Kun Snulat Jan 14 - Udél Dwata: Gna Kesfasad ne Lomi Kesfasad

Jisas yóm lan ebè Dwata

¹ Ne yó bud mon Jisas mò kul, monen, “Hol bê ye hesbeweg kehedem ye. Snalig ye Dwata, ne snalig ye ou snéen.

² Bè benwu Mà, tey dê gónô nô. Yó nógówu etu naw e hemtifes bélê ye gónó ye angat nô. Là kô tulónu du kuy nim ni ke là tahuhen.

³ Ke sok deng kehetifesu bélê ye gónô nô,” monen, “bude semfulék edini naw e nangay yu. Yó se dou gónô nô, yó se kuy gónô nô.

⁴ Deng tngón ye se yóm lan ebè yóm gónóhu e solu.”

⁵ Ne mon Tumas se kun, “Là kô tngón me du, Sér, yóm gónóm e solu. Mò tô ketngón me du se yóm lan du?”

⁶ Bud mon Jisas se, “Ou se yóm lan, ne ou se yóm ktahuhen ne yóm klowil laen dù sónen. Laen kô dù tau gógów ebè Mà ke là mlanen béléu.

⁷ Lemwót bè yóm deng ketngón ye do,” monen, “angat tngón ye se Mà. Nbuten ni ne deng ketngón ye du ne deng ton ye.”

⁸ Mon Filip se mò du, “Tolokem kum Maem, Sér, anì gsengel kegnóm me du.”

⁹ Mon Jisas se mò du, “Deng tey kegenu nô lem blóng ye, Filip, là deng tngón ye do he kô? Yó se tau deng mton do, deng tonen se Mà. Moen de ke monem, ‘Tolokem kum Maem?’

¹⁰ Là hentahuhem du dilóu, Filip, yóm knóu bè Mà ne yóm knô Mà béléu? Yóm gel tulónu kuy, là kô lenbuu du, hono kun tulón Mà. Abay se yóm Mà, senflósen nô béléu, ne tódô nmoen yóm kun nmò.

¹¹ Hol hentahu ye dé yóm knóu bè Mà ne yóm knô Mà béléu. Ke megewu nawa ye du nim tulónu kuy ni, hol hentahu ye dé lemwót bè yóm gel nmou.

¹² Tódô tulónu kuy ktahuhen,” mon Jisas, “yó se tau hemtahu béléu, du tles bud gel mò du yóm dou gel nmò. Angat mkay senta ni he kem dou nmò yóm kun angat nmò abay se muléke ebè Mà.

¹³ Balù kihu hni ye bè Dwata hlan ye bè dou boluy,” monen, “tódô blayu kuy mò gónón megdóyón béléu Mà.

¹⁴ Kihu hni ye bè Dwata mlan bè dou boluy, tódô blayu kuy.”

Kfasad Jisas kul yóm Tulus Dwata

¹⁵ “Ke kenbong nawa ye o,” mon Jisas, “nimón ye sen yó kem dou hlau.

¹⁶ Angat wen hnihu bè Mà mò tles bud tmóbóng kuy, ne laen dù sónen yóm knóen bélê ye.

¹⁷ Duhen yó sem kun Tulus Dwata. Angat toloken kuy yóm hol ktahuhen lemwót bè Dwata. Yóm tau là hemtahuhen, là kô henmóyóen du kun yóm Tulus Dwata, abay se là kô tonen du, ne là se tngónen du. Okóm tngón ye kuy, abay se bélê ye tendo gónón nô, ne là kóen na a skó bélê ye.

¹⁸ Bè yóm kógówu ni, là kô tódô bayau kuy. Angate bud semfulék ebélê ye.

¹⁹ Móyón là bud ton le do ne kul yó kem tau là hemtahuhen,” mon Jisas, “okóm angat bud ton ye o yó dum kuy. Lemwót bè yóm bud klowilu, yó se gónó ye angat gmuta yóm klowil laen dù sónen.

²⁰ Bè yóm kdaw bud kton ye do yó, tódô tngón ye yóm kessotu me Mà, ne angat tngón ye snéen yóm kessotu tekuy.

²¹ Yó se tau hemmóyô du yóm dou hlau ne mimón du, yó se yóm tau kembong nawa do. Ne angat kenbong nawa Mà snéen kun yóm tau kembong nawa do yó. Tey kbong nawahu du snéen dou, ne angate hegfan béléen.”

²² Mudél se Judas (sundu yó dum Judas ngà Iskariyut), monen mò ke Jisas, “Moen de, Sér, ke són bélê me gónóhem angat hegfan, fen là bè yó kem tau là hemtahuhen?”

²³ Bnalà Jisas, monen, “Yó se tau kembong nawa dou, nimónen yóm dou tolok. Tey angat kbong nawa Mà du snéen kun, ne angat me tódô setnù béléen lewu me Mà.

²⁴ Yó se tau là kembong nawa do, là kô nimónen du yóm dou tolok. Ne yóm gel toloku kuy ni, là kóen lemwót béléu. Hono lemwót bè Mà, yóm hógów do.

²⁵ Deng eles tulónu kuy kdê ni kem ni yóm igou tolo nô bélê ye.

²⁶ Angat hógów Mà ebélê ye yóm kun Tulus mò tlesu. Du se mò angat tmóbóng kuy. Gotu toloken kuy kdéen, ne angat hegbelen bè nawa ye yóm deng gel tulónu kuy.

²⁷ Wen kenek nawa tebelu bélê ye. Hol lómón yóm dou kenek nawa nim tebelu bélê ye ni. Là kóen mkél bè yóm kul kenek nawa yó kem tau là hemtahuhen. Hol bê ye hesbeweg kehedem ye, ne bê ye se abay hlikò.

²⁸ Deng tulónu kuy se yóm kwen gónóhu e solu ne yóm bud kesfuléku edini lem blóng ye. Ke kenbong nawa ye ou, kaem hyu nawa ye du yóm kógówu ebè Mà, abay se yóm Mà, tey mfasang sentahu.

²⁹ Eles tulónu kuy nim ni gu laanen là deng sut, anì là megewu nawa ye du sok sut.

³⁰ Là buden hol legen ne yóm kestulón tekuy, abay se móyónen sut ne Seitan, yóm fen mogot klamangen. Laen kô dù kfasangen béléu kun.

³¹ Okóm nim nmou ni, tódô nmou yóm kóyô Mà béléu anì tngón kdéen tau lem benwu yóm kbong nawahu du. Yó ne,” monen, “lemwót tekuy ne.”