Kun Snulat Jan 15 - Udél Dwata: Gna Kesfasad ne Lomi Kesfasad

Jisas yóm hol tahu hulu lemfà mungu

¹ Bud mon Jisas, “Lómón ke ou yóm hol tahu hulu, ne Mà yóm fen semgyok du.

² Ket hangahu là munguhen, sal ntoken. Ne ket hangahu mungu, sal gel hen-gifaten anì hol temnù kbunguhen.

³ Deng ye mefgifat ne kuy mlan bè yóm deng toloku kuy.

⁴ Hol ye henek béléu, ne heneke se bélê ye. Yóm hanga, là kóen mungu ke són du, ke là mtegen bè lówóhen. Senged se kuy, là kô ye mungu ke là henek ye béléu.

⁵ Ou se yóm hulu lemfà ne yu hangahen. Yó se tau henek béléu, heneke se béléen do, ne angat tey kbunguhen. Okóm ke là henek ye béléu, laen kô dù gmò ye.

⁶ Yóm tau ke là heneken béléu, lómón ke hanga ntok tódô hgasà, hlós mékéng. Gotu sentifun le lu, omin le mbot kul elem ofi, ne gotu mlób.

⁷ Okóm ke henek ye béléu ne ke tendo nô bè nawa ye udélu, balù kihu hni ye bè Dwata guta ye.

⁸ Yó gónón megdóyón Mà ke hol ye mungu, ne yó se gónón gdilô yóm klolò ye do.

⁹ Yóm kbong nawahu kuy, hol lómón yóm kbong nawa Mà do. Hol ye henek bè yóm kbong nawahu kuy.

¹⁰ Ke nimón ye yóm dou hlau, yó se gónó ye henek bè yóm kbong nawahu kuy. Lómón yóm kimónu yóm hlau Mà, ne kheneku bè yóm kbong nawahen do.

¹¹ Yó gónóhu eles tmulón du kuy nim ni,” mon Jisas, “anì gnóm ye yóm dou kligal, ne anì hol gsengel nawa ye du yóm kligal ye yó.

¹² Ni hlauhu kuy, hol ye sbong nawa lómón yóm dou kbong nawa kuy.

¹³ Yóm tau ke hamaen klowilen bè kem ween, laen kô gemsenged du yóm kbong nawa yó.

¹⁴ Weu yu ke nimón ye yóm hlauhu kuy.

¹⁵ Là bud bnoluyu kuy tau dók, abay se yóm tau dók, là kô tngónen du kun yóm nmò yóm gónón mogot. Okóm bnoluyu yu wè, abay se deng gotu hetngónu kuy kdê yó kem deng gungolu gu bè Mà.

¹⁶ Là kô yu du mélék do, ou se fen mélék kuy. Yó gónóhu mélék kuy mò hógówu anì hol ye mungu, yóm kbungu laen kô dù tul sónen. Ke ni se nmò ye, balù kihu hni ye bè Mà mlan bè dou boluy, tódô blayen kuy.

¹⁷ Duhen ni, wen hlauhu kuy, hol ye sbong nawa.”

Kutó nawa le kul yó kem tau là hemtahuhen

¹⁸ Bud mon Jisas mò kul, “Bê ye tennga yóm kutó nawa le kuy yó kem tau là hemtahuhen. Tódô tngón ye se deng gegna yóm kutó nawa le do.

¹⁹ Ke nmung ye yóm kul kehedem, là kô knutó nawa le kuy. Okóm ni, tólóng ne kuy kehedem lemwót bè yóm deng kéléku kuy, là bud ye gmung bélê le ne. Yó se lewót gónó le kmutó nawa kuy.

²⁰ Hol hentulón ye nawa yóm tehe monu mò kuy,” mon Jisas. “ ‘Yóm tau gel dók, là kóen geta senta yóm tau mdók du.’ Ke deng hensidek le o, angat hensidek le yu se kuy. Ke deng nimón le yóm toloku, angat nimón le se yóm kuy tolok.

²¹ Angat hensidek le yu lemwót bè yóm klolò ye do, abay se là tngón le du yóm hógów dou.

²² Ke là denge sut lem blóng le, ne tmolok bélê le, là kô na a duón Dwata du kul yóm salà le yó. Okóm ni, laen kô dù bud lasun le ne.

²³ Yóm tau kmutó nawa dou, knutó nawahen Mà snéen.

²⁴ Ke là se deng nmou du lem blóng le yó kem hentaw ton là deng hnikót gel nmò kem tau du, là kô duón Dwata du kul yóm salà le yó. Okóm ni deng gotu ton le, deng mom knutó nawa le o lewu me Mà.

²⁵ Ni se deng kdohoen yóm tehe monen bè sulat Dwata, yóm monen, ‘Tódô knutó nawa le ou là duón.’”

²⁶ Bud mon Jisas, “Wen angat hógówu ebélê ye lemwót bè Mà mò tmóbóng kuy, duhen yóm Tulus Dwata. Du se angat tmolok du kuy yóm ktahuhen lemwót bè Dwata. Ne angat wen tulónen bè yóm dou kmò.

²⁷ Dalang se kuy, angat wen tulón ye lemwót bè dou kmò, abay se deng ye nô béléu lemwót bè yóm kbut ktoloku.”