Kun Snulat Jan 5 - Udél Dwata: Gna Kesfasad ne Lomi Kesfasad

Kkó Jisas des yóm tau hlilil bè kilil busung

¹ Kogolen bè yó, bud lemwót Jisas subô ebè Jirusalim, abay se móyô mung bè yóm sotu mò ken bong yó kem Ju.

² Bè yó bè Jirusalim, wen sotu busung moni bè yóm bak tikeb gel bnoluy le, Bak Tikeb Ubiha. Yó boluyen bè udél Hibru yóm busung yó, Betsata. Wen limu gónô hgolung nmò le hilolen.

³ Tey dê tau gemnóm des hlilil bè yó laan yó kem gónô hgolung. Yó kem tau butô, yó kem tau kihod ne yó kem tau deng matay sfu lówó le, gotu le hlilil bè yó (abay se gel nangat le kewók yóm busung.

⁴ Gel wen kdawen kun mógów elaan yóm hógów Dwata gu bè longit nan e gel hewók yóm busung. Yó se tau gegna kmó elemen igoen tolo lemwók, tódô mkó yóm desen, balù kihu kay desen.)

⁵ Ne wen sotu tau gemnóm des hlilil bè yó, deng tlu folò wolu halayen gemnóm du yóm desen.

⁶ Ton Jisas yóm kehlililen bè yó, ne tngónen se yóm tey kegenen gemnóm du yóm desen. Yó snólóken béléen, monen, “Móyói kô ke mkó desem?”

⁷ Bnalaen se Jisas yóm tau yó, monen, “Laen kô dù tau gel tmóbóng dou, Sér, sok gel lemwók yóm él. Song imou kól ditu dou, deng sana wen tau gegna kól lemen.”

⁸ Tódô mon Jisas mò du, “Btiki, lenulunem igamem, ne mógówi.”

⁹ Tahu se, tódô sen-gengen se mkó desen yóm tau yó. Lenulunen igamen, ne ominen lemwót mógów. Bè yóm kdaw kkó Jisas des yóm tau yó, sengan bè yóm Kdaw Kehegnô yó kem Ju.

¹⁰ Timbow ton yó kem Ju genlal yóm tau deng mkó desen yó, deng mom sensudél le, mon le, “Kdaw Kehegnô nim ni. Là hyuhen bè hlau tekuy ke miti igam.”

¹¹ Bnalaen se lu yóm tau yó koni, monen, “Abay se yóm tau hkó desu mdók dou, monen mò dou, ‘Lenulunem igamem, ne mógówi.’ ”

¹² Ne bud mon le se mò du, “Tmau du de yóm mdók kóm?”

¹³ Okóm yóm tau deng mkó desen yó, là kô dog tngónen du ke Jisas, abay se tey tau wen bè yó, ne deng tódô hlana lem blóng le Jisas.

¹⁴ Tikóng kogolen bè yó, bud ton Jisas lem Gónô Dwata yóm tau tehe hkóhen desen yó koni, monen mò du, “Ngem, deng mkó ne yóm desem. Hol béi abay bud mò salà, déke wen bud gbunuem mkay senta yóm gnan.”

¹⁵ Bud kewóten bè yó yóm tau yó koni, tulónen yó kem Ju genlal Jisas se hkó du yóm desen.

¹⁶ Yó but yóm tô kehsidek le ke Jisas yó kem Ju genlal lanen hkó des bè Kdaw Kehegnô.

¹⁷ Okóm yó balà Jisas kul, monen, “Yóm Mà, senflósen mò nmò, là kóen hegnô. Senged se dou, tódô senflósu mò nmò.”

¹⁸ Lemwót bè yóm udél Jisas yó gónón temnù yóm kóló le hmatay du. Là són du bè yóm kegsalaen bè Kdaw Kehegnô duón le du, okóm yó hol duón le du, bè yóm kmonen du Dwata yóm Maen. Bè yóm kmon Jisas du yóm yó, deng hsengeden ne knóen bè Dwata.

Kun kwalis yóm Ngà Dwata

¹⁹ Bud mon Jisas mò kul, “Tódô tulónu kuy ktahuhen, laen kô gmoen yóm Ngà ke són du, ke là wen Maen. Yó se gel tonen nmò Maen, yó se kun nmò yóm Ngà.

²⁰ Tey kbong nawa Mà yóm Ngaen, yó gónón gotu hegfan du béléen kdê yó kem nmoen. Okóm bud wen he hmoen du mkay senta nim ni, ne angat tey ketnga ye du.

²¹ Yóm Mà, gbeken hlowil yó kem tau deng matay. Senged se kun yóm Ngaen, benlayen klowil yó kem tau nóyô hlowilen.

²² Sotuhen, là kô Mà du yóm angat kmukum kem tau. Okóm deng sigangen ta yóm Ngaen ne yóm angat kkukumen kdéen tau,

²³ anì kdéen tau gotu madat yóm Ngaen lómón se yóm kadat le ke Maen. Yó se tau là madat du yóm Ngà, là se kô nadaten du yóm Maen, yóm hógów du.

