Kul Nmò 9 - Udél Dwata: Gna Kesfasad ne Lomi Kesfasad

Yóm hol kbut yóm kehtahu Sol bè Jisas

¹ Bong ke Sol kun, sónmoen tendo mifis yó kem tau hemtahu bè Jisas, tendo nóló hnatayen lu. Sotu kdaw, mógów ebè yóm tau hol geta bè yó kem gel demsù ebè Dwata,

² mni béléen sulat mò niten ebè yó kem tau malak bè yó kem ket gónó le gel stifun yó kem Ju bè syudad Damaskus anì duhe kóm, ke wen tau tonen hemtahu bè Jisas, wen kwalisen kemfô kul, kihu ke libun duhen ke logi, anì gotu niten lu ebè Jirusalim. Ne tahu se, smulat yóm tau hol geta yó, ne hwiten ke Sol.

³ Omin Sol lemwót bè yó, mógów etu bè Damaskus. Timbow deng moni bè yó, tódô gloufen yóm tey layag temsang gu bè longit.

⁴ Tódô gdouf bè tonok, sen-geng gungolen se yóm mudél, monen, “Ó Sol, Sole. Moen ni du ke sónmoem hmayam dou?”

⁵ Mon Sol se, “Tmau kóm de, Sér?” Monen se, “Ou se Jisas, yóm tendo hnayamem.

⁶ Mdai ne, ne hlósi elem yóm syudad. Wen he tmulón du kóm ditu yóm angat nmoem.”

⁷ Tódô le htengen mdà yó kem dumu Sol, là kô le dog gudél. Gungol le se kul yóm udél yó, okóm laen kô dù tau ton le.

⁸ Tahu se, btik Sol bè yó, ne mukat, okóm là buden mton. Tek sensalak yó kem dumun etu bè Damaskus.

⁹ Botong tlu kdawen là mton, ne là se dogen mken, balù él là kóen btang elem lówóhen.

¹⁰ Wen sotu tau hemtahu bè Jisas nô bè yó bè Damaskus boluyen Ananiyas. Wen tódô hton Jisas du, ne monen mò du, “Ó Ananiyas.” Bnalà Ananiyas se, monen, “Ni ou, Jisas.”

¹¹ Mon Jisas mò du, “Lemwóti ne, mógówi ebè yóm lan bnoluy le Tedeng. Ke kóli bè yóm gónô Judas, snólókem bè yó yóm tau lemwót bè Tarsus boluyen Sol. Tolo mni béléu bè yó.

¹² Deng eles htonu du ne yóm angat kógówem ebéléen, yóm nam e knok du anì bud mton. Ne deng eles hetngónu du se boluyem.”

¹³ Mon Ananiyas se kun, “Ê, Sér. Deng hónô gungolu yóm tau yó, yóm alì kehsideken yó kem tauhem bè Jirusalim.

¹⁴ Blaem yóm hol nógówen edini bè Damaskus nan e kenfô kdê yó kem tau hemtahu béléem bè ni. Hyu wen kwalisen mò du lemwót bè yó kem tau hol geta bè yó kem gel demsù ebè Dwata.”

¹⁵ Bud mon yóm gónóhen mogot mò du, “Lemwóti etu ne, abay se deng néléku nim tau ni mò angat hógówu elem blóng yó kem tau là Juhen, ne ebè yó kem tau hol geta, ne ebè yó kem tau Israél snéen. Du se angat heglalag du yóm dou boluy lem blóng le.

¹⁶ Angat hegfanu béléen he yóm gónón glayam bè yóm kloloen dou.”

¹⁷ Tahu se, lemwót Ananiyas, mógów ebè yóm gónô gónóhen nô Sol, ominen husek. Tonen se Sol, ne nenoken, monen, “Ó Woli Sol, hógówen ou edini yóm gónó te mogot Jisas, yóm Jisas deng hegfan béléem bè lan bè yóm kógówem edini. Hógówen ou anì budi mton, ne anì suen béléem yóm Tulus Dwata.”

¹⁸ Tódô sen-gengen se wen mosok gu lem mata Sol lómón tô unaf utón él, ne tódô henmungen se bud mton. Kdà Sol bè yó na a kendel hbabtays ke Ananiyas.

¹⁹ Ne omin Sol yó he mken. Kogol yóm kkenen, tódô bud mulék ebéléen se yóm kgisen. Nan na legen udì he knô Sol bè yó kem tau hemtahu bè Damaskus.

Ktolok Sol bè Damaskus

²⁰ Tódô kendel mógów ebè yó kem gónó le gel stifun yó kem Ju bè yó na a tmolok. Yó gel tulón Sol, Jisas se yóm hol Ngà Dwata.

²¹ Tey ketnga yó kem tau hmungol du, mon le, “Igò sem ni du yóm tau tendo tô hmatay yó kem tau hemtahu bè Jisas bè Jirusalim. Igoen se yó tô nógówen edini nan e kenfô yó kem tau hemtahu, tô nwiten lu mulék ebè yó kem tau hol geta gel demsù ebè Dwata.”

²² Okóm ke Sol kun, deng sónmoen temnù kfasangen tmolok. Sónmoen temnù snéen yóm khulungen hetngón du Jisas se yóm Misaya. Botong là gbalà le du yó kem Ju bè Damaskus.

