Kun Snulat Jan 2 - Udél Dwata: Gna Kesfasad ne Lomi Kesfasad

Yóm kwen mulu bè Kana

¹ Tikóng deng lewu butengen bè yó, hto yóm nulu bè Kana, yóm sotu benwu udì snakuf Galili. Deng eles nô ditu ne ke Yê Jisas kun.

² Tinok le Jisas snéen dalang se yó kem gel lemolò du ebè yóm nulu yó.

³ Tikóng deng gotu yóm tifas gel ninum le, mon yéen mò ke Jisas, “Laen dù bud tifas le ne.”

⁴ Mon Jisas se mò ke yéen, “Omin he ke tulónem dou yóm nmou, Yê. Là dengen kól du he yóm dou kdaw.”

⁵ Omin Yê Jisas lemwót, stulón bè yó kem tau smagid ken, monen, “Kihu hmò Jisas kuy, tódô nimón ye.”

⁶ Wen kul gel lolò yó kem Ju bè khólós le, yó gónóm mon wen nem lebwón botu eles hyón le bè yó mò gónó le hemsù él mò gel olob yó kem tau. Ni kem lebwón ni, wen na lewu folò duhen ke tlu folò galun lem le.

⁷ Ne mon Jisas mò yó kem tau gel smagid ken, monen, “Nlem ye kut él dé yó kem lebwón yóó.” Tahu se, gotu hennok le.

⁸ Omin Jisas bud mon du mò kul, monen, “Smakub ye du dé, ne benlay ye yóm tau fen hogot le du nim mò ken ni.” Tahu se, benlay le.

⁹ Ne tilówen yóm él deng henbaling Jisas tifas yó koni. Là kô tngónen du kun gónón gu lemwót yóm ninumen yó (okóm yó kem tau smakub du, deng tngón le se kul). Bè yóm ktilówen du, botong htabahen yóm logi myehen,

¹⁰ monen, “Ó Tò, bè yóm sana kut adat, sal gel hegna hinum te yó kem tau mulu yóm tifas alì hyu nómen, ne ke deng bong ninum le, omin te hfuli hinum du kul yóm geblà nómen. Okóm yóm kóm, deng mom hfuli hinumem kum yóm alì mnóm.”

¹¹ Ni se yóm hol tanay hentaw ton nmò Jisas. Nmoen bè yóm sotu benwu snakuf Galili boluyen Kana. Ne bè yó gónóhen hegfan du yóm kfasangen, ne hemtahu le béléen yó kem gel lemolò du.

¹² Timbow kogolen bè yó, gotu le mógów emool le Jisas ebè yóm benwu boluyen Kapérnaum, mung du yéen ne kem twolihen, dalang se yó kem gel lemolò du, okóm là legen le ditu.

Kógów Jisas bè Gónô Dwata

¹³ Móyónen hto ne yóm kmò le ken bong bè Kdaw Khius. Yó gónó Jisas bud lemwót bè yó subô ebè Jirusalim.

¹⁴ Bè yóm kkólen bè yó, tódô hlós ebè yóm Gónô Dwata. Tódô glohen yó kem tau deng mom hembalù safì ne ubiha ne kfati bè yó lemen. Nô le bè yó snéen yó kem tau fen gel lemuluk filak, myón le klohok lemisa le.

¹⁵ Na a lemwót Jisas mò fes tébéd, tódô gotu lohen lu yó kem safì ne yó kem ubiha hbalù le. Ne gotu lugoden yó kem lemisa yó kem tau gel lemuluk filak, ne gotu senbuléten yó kem filak le.

¹⁶ Gotu dóken yó kem tau hembalù kfati, monen mò kul, “Gotu kó ye bè ni ni kem hbalù ye ni. Bê ye henbaling fedyan yóm Gónô Mà.”

¹⁷ Bè yóm kton le du yó kem gel lemolò ke Jisas yóm nmoen yó, tódô gtulón bè nawa le yóm deng monen bè Sulat Dwata, yóm monen, “Ó Dwata, lemwót bè yóm alì kngalihu yóm gónóem, yó angat duón le hmatay do.”

¹⁸ Snólók le bè Jisas yó kem Ju wen glalen bè yó, mon le mò du, “Hentaw ton du tô nmoem mò ilô me du yóm kwen kwalisem mò du nim nmoem ni?”

¹⁹ Yó balà Jisas kul, monen, “Genbà ye dé nim Gónô Dwata ni, bè tlu kdaw sana bud hdau.”

²⁰ Mon le se kul yó kem tau wen glalen yó koni, mon le, “Fat folò nem halay tehe kegen le hemdà du nim Gónô Dwata ni. Fen tô gbek hdaem kô bè tlu kdaw?”

²¹ Okóm yóm gónó Dwata mon Jisas yó, hnigaden yóm kun lówó.

²² Bè yóm kogol kehlowil Dwata ke Jisas gu lem hatay, gtulón bè nawa yó kem gel lemolò du yóm tehe kmonen du yóm yó. Ne hentahu le se yóm tehe snulat bè Sulat Dwata, dalang se yóm deng mon Jisas.

Eles ketngón Jisas yóm kehedem tau

²³ Bè yóm igò Jisas nô bè yóm mò ken bong bè Jirusalim, tey dê tau hemtahu béléen lan le mton yó kem hentaw ton nmoen.

²⁴ Okóm ke Jisas, là kô snaligen kul, abay se deng gotu tngónen kun yóm kmò kehedem tau.

²⁵ Laen dù bud muhen tmulón du béléen yóm kmò le, abay se deng eles tngónen yóm nô lem hendem le.