²⁴ Tódô tulónu kuy ktahuhen,” mon Jisas, “yó se hmungol yóm dou udél, ne hemtahu bè yóm hógów do, deng wen ne kun klowil laen dù sónen. Là angaten megtuled, okóm deng gewà gu lem hatay, ne deng gutahen ne yóm klowil laen dù sónen.

²⁵ Tódô tulónu kuy ktahuhen, angat wen kdawen, ne deng duhen ni se, angat gungol yó kem tau deng matay yóm udél yóm Ngà Dwata. Sok gungol le, tódô le se bud mowil.

²⁶ Bè Mà se hol gónón tembul klowil tau. Ne senged snéen bè yóm Ngaen, deng nmò Maen mò gónón tembul klowil tau.

²⁷ Ne deng benlayen kwalis yóm Ngaen mò kmukum kdéen tau lemwót bè yóm deng kbalingen Ngà Tau.

²⁸ Bê ye tennga nim monu ni,” mon Jisas. “Angat wen kdawen gungol yó kem tau deng matay yóm udél yóm Ngà Tau.

²⁹ Ne bè yóm khungol le du, gotu le bud hewà gu lem lebeng le. Yó se tau deng tehe mò du yóm hyu, gutahen yóm klowil laen dù sónen. Bud mowil snéen kun yóm tau tehe sidek nmoen, okóm hlós elem tafak.”

Yó kem gemtanud ke Jisas

³⁰ Ne bud mon Jisas mò kul, “Ke tek són ou, laen kô gmou. Bè yóm angat kkukumu tau, tódô nmou yóm deng gungolu gu bè Mà, yó se gónón tedeng yóm kkukumu. Là kô tódô nmou du yóm dou kóyô, són olo nmou yóm kun kóyô yóm hógów do.

³¹ Ke són ou tô tmanud du yóm dou knô,” mon Jisas, “laen kô dù muhen.

³² Okóm wen sotu tendo gemtanud dou, duhen Mà, ne tngónu bè yóm kegtanuden dou, hono tahu.

³³ Tehe wen se tau hógów ye ebè Jan, ne tódô tulón Jan kul se yóm hol ktahuhen lemwót béléu.

³⁴ Anien he ke laen dù tau gemtanud dou, okóm yó gónóhu mon du nim ni anì wen lan ye gewà gu lem salà ye.

³⁵ Yóm Jan, hol lómón ke solok, ne tey knóngen. Okóm tek likót ye tô hligal du yóm knóngen yó.

³⁶ Okóm wen he gemtanud dou mkay senta yóm kun kegtanud dou Jan, duhen yóm gel nmou. Kdê yóm hmò Mà dou, yó se yóm gel nmou, ne hol lómón ke yó se mò gemtanud dou. Bè yó se gónó ye temngón du yóm khógów Mà dou.

³⁷ Ne yó bud sotu gemtanud dou, duhen Mà, yóm deng hógów do. Là kô deng gungol ye du udélen, duhen ke deng ton ye lem uyóhen,

³⁸ ne là kóen nô lem hendem ye yóm gel tulónen kuy, abay se là kô hentahu ye du yóm deng hógówen.

³⁹ Tey gel kehnagì ye du yóm Sulat Dwata. Ofo kuy ke bè yóm alì kehnagì ye du gónó ye gmuta yóm klowil laen dù sónen. Igoen sem ou yóm tulónen yó.

⁴⁰ Okóm là kô ye dog móyô lemolò do, igoen béléu gónó ye gmuta du yóm klowil laen dù sónen.

⁴¹ Là kô yó du hnebel nawahu,” mon Jisas, “ke dóyón le ou yó kem tau.

⁴² Okóm tódô tngónu yóm nô lem hendem ye, là kô kenbong nawa ye ke Dwata.

⁴³ Bè nim kógówu edini ni, lemwót bè kun kwalis Mà, yóm hógów do, okóm là kô dog henmóyô ye dou. Bede ke wen yóm tódô lembù sut, tey mahil henmóyô ye.

⁴⁴ Laen kô dù lan ye hemtahu béléu, abay se són sen-galu ye, són yóm kdóyón tau kuy. Okóm là kô dog sen-galu ye du yóm kegdóyón ye bè yóm hol tek sotu Dwata.

⁴⁵ Bê ye abay hendem,” monen, “ke ou yóm angat kmamo kuy bè solu Mà. Kaem Musis angat kmamo kuy, yóm tô genléd nawa ye mò mfi kuy.

⁴⁶ Ke deng hentahu ye yóm tehe snulat Musis, hentahu ye ou snéen, abay se ou yóm tulónen.

⁴⁷ Okóm ke là hentahu ye du yóm tehe snulaten, là kô hentahu ye du ke wen tulónu kuy.”