Kun Snulat Jan 10 - Udél Dwata: Gna Kesfasad ne Lomi Kesfasad

Yóm hlingón Jisas bè yóm tau semgyok ubiha

¹ Bud wen tolok Jisas kul bede hningónen, monen, “Tódô tulónu kuy ktahuhen, ke wen tau husek elem kukub ubiha, okóm là mlanen bè bak tikeben, mom mkaf doli beng mò lanen elemen, deng duhen du se yóm tau mnagaw.

² Okóm yóm tau ke mlan bè bak tikeben, du se yóm tahu semgyok ubiha.

³ Yóm tau gel mentey bè bak tikeb, sal gel lenungkaen béléen yóm tikeb yó. Ne yó kem ubiha nô lemen, tódô dilô le kun udél. Gel tabahen kul yóm kul boluy, ket kul na sotu ne niten lu hewà.

⁴ Sok le deng hewà, tódô tukô gna kul yóm tau gel semgyok kul, ne tódô le se huli du, abay se dilô le udélen.

⁵ Ke tólóng tau tô malak kul, là kô na le e lolò du, mom henlóy le, abay se là kô dilô le du udélen.”

⁶ Ni se yóm hlingón tulón Jisas kul, okóm là kô glileb le du lanen.

Jisas yóm tau hyu kesegyoken ubiha

⁷ Bud mon Jisas mò kul, “Tódô tulónu kuy ktahuhen, hol lómón ke ou se bak tikeb kukub yó kem ubiha.

⁸ Yó kem tau tmolok sekban gu laanu là deng kól dini, hol lómón ke lu se yó kem tau mnagaw. Okóm yó kem dou ubiha, là kô hnungol le kul.

⁹ Ou se yóm henged bak tikeb,” mon Jisas. “Yó se mlan bè yóm bak tikeb yó, angat gewà gu lem hatay. Hol lómón ke du yóm ubiha gel hewà na a mótób ne bud gel husek elem kukuben.

¹⁰ Bong yó dum tau mnagaw, yó se kun gel nógów na a mnagaw, na a hmatay, ne na a gemlà. Okóm yó dou nógów, naw e benlay yu klowil, yóm klowil hol tahu gsengel nawa ye du.

¹¹ Ou se yóm tau tilob kesegyoken ubiha. Gloku tódô hamà klowilu bè yó kem ubihahu.

¹² Okóm yóm tau olon semgyok ubiha lemwót bè yóm gel ksukéy le du, ke sok sut yóm ógóf lóbô gu lem bnes, tódô mlóy yóm tau yó, gtagaken yó kem ubiha sen-gyoken, abay se sundu kun ubiha du, ne là du du yóm tau hol semgyok kul. Yó nmò yóm ógóf lóbô sut yó, wen ubiha kenfóen, ne gotu senklahen lu yó kem dumu.

¹³ Yóm tau snukéy le yó, tódô mlóy, abay se són filak kun hnebel. Là kóen nô bè nawahen yó kem ubiha sen-gyoken.

¹⁴ Ou se,” mon Jisas, “yóm tau hyu kesegyoken ubiha. Gotu tngónu yó kem dou ubiha ne tngón le se ou kul,

¹⁵ hol lómón se yóm kum kesetngón Mà. Angat hamau klowilu bélê le yó kem dou ubiha.

¹⁶ Wen he yó kem dumu ubihahu là deng sentifunu kul ebè ni. Angat gotu nitu lu snéen ne angat hnungol le yóm dou udél. Tódô angat sensotuhu bung le yóm kdê ubihahu, ne tek sotuhu se yóm angat semgyok kul.”

¹⁷ Ne bud mon Jisas, “Tey kbong nawa Mà do, abay se tódô lemwót bè dou kóyô hamà du yóm dou klowil bè yó kem tau. Okóm angat bud gutahu snéen yóm hamau bélê le yó.

¹⁸ Laen kô dù tau gembek ma du yóm dou klowil. Tódô lemwót bè dou kóyô hamà du. Wen kwalisu hamà du ne wen se kwalisu bud ma du snéen. Ni se yóm deng hmò Mà dou.”

¹⁹ Timbow gungol yó kem tau nim udél Jisas ni koni, deng mom bud mesgólól nawa le.

