Kun Snulat Jan 4 - Udél Dwata: Gna Kesfasad ne Lomi Kesfasad

Kestulón le Jisas yóm libun lemwót bè Samarya

¹ Gungol yó kem Farisi yóm deng ketnù yó kem tau lemolò ke Jisas ne yó kem tau hbabtays béléen, ne là holen bud wen ke Jan.

² (Bè ktahuhen, là Jisas du dé yóm gel mabtays, són yó kem gel lemolò du.)

³ Timbow gungol Jisas nim tulón le ni, tódô lemwót bè yó bè prubinsya Judiya, ne bud mulék ebè prubinsya Galili.

⁴ Yóm kógówen yó, là gbeken du ke là nan mlan bè prubinsya Samarya.

⁵ Ngangen mógów efet kól bè Sikar, yóm sotu benwu udì snakuf Samarya. Nim Sikar ni, moni bè yóm tonok tehe blay Jakub yóm ngaen Jusif ekni.

⁶ Bè yó gónóhen nô yóm kokol tehe Jakub. Nan slob hegnô bè yó Jisas bè yóm kokol yó, abay se alì sidek klitegen bè yóm kógówen. Deng gtungu ne kdaw yóm kkólen bè yó.

^7-8 Bè yóm igò Jisas hegnô bè yó, lemwót yó kem gel lemolò du na le e bemli ken. Kogol le lemwót, wen libun lemwót bè Samarya sut bè yó na a mangay él. Ne mon Jisas mò du, “Ó Lenibun, hinumem ou kun él.”

⁹ Ne mon yóm libun mò du, “Igoem sem Ju kóm, ne libune lemwót bè Samarya dou, moen ke mnihi él béléu?” Yó se yóm balaen ke Jisas yóm libun yó, abay se là kô glemeg kem Ju du yóm kul tegayan ne huyów yó kem tau Samarya.

¹⁰ Ne bnalà Jisas se yóm libun yó koni, monen, “Ke deng tngónem yóm tô blay Dwata kóm, ne ke tngónem yóm tau mni él béléem, dengi bud semwì mni él béléen ne anì benlayen uu yóm él hlowil tau.”

¹¹ Bud mon yóm libun yó, “Laen sem dù timbà nitem du, Sér, lelen alì ngelem nim kokol ni. Gónóm tô ma du se yóm él monem yó koni?

¹² Yóm tehe fù tekuy Jakub ekni, du se tehe tmebel du bélê me nim kokol ni. Tódô kdê le se tehe minum bè ni, le Jakub, ne kem ngaen, ne kem ógófen. Getahi senta Jakub kô kóm du?”

¹³ Bud bnalà Jisas se, monen, “Ket tau gel minum du nim él ni, sal bud gel meeng.

¹⁴ Okóm yóm tau minum yóm él dou blay, là kóen na a bud meeng. Yóm él blayu yó, baling sfut él mò gónó gmuta yóm klowil laen dù sónen.”

¹⁵ Bud monen se mò ke Jisas yóm libun yó, “Benlayem o sen, Sér, yóm él yó anì là bude gel meeng, ne anì là bude gel mangay él bè ni.”

¹⁶ Ne bud mon Jisas se mò du, “Nam e nangay yehenem dé.”

¹⁷ Mon yó sem libun yó, “Laen kô dù yehenu.” Bud mon Jisas, “Tahu se yóm monem laen dù yehenem.

¹⁸ Okóm bè ktahuhen, deng limu logi yehenem, ne yóm logi dumuhem smu ni, là kô tahu yehenem du. Bong tahu se yóm tulónem do yó.”

¹⁹ Bud mon yó sem libun yó mò ke Jisas, monen, “Tugodi Dwata dilóu, Sér.

²⁰ Yó kem tehe fù me ekni, gel le tmaba Dwata bè nim bulul ni. Okóm yu kem Ju, gel mon ye són bè Jirusalim gónô tmaba Dwata.”

²¹ Ne bud mon Jisas mò du, “Hentahuhem nim tulónu kóm ni, Lenibun. Angat wen kdawen laen kô dù bud tmaba Dwata bè nim bulul ni duhen ke bè Jirusalim.

²² Yu kem tau lemwót bè Samarya, là kô hol tngón ye du yóm tnaba ye. Okóm bélê me kem Ju, tey mtukul ketngón me du yóm tnaba me, abay se bélê me gónóhen lemwót yóm tau mò lemwà kul gu lem hatay.

²³ Angat wen kdawen,” mon Jisas, “ne deng duhen ni se kbuten, yó kem tau gel tmaba ebè Mà, sal gel hlan le bè kfasang yóm Tulus Dwata anì hol tngón le yóm kun kmò Mà. Ke ni se nmò le, hol tahu duhen yóm ktaba le ebéléen, yóm ktaba hol nóyô Dwata bélê le.

²⁴ Yakà tulusen yóm Dwata. Duhen yó, hol hlan le bè tulus yóm ktaba le ebéléen yó kem tau ne hol hewót le bè nawa le.”

²⁵ Ne yó bud monen mò ke Jisas yóm libun yó, monen, “Tngónu angat sut yóm Misaya. Sok sut, angat gotu tulónen tekuy yóm kdéen.”

²⁶ Bud mon Jisas se mò du, “Yóm tau dumuhem stulón ni, du se yóm monem yó.”

²⁷ Bè yóm igò le stulón, kól le se yó kem tau gel lemolò du. Tey ketnga le bè yóm kton le ke Jisas stulón bè yóm libun. Okóm là mlos le smólók du bè yóm libun yóm nóyóen, duhen ke mon le mò ke Jisas, “Moen ke stulóni du?”

