Kun Snulat Jan 13 - Udél Dwata: Gna Kesfasad ne Lomi Kesfasad

Kolob Jisas ti yó kem gel lemolò du

¹ Tek sendaw ne dù kehtohen yóm mò ken bè yóm Kdaw Khius. Tódô tngón Jisas yóm móyón ktebelen yóm benwu ni, ne bud mulék ebè Maen. Tey tendo gel kbong nawahen kul yó kem tau gel lemolò du, ne là kóen monol nawahen ebélê le efet kól bè yóm ktagaken kul.

² Timbow kifu bè yó, gotu le seyón ke Jisas mken yó kem gel lemolò du. Deng sana hnô Seitan lem hendem Judas yóm angat keblayen ke Jisas sumóng ebè yó kem hmohon du. Nim Judas ni, du se ngà Simun Iskariyut,

³ Okóm ke Jisas kun, deng eles tngónen yóm kfasang deng blay Maen du mò mogot du yóm kdéen. Tngónen snéen yóm kewóten gu bè Dwata ne yóm bud kuléken etu béléen.

⁴ Ominen mdà, kóhen yóm lafin nesen, nan e ma kayab, ne beden bè ówóken.

⁵ Ominen ma lenggana ne nlemen él, ne nbuten molob ti yó kem gel lemolò du, ne bud gel ifuhen du yóm kayab beden bè ówóken.

⁶ Timbow kól bè Simun Pitér, yó udél Simun ebè Jisas, monen, “Tô nolobem tihu kô, Sér?”

⁷ Bnalà Jisas se, monen, “Là kô glileb ye du ni kem nmou bélê ye ni, okóm angat glileb ye he hulin kdaw.”

⁸ Bud mudél Pitér, monen, “Là kóe na a móyô holob du kóm yóm tihu, Sér.” Bud mon Jisas se, “Ke là nolobu du yóm tihem, là kô uu du yóm tau lemolò do.”

⁹ Bud mon Simun Pitér, “Ke lómón se yó, Sér, béen són ti nolobem, homong nolobem sigelu ne kuluhu snéen.”

¹⁰ Ne bud mon Jisas mò du, “Yóm tau deng dyo, deng mólós ne. Geblaen ke olohen bud molob tihen. Deng ye gotu mólós ne kuy, okóm tek sotu bélê ye là mólósen.”

¹¹ (Yó gónó Jisas mon du yóm yó, abay se deng eles tódô tngónen ne yóm tau angat mlay du sumóng.)

¹² Timbow deng gotu kolob Jisas ti le, ominen bud lemsek yóm lafin nesen, ne bud mulék ebè yóm sana gónón myón. Ne snólóken lu, monen, “Deng glileb ye lanen kô nim nmou bélê ye ni koni?

¹³ Gel mon ye, ou se yóm gónó ye gel htolok, ne ou se gónó ye mogot. Tahu se yóm gel mon ye yó.

¹⁴ Ke ou se yóm gónó ye mogot ne yóm gónó ye htolok, ne ke ou yóm molob ti ye koni, hol bud gel sendalang ye se kuy yóm nmou yó.

¹⁵ Nim deng nmou bélê ye ni mò gónó ye dmalang du yóm keheglaan ye bè kem dumu ye.

¹⁶ Tódô tulónu kuy ktahuhen,” mon Jisas. “Là kóen geta senta amohen yóm tau hesek. Ne yóm tau gel dók, là kóen geta senta yóm tau mdók du.

¹⁷ Deng tngón ye ne ktahuhen nim monu mò kuy ni, bong kehligal ye ke nmò ye.

¹⁸ Là kô kdê ye du gónón e gbak nim monu ni. Tódô tngónu yó kem tau deng néléku. Okóm angat dohò yóm tehe hsulat Dwata, yóm monen, ‘Yóm tau dumuhu seyón mken, deng baling hohonen o.’Eles tulónu kuy nim ni,” mon Jisas, “anì yó, ke sok dohò sut, hentahu ye ne yóm deng tulónu kuy gbak bè yóm dou ktau.

¹⁹ Eles tulónu kuy nim ni,” mon Jisas, “anì yó, ke sok dohò sut, hentahu ye ne yóm deng tulónu kuy gbak bè yóm dou ktau.