²⁰ Tey dê se bélê le mon du, “Wen busaw malak du” mò ke Jisas. “Lengel matahen. Moen de ke hnungol ye udélen?”

²¹ Okóm mon kem dumu, “Là kô ni du kudélen yóm tau nalak busaw. Ne yóm busaw, là kô gbeken hton du yóm tau butô.”

Kekbê le ke Jisas

²² Deng bud hto se yóm sotu kmò le ken bong yó kem Ju bè Jirusalim, yóm gel mon le, Kdaw Kebwas le yóm Gónô Dwata. Bè yóm gel kmò le du yóm ken bong yó, sal gel geslaen yóm bulónen tnaw.

²³ Yó nmò Jisas, bliwel bè yó bè Gónô Dwata bè yóm gel mon le, Gónô Hgolung tehe Selumun ekni.

²⁴ Gotu le stifun hmilol du yó kem Ju, mon le mò du, “Hol béem abay hegewu nawa me. Tulónem kum ktahuhen. Uu kô yóm Misaya?”

²⁵ Mon Jisas se mò kul, “Igou sem deng hónô tmulón du kuy, là sem dog hentahu ye du. Bè yóm hentaw ton hmò Mà dou, yó gónó ye dmilô du yóm khógówen do.

²⁶ Okóm là kô hentahu ye dou, abay se là gomong ye bè yó kem dou ubiha sen-gyok.

²⁷ Ke yu yóm dou ubiha, kaem hnungol ye udélu. Gotu tngónu lu ne gotu lolò le ou.

²⁸ Angat benlayu lu klowil laen dù sónen, là kô le na a matay. Ne laen se kô dù gembek semkot kul lem hólólu.

²⁹ Yó kem tau nogotu yó,” mon Jisas, “hono gotu blay Mà dou, ne du se hol gembek bè kdéen. Ne laen se kô dù gembek semkot kul lem hólól Mà yó kem deng hogoten dou.

³⁰ Tódô me ssotu Mà.”

³¹ Bè yóm kungol le du yó kem tau yóm udél Jisas yó, tódô le gotu mulut botu mò tô hatay tudà le du.

³² Okóm mon Jisas mò kul, “Tey deng dê ne yóm hyu deng hmò Mà dou lem blóng ye. Mahi du de bè yó kem nmou yó gónó ye tô tmudà dou botu?”

³³ Bnalà le se, mon le, “Là tnudà me kóm botu bè yó dum kehyu nmoem, okóm bè yóm kehsengedem knóem bè Dwata. Olohem tau hkawang he kóm, tói hbaling Dwata.”

³⁴ Bud mon Jisas mò kul, “Wen tehe hsulat Dwata bè kuy hlau, yó monen, ‘Dwata ye snéen kuy.’

³⁵ Na,” mon Jisas, “hónô tngón tekuy yóm deng tehe hsulat Dwata, là kô gbek tekuy bud temles du. Ke deng bnoluy Dwata lu dwata yó kem tau tehe hogoten udélen,

³⁶ milud he kehyuhen béléu, abay se ou yóm deng tehe nélék Dwata mò hógówen elem benwu. Moen de ke mon ye nuléhu Dwata bè yóm kmonu du, Ou se Ngà yóm Dwata?

³⁷ Ke là nmou du yóm hmò Dwata dou, wen but ye là hemtahu do.

³⁸ Okóm ke nmou, yake hentahu ye, baluen ke là hentahu ye du yóm dou udél. Ke hentahu ye yóm gel nmou, kaem dilô ye yóm knô Mà béléu ne yóm knóu bè Mà.”

³⁹ Omin le gotu bud tô kemfô ke Jisas, okóm tódô lana lem blóng le.

⁴⁰ Kewót Jisas bè yó, ne bud mógów efatu Jurdan bè yóm benwu gónó Jan tehe gel mabtays, ne bè yó gónón nô.

⁴¹ Tey dê tau mógów ebéléen, yó mon le, “Yóm tehe kun gel ktolok Jan, laen kô dù hentaw ton gel nmoen, okóm hono tahu yóm gel tulónen gbak ebè yóm tau ni.”

⁴² Ne tey dê tau hemtahu bè Jisas bè yó.