¹ Kogolen bè yó, bud lemwót Jisas efatu yóm Lanaw Galili. Sotu gel boluy le du yóm lanaw yó, Lanaw Tibiryas.

² Tey tau wen huli ke Jisas, abay se deng ton le yóm hentaw ton gel nmoen bè kehkóhen des.

³ Timbow kól fatu Jisas ne yó kem gel lemolò du, mneged le eta yóm bulul udì ne bè yó gónó le myón.

⁴ Bè yóm kdaw yó, móyónen hto ne yóm kmò le ken bong yó kem Ju bè yóm Kdaw Khius.

⁵ Timbow temngel Jisas gu bè yóm gónó le myón, tódô tonen yó kem tey tau muluk ebéléen, yó monen mò ke Filip, “Gónó tekuy bemli du mò ken le ni kem tau ni?”

⁶ (Yó gónón mon du yóm yó mò tilówen ke Filip. Okóm deng eles tngónen ne kun yóm angat nmoen.)

⁷ Bnalà Filip se, monen, “Sukéy sotu tau bè wolu bulón btes ken le ni kem tau ni, bede olon ket kul na udì.”

⁸ Mudél se ke Andru, yóm sotu tau lemolò ke Jisas, yóm twoli Simun Pitér, monen,

⁹ “Wen ngà mit bnotu bè ni, limu botù mambang ne lewu tedek utón él. Okóm tô kmò le kul du ni kem tey tau wen nii?”

¹⁰ Ne mon Jisas se mò kul, “Hyón ye lu dé yó kem tau.” Uma kóm wen gónón ukol bnes bè yóm gónó le nô yó. Ne tahu se, gotu le myón yóm le. Yó kwen kem logi, botong limu libu.

¹¹ Ne omin Jisas ma yóm mambang yó koni, bede nan gna mni bè Dwata, ne ominen hsagid du ebè yó kem tau myón bè yó. Ne bud senged se kmoen du yóm utón él. Gotu le bsow yóm kdê le.

¹² Timbow deng kken le, mon Jisas mò yó kem gel lemolò du, “Sentifun ye yó kem lukasen anì là gamaen.”

¹³ Tahu se, gotu sentifun le. Botong sfolò lewu abì henok lukasen yóm tehe tek limu botù mambang yó.

¹⁴ Bè yóm kton le du yó kem tau yóm hentaw ton nmò Jisas bélê le yó, botong mon le, “Deng duhen ni se yóm tugod Dwata hendón tekuy, yóm hógów Dwata elem benwu.”

¹⁵ Ne yó tô atul le, tódô tô nówóng le Jisas mò tau hol geta bélê le. Okóm tngón Jisas yóm tô nmò le, yó gónón tódô hlayuk bélê le, hetsik mógów elem bulul tek sotuhen.

Kógów Jisas ta él

¹⁶ Timbow deng seklewet bè yó, lemwót yó kem gel lemolò ke Jisas, mógów le ebè kilil lanaw.

¹⁷ Omin le motun elem ówóng le, okóm là dengen bud mulék ebélê le he Jisas. Kewót le bè yó, na le e mówóng mifal efatu ebè syudad Kapérnaum. Bè yóm tolo kówóng le yó, deng tey kifu ne.

¹⁸ Bè yóm igò le mówóng, tódô mbel yóm tey lenos bong ne yóm tey lewók.

¹⁹ Ne bè yóm hanà tolo knô le talak yóm lanaw, wen dô limu duhen ke nem kilumitru klayuk le bè kilil, tódô ton le se Jisas mógów ta él, hloni ebè yóm ówóng. Ya tey sidek klikò le.

²⁰ Okóm mudél ebélê le Jisas, monen, “Bê ye hlikò, ou se ni.”

²¹ Ominen yó he mgel nawa le, ne hotun le Jisas elem ówóng le. Bè yóm khotun le du elemen, tódô le se kendel gefet bè yóm benwu gónó le e solu.

Khebel le ke Jisas yó kem tau

²² Timbow hlafus bè yó, tolo le nô ditu fatu él yó kem tey tau wen tehe henken Jisas. Tngón le tek sotu ówóng tehe nô bè yó, yóm ówóng snakay yó kem gel lemolò ke Jisas. Ne bud tngón le snéen là dengen mung kul Jisas he, tolo tagak.

²³ Ne wen kem dumu ówóng lemwót gu bè Tibiryas dmuung moni bè yóm gónó Jisas mni bè Dwata ne hemken yó kem tau.

²⁴ Timbow là ton le ke Jisas bè yó dalang se yó kem gel lemolò du, yó gónó le gotu smakay bè yó kem ówóng yó, na le e hnebel Jisas bè Kapérnaum.

Jisas se yóm ken hlowil tau

²⁵ Tikóng ton le Jisas sendifal yóm lanaw, mon le mò du, “Na, Sér, kilón de kkólem bè ni?”

