Kun Snulat Jan 19 - Udél Dwata: Gna Kesfasad ne Lomi Kesfasad

¹ Omin Paylét na habid hfes ke Jisas.

² Timbow deng kfes le du, omin yó kem sendalù lemikin yóm sotu kay tinu semnual mò nmò le kuruna suub le bè kulu Jisas. Ne hesek le du yóm nes ginggung, hningón nmò le tau hol geta.

³ Hloni le ebéléen, ne mon le, “Ni sii yóm tau hol geta bè yó kem Ju. Yake hol tahà klowilen.” Lel le temfê lem uyóhen.

⁴ Bud hewà bè yó Paylét, monen mò yó kem tey tau wen sbung bè yó, “Ngem bud nitu hewà ebélê ye tum tau tu koni anì tngón ye laen kô dù salà tonu béléen ke mò gónóhu hmatay du.”

⁵ Omin Jisas bud hewà, nô bè kuluhen yóm sual lenikin le yó, ne leseken se yóm nes ginggung. Mon Paylét mò kul, “Ngem, ni sii yóm tau yó.”

⁶ Timbow ton le Jisas yó kem tau hol geta bè yó kem gel demsù ebè Dwata ne yó kem tau gel mentey bè Gónô Dwata, gotu le hetê, mon le, “Htutukem bè kros dé. Htutukem bè kros.” Mon Paylét se, “Ke tnutuk ye bè kros, tódô yu mò du, laen dù dou du. Laen se dù salà tonu béléen ke mò gónóhu hmatay du.”

⁷ Bnalà yó kem tau, mon le, “Wen hlau bélê me deng nuléhen nim tau ni, bè yó se gónón matay. Abay se deng bnoluyen knóen Ngà Dwata.”

⁸ Deng mom temnù klikò Paylét deng nan e gungol yóm mon le yó.

⁹ Tódô bud husek elem gónóen, ne bud snólóken Jisas, monen, “Tedu de hol gónóm gu lemwót?” Okóm là dog bnalà Jisas du.

¹⁰ Mon Paylét, “Moen de ke là bnalaem do? Là tngónem du kô yóm kwen kwalisu hewà kóm, ne yóm kwen kwalisu htutuk kóm bè kros?”

¹¹ Mon Jisas se, “Laen kô dù kwalisem béléu ke là deng blay Dwata du kóm. Yó gónóm mon, bong salaen sentahem yóm tau heted do ebéléem.”

¹² Bè yóm kungol Paylét du yóm udél Jisas yó, tey bud tô óyóen hewà du. Okóm deng mom lenwê le hetê yó kem tau, mon le, “Ke hewaem nim tau ni, là kô ye bud swè Sisar, yóm tau hol geta bè Rom. Ke wen tau tô hbaling tau hol geta, natuen Sisar yóm tau yó.”

¹³ Timbow gungol Paylét yóm mon le yó koni, ominen bud mit ke Jisas hewà, ne myón bè yóm bangkù gónón gel hemdeng knukum, yóm bnoluy le “Sneel Botu.” (Yó boluyen bè udél Hibru, “Gabata.”)

¹⁴ Bè yóm kehdeng Paylét du yóm kkukumen ke Jisas, deng móyón gtungu kdaw ne bè suluk yóm Kdaw Khius. Omin Paylét bud mon du mò yó kem tau, “Ni se yóm tau hol geta bélê ye.”

¹⁵ Omin le gotu bud hetê, mon le, “Hfatayem. Hfatayem. Htutukem bè kros.” Mon Paylét se, “Htutuku bè kros kô yóm tau hol geta bélê ye?” Mon le se, “Laen kô dù tau hol geta bélê me són Sisar.”

¹⁶ Tahu se, tódô hlus Paylét ebélê le Jisas anì na le e htutuk bè kros.

Khatay le ke Jisas

¹⁷ Kewót le bè yó, nwit le Jisas, tódô htihang le du yóm kun kros. Nwit le ebè yóm benwu boluyen “Bangag Kulu.” (Yó boluyen bè udél Hibru, “Golgata.”)

¹⁸ Ne bè yó gónó le tmutuk ke Jisas bè yóm kros. Lewu tau homong tnutuk le, sotu hteg le fi bè iwóngen, sotu se fi bè kwananen.

¹⁹ Wen snulat Paylét dket le senta kulu Jisas bè yóm kros. Yó snulaten, monen, “Jisas lemwót bè Nasarit, Tau Hol Geta bè yó kem Ju.”

²⁰ Tey dê tau semfala du yóm snulat Paylét yó abay se moni bè Jirusalim gónó le tmutuk ke Jisas. Snulaten bè udél Hibru, ne bè udél Latin, ne bè udél Grik.

²¹ Mon le mò ke Paylét yó kem tau hol geta bè yó kem gel demsù ebè Dwata, mon le, “Béem snulat, ‘Tau Hol Geta bè yó kem Ju.’ Monem dé, ‘Ni mon nim tau ni, Ou hol tau hol geta bè yó kem Ju.’ ”

²² Mon Paylét se, “Yóm deng snulatu, deng duhen yó.”