²³ Timbow deng malù legen ne yóm ktolok Sol bè yó, gotu le stifun yó kem dumuhen Ju, deng mom sensatul le yóm kmò khatay le du,

²⁴ okóm wen heglileb du ke Sol yóm tô katul le du. Yó nmò yó kem tau tô hmatay du, ket kdaw le ne ket kifu le tendo tô hmékét du bè yó kem bak tikeb yóm syudad yó.

²⁵ Okóm sotu kifu bè yó, nwit le Sol yó kem dumun hemtahu, ne yó kmò le du, hyón le lem kalat, ne hloyol le elaan hlan le bè yóm sotu sol beng yóm benwu yó etu laan bè tonok mò lanen hewà.

Kógów Sol ebè Jirusalim

²⁶ Kewót Sol bè yó, mulék ebè Jirusalim. Yóm kkólen ditu, tô mung segduf bè yó kem tau lemolò ke Jisas, okóm mom knikò le, abay se tolo là deng snalig le du yóm deng kloloen ke Jisas.

²⁷ Okóm tnóbóng Barnabas Sol, niten ebè yó kem tau tehe hógów Jisas nan e tulón kul yóm deng kton Sol yóm gónó le mogot bè lan ne yóm kudélen ebéléen. Tulónen snéen yóm là klikò Sol heglalag du yóm boluy Jisas ditu bè Damaskus.

²⁸ Kewóten bè yó ne tódô hlós mung bélê le ne Sol, ne tódô lenngeben Jirusalim yóm ktoloken. Là kóen likò hetngón du boluy yóm gónó le mogot.

²⁹ Gel niten stulón yó kem Ju són udél Grik udél le, ne gel niten lu skaf mon. Okóm deng mom tô hnatay le.

³⁰ Timbow glileb yó kem dumu tau hemtahu nim ni, eted le Sol bè syudad Seseriya, hógów le etu bè syudad Tarsus.

³¹ Kogolen bè yó, laen dù bud sembeweg kul ne yó kem tau hemtahu bè Jisas bè klamangen prubinsya Judiya ne Galili ne Samarya. Lemwót bè yóm któbóngen kul yóm Tulus Dwata, yó gónón hlós baling mbegel yóm kehtahu le, ne sónmoen tendo temnù tau hemtahu bè Jisas. Tey gel klikò le ke là nimón le yóm gónó le mogot.

Ktolok Pitér bè benwu Lida ne benwu Jupa

³² Ne yó gel nmò Pitér, tey dê benwu bniwelen, gel nauyen yó kem dumuhen deng hemtahu. Sotu kdaw bè yó, nauyen yó kem tau Dwata bè yóm benwu udì boluyen Lida.

³³ Tikóng kól ditu, tonen yóm sotu tau boluyen Aniyas, deng matay sfu lówóhen. Botong wolu halay kegenen là dog gógów, sónmoen hlilil.

³⁴ Mudél ebéléen Pitér, monen, “Ó Wè Aniyas, Jisas Krays fen hkó du béléem yóm desem. Btiki ne, ne hentifesem yóm gónóm hlilil.” Tahu se, tódô kendel hboluk btik Aniyas.

³⁵ Timbow ton yóm kdéen tau nô bè yóm benwu lemnek Lida ne Sidon yóm kkó des yóm tau yó, tódô le gotu baling hemtahu bè Jisas.

³⁶ Bè yóm sotu syudad boluyen Jupa, wen sotu libun boluyen Tabita nô du, libun hemtahu bè Jisas. (Yó boluyen bè Grik Durkas. Yó lanen yóm boluy yó, “uhu.”) Nim libun ni, tey hyu yóm gel nmoen, tódô senflósen gel tmóbóng yó kem dumun wen gónó le élél.

³⁷ Bè yóm tolo knô Pitér bè Lida, semlaw Durkas, ne hlós hatayen. Omin le demyo lówóhen, ne sù le bè yóm sotu dfél tofi ta bè kun gónô.

³⁸ Uma kóm yóm kun benwu bè Jupa, moni bè Lida, yóm benwu gónó Pitér nô. Timbow tngón yó kem tau hemtahu bè Jupa yóm knô Pitér bè Lida, wen lewu tau dók le mò na a mangay du. Yó udél hwit le, mon le, “Hesloi kum edini” mò ke Pitér.

³⁹ Ne tahu se, mung kul Pitér. Yóm kkólen bè yó, tódô nwit le bè yóm dfél tofi ta. Gotu le nô bè yó snéen yó kem libun bolu. Tey kkik le, ne tolok le ke Pitér yó kem nes tehe gel tenbé Durkas bélê le yóm hanà tolo kegenen mowil.

⁴⁰ Na gotu hefewà Pitér lu yó kem libun yó. Ominen mtud bukolen, ne mni bè Dwata. Deng knihen, tódô beklil ebè yóm matay, monen mò du, “Ó Tabita, btiki ne.” Tahu se, tódô kendel henmungen mukat yóm libun yó. Bè yóm ktonen ke Pitér, ominen tódô hboluk myón.

⁴¹ Nogot Pitér se bè sigelen ne niten mdà. Omin Pitér gotu tmaba yó kem libun bolu ne yó kem dumu tau hemtahu bè yó anì na le e hnénég yóm deng bud klowilen.

⁴² Yóm klowilen yó, tódô lenngeben klamang Jupa, ne tey dê tau baling hemtahu bè Jisas.

⁴³ Nan na legen udì Pitér bè yó bè Jupa bè gónô yóm adénen Simun. Nim Simun gónó Pitér nô ni, wen kenhulung nmoen lemwót bè kulit ógóf.