²⁶ Bnalà Jisas se lu, monen, “Tódô tulónu kuy ktahuhen, tek sotu gónó ye mebel do lanu deng hemken kuy efet ye bsow. Okóm là kô dog dilô ye du tennefen yó kem hentaw ton nmou yó.

²⁷ Bê ye kat alì sen-galu yóm ken wen sónen. Yó dé hol sen-galu ye yóm ken gónó ye gmuta du yóm klowil laen dù sónen. Yóm ken monu ni, ni se yóm ken angat blayen kuy yóm Ngà Tau, abay se yóm Dwata, kun Mà, deng bemlay du béléen yóm kfasangen mò du.”

²⁸ Ne mon le se mò ke Jisas, “Tedu se tô nmò me du anì gmò me yóm kun kóyô Dwata?”

²⁹ Ne bnalà Jisas se lu, monen, “Ni hol kóyô Dwata bélê ye ke hentahu ye yóm deng hógówen elem blóng ye.”

³⁰ Bud mon le se kul, “Hentaw ton du de tô nmoem mò gónó me hemtahu kóm? Tedu se tô nmoem?

³¹ Ngem yó kem tehe fù tekuy ekni, bè yóm knô le bè yóm benwu laen dù tau menwu du, tódô kdê le gotu mken yóm ken boluyen mana. Lómón yóm monen bè Sulat Dwata, monen, ‘Blay Musis kul yóm ken lemwót bè longit.’”

³² Bnalà Jisas lu, monen, “Tódô tulónu kuy ktahuhen, yóm ken blay Musis kuy, là kô yó du yóm hol tahu ken lemwót gu bè longit. Kaem Mà bemlay du kuy yóm hol tahu ken lemwót gu bè longit.

³³ Yóm ken blay Dwata, duhen yóm tau hógówen lemwót gu bè longit mò gónó le mowil kem tau lem benwu.”

³⁴ Ne mon le se mò ke Jisas, “Ó Sér, hol tendo gel benlayem mi sen yóm ken monem yó.”

³⁵ Ne bud mon Jisas mò kul, bede hningónen, “Ou se yóm ken hlowil tau. Yó se tau mógów ebéléu, laen kô dù tul kbitilen. Yó se tau hemtahu béléu, laen se kô dù tul kleengen.

³⁶ Okóm nim yu,” monen, “anien ke deng ton ye ou, là kô ye dog hemtahu béléu. Ni se yóm tehe tulónu kuy.

³⁷ Kdê yó kem tau hemtahu béléu,” mon Jisas, “sal lemwót bè kun kehlan du Mà. Ne là kô naw e kenbê kul ke wen tau mógów ebéléu.

³⁸ Là kô yó du lewótu gu bè longit ke naw e nmò yóm dou knóyô. Okóm yó hol dou nógów anì nmou yóm kun kóyô yóm hógów dou.

³⁹ Yó hol kun kóyô yóm hógów dou yó, ke balù sotu laen dù lanahu du yóm kdê hogoten dou. Kóyóen ke angat gotu hlowilu lu sok kól yóm hol són kdaw.

⁴⁰ Yó hol kóyô Mà ke benlayen klowil laen dù sónen yó kem tau dmilô yóm kun Ngà ne hemtahu béléen. Ne yó angat nmou bélê le, gotu hlowilu lu sok kól yóm hol són kdaw.”

⁴¹ Lemwót yó kem tau, deng mom gotu senlón le Jisas yóm kmonen du, “Ou se yóm ken lemwót gu bè longit.”

⁴² Yó mon le, “Igoen ngà Jusif nim Jisas ni. Tngón tekuy maen ne yéen. Moen ke tô monen lemwót gu bè longit?”

⁴³ Bud mon Jisas mò kul, “Bê ye mom semlón dé.

⁴⁴ Laen kô dù tau tódô mógów ebéléu ke là nan na lemwót bè Mà, yóm hógów do edini. Yóm tau mógów ebéléu, angat hlowilu sok kól yóm hol són kdaw.

⁴⁵ Wen snulat yó kem tehe gna tugod Dwata ekni, yó mon le, ‘Angat tolok Dwata kdéen tau.’ Yó se tau hmungol ke Mà ne wen dnalangen béléen,” mon Jisas, “yó se yóm tau mógów ebéléu.

⁴⁶ Sundu mon dé ke deng tonen Mà. Tek són mton du, són yóm deng lemwót gu béléen.

⁴⁷ Tódô tulónu kuy ktahuhen,” mon Jisas, “yó se tau hemtahu béléu, deng wen ne kun klowil laen dù sónen.

⁴⁸ Ou se yóm ken hlowil tau.