²³ Timbow deng ktutuk le ke Jisas bè kros, lemwót yó kem sendalù, na le yóm nes Jisas, omin le semsólól du ket kul na sotu yóm fat le. Okóm là homong le du yóm nes tahà fi bè lówóhen. Yóm nes fi bè lówóhen yó, laen kô dù gónó semtbé du, abay se tódô mung bè tehe kewel du.

²⁴ Stulón le, mon le, “Bê tekuy abay dnóló. Tódô sensatù tekuy dé anì tngón mahi du bélê tekuy gemwa du.” Bè yóm kessólól le nes Jisas yó deng gónón dohò yóm deng tehe eles snulat le bè Sulat Dwata, yóm monen, “Gotu sensólól le nesu, ne sensatù le nes tahau.” Ne tahu se, yó se nmò yó kem sendalù.

²⁵ Ne bè yó klohok yóm kros Jisas gónó le mdà le yéen, ne yóm twoli yéen, ne Midi yehen Klupas, ne yóm sotu Midi lemwót bè Megdala.

²⁶ Ton Jisas yéen, sedà le yóm sotu tau gel lemolò ke Jisas, yóm kenbong nawahen. Mon Jisas mò ke yéen, “Ó Yê, yó dé ngaem.”

²⁷ Ne bud monen se mò yóm tau gel lemolò du yó koni, monen, “Yó dé yéem.” Tahu se, tódô nbuten bè yó ne knô Yê Jisas bè gónô yóm sotu tau gel lemolò ke Jisas yó.

Katay Jisas

²⁸ Tódô tngón Jisas se deng gotu deng ne yóm kdéen, ne yó monen, “Meenge.” Yó gónón mon du yóm yó, mò gónón dohò yóm tehe hsulat Dwata.

²⁹ Ne wen lebwón eles myón bè yó, nô lemen yóm kul gel ninum là mebtesen. Omin le ma yóm lómón tô gófós, ne leneb le lem yóm ninum le yó, ne sù le bè tfod yóm tinu hisop, omin le dmugol du ebè Jisas mò nsefen.

³⁰ Timbow deng ksefen du, ominen mon du, “Deng gotu deng ne kdéen.” Ominen hetngù, ne milot se nawahen.

Kdek le ke Jisas buyus bè klabihen

³¹ Yóm kdaw yó, suluk yóm sotu Kdaw Kehegnô alì bong muhen bè yó kem Ju. Là móyô le du yó kem Ju wen glalen ke gafit yóm kdaw yó yóm ketléwéng lówó yó kem tau deng htutuk le bè kros. Yó gónó le na a smólók du bè Paylét ke hyu na a hetfok ti le yó kem tau tléwéng bè yó anì géhél nwa le lu elaan.

³² Tahu se, hlus Paylét lu. Lemwót yó kem sendalù na le e tenfok ti yóm sotu tau tléwéng bè yó klohok Jisas. Ne senged se yóm sotuhen homong hnatay le.

³³ Okóm timbow le kól bè Jisas, ton le deng matay, ne là kô dog tenfok le du yóm kun ti.

³⁴ Okóm wen sotu sendalù mdek buyus bè klabihen, tódô sen-gengen se msut litóen ne él.

³⁵ (Yóm tau tmulón du nim ni, deng hol tógó matahen mton du, ne hono tahu yóm tulónen. Yó gónón tmulón du anì hemtahu ye se kuy.)

³⁶ Bè yóm là ketfok le ti Jisas yó deng gónón dohò yóm tehe hsulat Dwata, yóm monen, “Laen kô dù angat tenfok le bè yó kem tiolen.”Ne yóm sotu tehe snulat le, yóm monen, “Angat sentngel le yóm tau ndek le buyus.”

³⁷ Ne yóm sotu tehe snulat le, yóm monen, “Angat sentngel le yóm tau ndek le buyus.”

Kebeng le ke Jisas

³⁸ Kogolen bè yó, wen sotu tau sut boluyen Jusif, lemwót bè Arimatiya. (Du se yóm sotu tau bunihen yóm kloloen ke Jisas, abay se likò bè yó kem dumuhen Ju wen glalen.) Yó nmoen, tódô mógów ebè Paylét ne snólóken béléen ke hyu nan e kekas lówó Jisas. Tahu se, hlus Paylét du. Ne lemwót etu Jusif nan e lenkas lówó Jisas.

³⁹ Bè yóm kógów Jusif yó, mung du Nikudimus, yóm tau tehe mógów ebè Jisas kifu. Wen nwiten yó kem alì tilob boohen deng eles senboolen boluyen mira ne alus, wen dô limu folò kilu keblaten.

⁴⁰ Omin le ma yóm lówó Jisas, ne baus le du yóm nes bukay, mung du yó kem alì tilob boohen yó koni. Yó se sana kul adat yó kem Ju bè kebeng le.

⁴¹ Wen ngà hungul koyu moni bè yóm gónó le hmatay ke Jisas yó, ne wen kilib lomi nokol le bè but yóm léhék mò gónó le gel lembeng, bede laen deng tau lebeng le bè yó he.

⁴² Ne tódô bè yó se gónó le lembeng ke Jisas, abay se moni, ne móyón nbut le yóm Kdaw Kehegnô.