Kul Nmò 4 - Udél Dwata: Gna Kesfasad ne Lomi Kesfasad

Kehdà le ke le Pitér ne Jan bè solu yó kem tau hol geta mogot kukum

¹ Bè yóm igò le Pitér ne Jan tolo mudél ebè yó kem tau deng stifun bè yó lem Gónô Dwata, sut bélê le yó kem tau gel demsù ebè Dwata, mung kul yóm kfitan bè yó kem tau gel mentey bè Gónô Dwata, ne wen se bè yó kem Sadyusi.

² Ya tey keklit le du yóm ktolok le Pitér, abay se yó gel tulón le yóm deng bud klowil Jisas. Ne bè yóm deng bud klowilen yó, yó se hol gónó le temngón du yóm angat bud klowil yó kem dumu tau deng matay.

³ Yó gónóm mon, tódô kenfô le lu le Pitér ne sù le lu lem blanggù efet kól haya, abay se deng kimel yóm kekfô le kul.

⁴ Bede tey dê bè yó kem tau deng mungol yóm ktolok le baling hemtahu. Setnù logi hemtahu gomong bè gnan, wen dô limu libu kwadag le.

⁵ Timbow hayahen bè yó, gotu le stifun yó kem tau malak bè Jirusalim, dalang se yó kem tuha bélê le, ne yó kem tau gel tmolok hlau.

⁶ Mung stifun bélê le Anas snéen, yóm hol geta bè yó kem tau gel demsù ebè Dwata, dalang se Kyafas ne Jan ne Aliksandér ne yó kem dumu fes lówó yóm tau hol geta yó.

⁷ Tódô hdà le Pitér lewu le Jan bè solu le, yó snólók le bélê le, mon le, “Kmò kehdà ye du nim tau tehe kihod ni? Tau du de bemlay du kuy yóm ktued ye mò du? Boluy du de gónó ye hlan du?”

⁸ Bnalà Pitér lu, uma kóm yóm Tulus Dwata malak du ksumóngen, monen mò kul, “Yu kem tau gónó me gel galak, dalang se kuy kem tuha.

⁹ Ke yó snólók ye yóm któbóng me yóm tau tehe kihod ni, ne yóm kmò kkóhen,

¹⁰ hyu se ke tngón ye, ne hyu snéen ke tngón yó kem kdéen tau Israél. Yó gónón baling hyu nim tau tehe kihod mdà bè solu ye ni, tódô lemwót bè kfasang yóm kun boluy Jisas Krays lemwót bè Nasarit. Du se yóm deng tehe htutuk ye bè kros ne matay, okóm deng bud hlowil Dwata.

¹¹ Du se yóm gónón e gbak yóm tehe mon Dwata bè sulaten, yóm monen, ‘Wen botu deng senkbê yó kem tau hemdà gónô, ofo kul ke laen dù muhen. Anì monem tek sónen yó se yóm botu mò hembegel du yóm gónô hdà le.’

¹² Duhen yó,” mon Pitér, “Tek són Jisas gembek lemwà tekuy gu lem hatay. Laen kô dù dumu tau talak tonok ke gónó Dwata hlan du yóm kegewà tekuy, tek són Jisas.”

¹³ Ya tey ketnga yó kem tau hol geta mogot kukum yóm kton le laen dù klikò le Pitér ne Jan, ne yóm ketngón le du olo le kem tau hkawang, laen dù hennagì le. Bud gtulón bè nawa le yó kem lewu tau yó, lu se yóm tehe gel slomong ke Jisas.

¹⁴ Tô senkbê le yóm tulón le, okóm laen dù gmò le, abay se eles mdà bè yó klohok Pitér ne Jan yóm tau tehe kihod.

¹⁵ Na le na hefewà le Pitér bè yóm dfél gónó le kmukum kul yó anì na le stulón són lu yó kem tau mogot kukum.

¹⁶ Yó mon le, “Kmò atul tekuy kul ni kem tau ni? Là kô gbek tekuy hemkéng du yóm hentaw ton deng nmò le, abay se tódô kdéen tau bè ni bè Jirusalim gotu temngón du.

¹⁷ Yake olo tekuy tódô hendlà mólów kul anì là bud tulón le du yóm boluy Jisas balù kihu tau, anì là senflósen mból yóm gel tolok le ni.”

¹⁸ Timbow deng kestulón le, omin le bud htaba kul le Pitér elemen. Yó mon le mò kul, “Tódô tenflok ye ne ni yóm ktolok ye du yóm boluy Jisas.”