⁴⁹ Yó kem tehe fù tekuy ekni bè yóm tehe knô le bè yóm benwu laen dù tauhen, gotu gken le se yóm ken boluyen mana, okóm senged nóm, gotu katay le.

⁵⁰ Okóm yóm ken lemwót bè longit monu yó koni, ke wen tau mken du, là kóen na a matay.

⁵¹ Ou se yóm ken lemwót gu bè longit mò gónó ye mowil. Ke wen tau mken du nim ken monu ni, angat gutahen yóm klowil laen dù tul sónen. Yóm ken monu ni, duhen yóm dou lówó. Angat hamau mò gónó le mowil kdéen tau bè klamangen benwu.”

⁵² Bè yóm kudél Jisas ebélê le yó, deng le mom skaf mon du yó kem Ju, mon le, “Tedu tô kmò kehkenen du tekuy lówóhen tau ni?”

⁵³ Ne bud mon Jisas mò kul, “Tódô tulónu kuy ktahuhen, ke là ken ye du lówóhen yóm Ngà Tau, ne ke là ninum ye du litóen, là kô guta ye du yóm klowil laen dù tul sónen.

⁵⁴ Yó se mken yóm dou lówó, ne minum yóm dou litô, deng wen ne kun klowil laen dù sónen. Ne angat hlowilu bè yóm hol són kdaw.

⁵⁵ Abay se yóm dou lówó, hol lómón ke tahu ken, ne yóm dou litô, hol lómón ke tahu ninum.

⁵⁶ Yó se tau mken yóm dou lówó ne minum yóm dou litô, senflósen nô béléu, ne senflósu se nô béléen.

⁵⁷ Yóm Mà hógów do, laen dù tul katayen, ne béléen gónón lemwót yóm dou klowil. Senged snéen yóm tau mken du yóm dou lówó, lemwót béléu yóm kun klowil.

⁵⁸ Duhen ni, yóm ken tulónu kuy ni, ni se yóm ken lemwót gu bè longit. Bede là mkélen bè yóm ken tehe gel ken yó kem fù tekuy ekni. Balù yóm kken le du, senged gotu katay le snéen. Okóm yó se tau mken yóm ken monu ni, angat gutahen yóm klowil laen dù sónen.”

⁵⁹ Ni se yóm tolok Jisas bè yóm gónó le gel stifun yó kem Ju bè Kapérnaum.

Udél gónón gmuta klowil laen dù sónen

⁶⁰ Timbow gungol yó kem dumu tau gel lemolò ke Jisas yóm ktolok Jisas ni, tey dê bélê le mon du, “Tey mgel nim toloken ni. Tau du se gembek mimón du?”

⁶¹ Bede tódô tngón Jisas yóm keslón le, yó gónón mon du mò kul, “Sidek kegnóm ye du kô lemwót bè nim toloku ni?

⁶² Mò kmoen se ke ton ye khawayen ebè yóm tehe gónóhen gu lemwót yóm Ngà Tau?

⁶³ Tek són yóm Tulus Dwata gembek hlowil tau. Bong yó dum lówó tau, bà udì ke wen gmoen. Kdê ni kem udélu ebélê ye ni koni, hlowilen tau abay se hono lemwót gu bè yóm Tulus Dwata.

⁶⁴ Okóm wen se bélê ye là hemtahu du.” (Yó gónó Jisas mon du yóm yó, abay se deng eles tódô tngónen lemwót bè kbuten yó kem tau là hemtahuhen, ne eles tngónen se yóm tau angat matul du anì gekfô yó kem hmohon du.)

⁶⁵ Bud mon Jisas, “Yó se gónóhu deng mon du mò kuy, laen dù tau tódô mógów ebéléu ke là lemwóten bè Mà.”

⁶⁶ Lemwót bè yóm ktolok Jisas kul yó, tey dê bè yó kem tau gel lemolò du, gotu le mulék. Là bud le móyô mung du.

⁶⁷ Snólók Jisas yó kem sfolò lewu gel lemolò du, monen mò kul, “Kmò kuy se? Tô tnagak ye o kô?”

⁶⁸ Ne mon Simun Pitér se, monen, “Laen kô dù dumu tau lolò me, Sér, tek són sem uu. Lemwót bè udélem gónó me gmuta yóm klowil laen dù tul sónen.

⁶⁹ Deng me hemtahu béléem se kum. Tódô tngón me uu se yóm laen dù belenen lemwót gu bè Dwata.”

⁷⁰ Bnalà Jisas se lu, monen, “Deng néléku yu, yu kem sfolò lewu, okóm sotu bélê ye nalak Seitan.”

⁷¹ Duhen Judas, ngà Simun Iskariyut se, gónón e gbak yóm mon Jisas yó. Igoen du sotu bè yó kem sfolò lewu gel lemolò du, du se fen matul du anì gekfô le Jisas yó kem hmohon du.