²⁸ Tódô lemwót mulék yóm libun yó, tebelen lebwónen, nan e tnulón tu kem tau bè benwuhen, ne monen mò kul,

²⁹ “Mung ye do dé, na ye e hnénég yóm tau tódô tmulón du dou yóm kdê deng nmou. Déke du yóm Misaya.”

³⁰ Tahu se, gotu le lemwót na le e mógów ebè Jisas.

³¹ Bè yóm igoen tolo mógów yóm libun yó koni, tô henken le Jisas yó kem gel lemolò du, mon le, “Ó Sér, mkeni dé.”

³² Okóm mom yó mon Jisas mò kul, “Wen dou ken là kô tngón ye du.”

³³ Stulón le són lu yó kem gel lemolò ke Jisas, mon le, “Tmau du deng mit béléen ken du?”

³⁴ Mon Jisas se mò kul, “Yó se henged dou ken, duhen yóm kimónu yóm kun kóyô yóm hógów dou, ne bè yóm kegdengu du yóm hmoen dou.

³⁵ Sal gel mon ye, ket na fat bulón blóngen, ominen bud wen gel muta. Okóm ni dou mon mò kuy, deng duhen ni se yóm kdaw ye muta. Tenngel ye dé yó kem tau mógów ebéléu ni, hol lómón ke lu yóm halay hulô móyón nuta.

³⁶ Yóm tau muta, wen ofol blay Dwata du. Ne yó kem nutahen, angat guta le se kul yóm klowil laen dù sónen. Yó gónóm mon, gotu le hligal yó kem tau mehek ne yó kem tau muta.

³⁷ Tahu se yóm gel mon le, ‘Tólóng tau fen mehek, tólóng se tau fen muta.’

³⁸ Ni wen naw e huta kuy,” mon Jisas, “yóm tniba tehe là kuy leniteg du. Tólóng tau tehe mbut du, ne wen kuy ofol du yóm tehe kul leniteg.”

³⁹ Tey dê tau bè yó bè Samarya, gotu le hemtahu bè Jisas lemwót bè yóm tulónen kul yóm libun yó koni, bè yóm lanen mon du, “Tódô gotu tulónen dou yóm kdê deng nmou.”

⁴⁰ Timbow le kól bè Jisas yó kem tau bè Samarya yó, tey kngali le du anì nan na legen bélê le bè yó. Tahu se, lewu kdaw Jisas nô bélê le.

⁴¹ Bè yóm igoen nô bè yóm benwu yó, sónmoen se temnù tau hemtahu béléen lan le gel hmungol yóm ktoloken.

⁴² Ne mon le mò yóm libun yó, mon le, “Là kô són du bè yóm kóm tulón kum gónó me hemtahu, okóm ni deng na me bud gungol se kum, ne tngón me du se yóm lemwà kem tau lem salà le.”

Kkó Jisas des yóm ngà yóm sotu tau wen glalen

⁴³ Timbow deng lewu kdaw Jisas nô bè yó, ominen hlós ebè prubinsya Galili.

⁴⁴ Deng tehe mon Jisas, monen, “Yóm tugod Dwata, laen kô dù madat du bè hol kun benwu.”

⁴⁵ Okóm bè yóm kegdeken bè Galili, tey khódó le du yó kem tau bè yó, abay se deng le gmung bè yóm mò ken bong bè Jirusalim bè yóm Kdaw Khius, ne deng ton le yóm kdê deng nmoen bè yó.

⁴⁶ Bud lemwót bè yó Jisas hlós ebè Kana, yóm sotu benwu snakuf Galili gónón tehe hembaling du tifas yóm él. Wen sotu tau wen glalen bè gubérnor nô bè yóm benwu boluyen Kapérnaum. Tey sidek kleed des yóm ngaen logi.

⁴⁷ Timbow gungolen yóm deng kkól Jisas gu bè Judiya ne yóm kegdeken bè Galili, tódô mógów ebéléen nan e hkodu béléen anì tô mung du mulék ebè Kapérnaum, wen tum ngaen deng móyónen matay anì bud hlowil Jisas.

⁴⁸ Ne yó mom mon Jisas mò du, monen, “Ke là wen hentaw ton gel nmou, là kô hentahu ye dou.”

⁴⁹ Bud mon yóm tau wen glalen yó, “Holi mung dou, Sér, gu laanen là deng matay tum ngau.”

⁵⁰ Ne mon Jisas se mò du, “Muléki ne. Mowil he yó tum ngaem.” Tahu se, tódô hentahu yóm tau wen glalen yó koni yóm mon Jisas mò du, ne tódô mulék.

⁵¹ Bè yóm hanà tolo knóen bè lan, wen kem tau gel mò nmò béléen semlong du, tulón le du, mon le, “Deng bud hyu yóm ngaem.”

⁵² Snólóken bélê le yóm kmò kdaw kkó des yóm ngaen, ne mon le se, “Klé kdaw ekimel deng kkó yóm kkinien.”

⁵³ Tódô gbel bè nawa maen, yó se yóm hol kmò kdaw tehe kmon Jisas du mò du, “Bud mowil he yó tum ngaem.” Tódô hentahuhen Jisas se yóm tau yó, dalang se yóm kdê fes lówóhen, gotu le hemtahu se kul.

⁵⁴ Ni se yóm gewu dulék Jisas mò yóm hentaw ton bè Galili. Yóm kmoen du nim ni, kogol yóm kkólen gu bè prubinsya Judiya.