²⁰ Tódô tulónu kuy ktahuhen,” monen, “yó se tau hmódó yóm tau hógówu, hol lómón ke ou se yóm hnódóhen yó. Ne yó se tau hmódó dou, deng hnódóhen snéen yóm hógów do.”

Eles ktulón Jisas yóm tau matul du bè yó kem hmohon du

²¹ Kogol yóm kudél Jisas yó koni, ya tey sidek kegbeng lemen, monen, “Tódô tulónu kuy ktahuhen, sotu bélê ye bè ni matul dou bè yó kem hmohon do.”

²² Olo le tódô setngel yó kem gel lemolò du, là kô tngón le du ke mahi du bélê le gónón e gbak yóm tau mon Jisas yó.

²³ Uma kóm myón klohok Jisas yóm sotu tau gel lemolò du, yóm kenbong nawahen.

²⁴ Kmotuk ebéléen Simun Pitér, ne monen, “Snólókem béléen kun tau du gónón e gbak yóm monen yó.”

²⁵ Tahu se, hloni ebè Jisas yóm sotu gel lemolò du yó, monen, “Tmau du de, Sér, yóm monem yó koni?”

²⁶ Mon Jisas se, “Yó sem tau gónóhu e mogu yóm mambang deng duu lem sóbów ni kedeng, yó se yóm tau monu yó koni.” Ne nwa Jisas se yóm mambang, ne duen elem sóbów, ominen mogu du ke Judas, yóm ngà Simun Iskariyut.

²⁷ Bè yóm kwa Judas yóm mambang ogu Jisas du, sen-gengen se husek ebéléen Seitan. Ne mon Jisas mò du, “Géhél nmoem ne yóm nmoem.”

²⁸ Okóm balù sotu bè yó kem tau seyón bè lemisa ke gmileb du lanen yóm mon Jisas mò ke Judas yó.

²⁹ Ofo kul mon du ke wen ken na a hebli Jisas ke Judas mò kul ken bè yóm mò ken yó, duhen ke wen nan e heblay du bè yó kem élél, abay se Judas se yóm fen gel mogot filak bélê le.

³⁰ Timbow ken Judas yóm mambang ogu Jisas du, ominen yó hewà. Bede deng tey mget ne kifu.

Yóm lomi hlau

³¹ Bè yóm deng kehewà Judas, yó udél Jisas, monen, “Deng duhen ni ne yóm kdaw kehegfan Dwata yóm kegeta yóm Ngà Tau, ne angat gfan snéen yóm kun kegeta Dwata mlan béléen.

³² Sok gfan yóm kegeta Dwata mlan bè yóm Ngà Tau, kendel bud hegfan Dwata snéen yóm kun kegeta yóm Ngà Tau.

³³ Là buden legen ne, kem ngau,” mon Jisas, “yóm knóu lem blóng ye. Angat hnebel ye ou, okóm bud tulónu kuy yóm tehe tulónu yó kem Ju wen glalen, là gógów ye edu se kuy yóm gónóhu e solu.

³⁴ Ne ni,” monen, “wen lomi hlauhu kuy. Yó hlauhu kuy, hol ye sbong nawa. Lómón yóm dou kbong nawa kuy, bud lómón yó se yóm kuy kesbong nawa.

³⁵ Bè yóm kesbong ye nawa, yó se gónó kdéen tau dmilô du yóm klolò ye do.”

Eles ktulón Jisas yóm angat kehlalà Pitér du

³⁶ Ne mudél se ke Pitér, monen, “Gónóm tô e solu kut ni du, Sér?” Mon Jisas se, “Là kói na a gmung dou bè nim gónóhu e solu ni. Hulin kdaw he kektes ye do.”

³⁷ Ne bud mon Pitér se, “Moen du, Sér, ke là glolou kóm ni? Munge kóm anien he ke tódô hamau yóm dou klowil.”

³⁸ Bud bnalà Jisas Pitér, monen, “Tahu kô tô hamaem béléu kóm klowil? Tódô tulónu kóm ktahuhen, Pitér, gu laanen là deng kmóót onuk kifu ni, deng sana tlu dulékem ne hmalà yóm ketngónem do.”