¹⁹ Okóm bnalà Pitér ne Jan lu, mon le, “Bè kuy kmò kehedem du, mahi du hyu bè kton Dwata kum, ke nimón me yu duhen ke Dwata?

²⁰ Là kô gbek me temflok tmulón du yóm deng ton me ne yóm deng gungol me.”

²¹ Okóm yó kem tau mogot kukum, mom milud kbólów le kul bè yóm ktolok le, omin le tódô hefewà kul. Là mlos le tmafak kul, abay se tey dê tau dmóyón ke Dwata lemwót bè yóm deng kehyu yóm tau kihod.

²² Yóm tau kihod yó, deng mukas fat folò halayen ne kegenen tau.

Kni le bè Dwata yó kem tau hemtahu bè Jisas

²³ Bè yóm deng kegewà le Pitér bè yó lewu le Jan, mulék le ebè yó kem dumu le hemtahu. Gotu tulón le kul yóm udél le ebélê le yó kem geta gel demsù ebè Dwata ne yó kem tuha gónó le gel galak.

²⁴ Timbow deng gungol yó kem tau hemtahu, omin le gotu mni bè Dwata, mon le, “Ó Dwata, uu se tehe dmimun yóm longit ne tonok ne mohin ne kdéen ton.

²⁵ Deng wen tehe hmonem yóm fù me Dabid ekni, yóm sotu tehe tauhem, tehe hlanem bè yóm Tulusem, yóm monen, ‘Moen de ke alì sidek kebut yó kem tau là Ju le? Moen de ke alì dê gel natul le, yóm atul laen dù gónón e gefet?

²⁶ Gotu le stifun yó kem tau hol geta mogot benwu, ne deng gotu sogot atul le. Tô natù le Dwata, ne tô natù le snéen yóm Misaya.’

²⁷ Yó tendoken yóm tehe udél Dabid yó, duhen yóm lomi kestifun le bè nim benwu ni le Hirod ne Puntyus Paylét, mung kul yó kem tau là Ju le dalang se yó kem Ju. Kul atul yóm khatay le ke Jisas, yóm tau tóbóng lówóhem laen kô belenen deng hógówem elem blóng me, yóm Misaya tehe nélékem.

²⁸ Bè yóm kessatul le du yóm yó, Dwata, ne yóm kdê nmò le bè Jisas, yó se deng gónón dohò yóm deng tehe oluhem du, deng hlanem bè kóm kóyô ne kóm kfasang.

²⁹ Ne ni, Dwata, hol hnungolem yóm tey kifis le kum. Hol ten-gelem mi kem kóm tau, anì là likò me tmulón du yóm kóm tulón.

³⁰ Hol hegfanem bélê le yóm kóm kfasang hkó des, ne hol nmoem yó kem dumu hentaw ton gel nmoem hlanem bè boluy Jisas, yóm tóbóng lówóhem, yóm laen dù belenen.”

³¹ Kogol yóm kni le, tódô hsinsig Dwata yóm gónô gónó le nô, ne ominen bud hemsù du bè kdê le yóm Tulusen. Ne tódô nbut le bè yó tmulón du yóm deng tulón Dwata kul, ne laen dù bud klikò le mò du.

Kestóbóng yó kem tau hemtahu

³² Tey tilob kessotu nawa le yó kem tau hemtahu bè Jisas. Balù yó kem kimu le, laen kô mtukul mfun du bélê le. Ke wen bélê le wen gónón élél, tódô sentóbóng le.

³³ Ne tey wen kfasang blay Dwata kul yó kem hógów Jisas bè yóm gel ktulón le du yóm deng bud klowil Jisas yóm gónó le mogot. Ne tódô seflós yóm tey któbóng Dwata kul yóm kdéen tau hemtahu bè Jisas.

³⁴ Balù sotu bélê le ke wen gónó le élél. Abay se wen bélê le, glok le hembalù tonok le duhen ke gónô le. Lemwót yóm blihen,

³⁵ blay le yó kem hógów Jisas anì lu fen gel mólól du ke wen bélê le wen gónón élél.

³⁶ Duhen yó, wen sotu tau lemwót bè Siprus boluyen Jusif, tau semfu gu bè yóm tehe Libay. Yó iba le du yó kem hógów Jisas, Barnabas (yó lanen yóm boluy yó, hulung semgduf).

³⁷ Yó nmò nim Barnabas ni, hbaluen tonoken. Lemwót yóm blihen, tódô hensulék blayen bè yó kem hógów Jisas.