Kul Nmò 24 - Udél Dwata: Gna Kesfasad ne Lomi Kesfasad

Keskukum le Pol bè solu Gubérnor Filik

¹ Timbow deng limu buteng Pol kól bè Seseriya, kemtes se Ananiyas, yóm hol geta bè yó kem gel demsù ebè Dwata, mung du yó kem tuha gónó le gel galak yó kem Ju. Wen sotu begadu mung kul snéen boluyen Tertulus. Mógów le ebè Gubérnor Filik.

² Omin Filik htaba ke Pol. Ne nbut Tertulus bè yó se mudél, tulónen yóm duón le ke Pol, monen, “Ó Gubérnor, tey menek kbenwu me yóm klawihem mogot benwu. Tey wen kayen yóm benwu me lemwót bè yóm tóbóngem kum.

³ Tey kehyu nawa me du yóm tóbóngem kum yó, tey bong keslamat me béléem.

⁴ Okóm ni, là móyóe gmanggà kóm. Hol henkodu me béléem anì nam hnungol nim udì tulón me kóm.

⁵ Nim Pol ni,” monen, “són sembeweg kem tau menwu nmoen. Sónmoen tendo hesbeweg kehedem kdéen Ju bè klamangen benwu. Du se gel malak yó kem tau lemolò du yóm kun tolok yóm tehe tau lemwót gu bè Nasarit.

⁶ Sotuhen,” mon yóm begadu, “tô nuléhen yóm kum hlau bè gónô Dwata. Yó gónó me kemfô du, ne tô hlan me bè kum hlau yóm tô kkukum me du.

⁷ Mom tódô nalaw yó kem sendalù Kmandér Lisiyas bélê me,

⁸ ne monen mò kum, ‘Skukum ye ditu bè solu gubérnor.’ Ke snólókem nim Pol ni, tódô tngónem béléen yóm kdê duón me du.”

⁹ Timbow deng kudél yóm begadu, omin le gbót dmelem se kul yó kem dumu Ju, ne bud mon le, “Là kóen kéng yóm udél begadu yó dé.”

Kbalà Pol kul bè solu Gubérnor Filik

¹⁰ Omin Filik hudél ke Pol. Ne mudél se Pol, monen, “Deng tey kegenem ne mogot kukum lem blóng me, Gubérnor, yó gónón hyu nawahu ke bnalau lu bè ni bè soluhem.

¹¹ Deng sfolò lewu butengen ni ne,” mon Pol, “yóm kógówu ebè Jirusalim naw e tô tmaba bè Dwata bè yó. Baluen ke snólókem yó kem dumu tau yóm kógówu etu yó.

¹² Ni kem tau kmamo dou ni, là kô ton le du béléu ke naw e mit skuya mon lem Gónô Dwata, duhen ke senbewegu yó kem tau bè yó. Laen dù kô tau senbewegu bè yó kem kul gónó gel stifun yó kem Ju le snéen. Laen se dù tau senbewegu balù kihu gónóhu nô bè yó bè Jirusalim.

¹³ Kdê ni kem tifù le dou ni, laen dù gónó le hegfan du yóm hol ktahuhen.

¹⁴ Là kóe myak tmulón du kóm, Sér, yóm klolou yóm sana Dwata lolò yó kem tehe fù me ekni, tódô lolou bè yóm kun kehlan du Jisas, yóm deng mon le tolok sekban. Okóm yóm kdê snulat bè hlau Musis, gotu hentahuhu se dou. Dalang se kdê yó kem snulat yó kem tehe gna tugod Dwata ekni, gotu hentahuhu snéen.

¹⁵ Ni kem tau kmamo dou ni,” mon Pol, “tódô senged se yóm hendón nefet nawa me, duhen yóm angat bud klowil Dwata kdéen tau, tau hyu nmò le senged se ke tau sidek nmò le.

¹⁶ Yó gónóm mon, tódô hotuhu gelu dou mò du yóm tedeng anì laen dù blóngu ebè Dwata duhen ke ebè kem dumuhu tau.

¹⁷ Deng tey hilu halayu ne là bud gemdà bè Jirusalim,” mon Pol. “Bè yóm lomi kógówu naw e eted yóm filak mò blay bè yó kem tau élél bè yó, ne wen tô hedsuu ebè Dwata.

¹⁸ Bè yóm tolo kmou du nim ni, wen kem tau Ju mton do lem Gónô Dwata, deng deng ne klolou du yó kem hlau lemwót bè khólós me. Laen dù tau sbung klohoku, ne laen se dù gungolu tau hebnes.

¹⁹ Okóm wen bè yó kem Ju lemwót ditu bè prubinsya Asya nô bè yó. Yake lu dé mógów edini ne kmamo dou bè soluhem ke wen tô tifù le dou.

²⁰ Sotuhen, ni kem tau mdà gu bè ni ni, mò le là tmulón du bè ni du ke wen se salà tehe ton le béléu bè yóm tanay kehdà le dou bè solu yó kem tau hol geta mogot kukum bè yó kem Ju.

²¹ Déke yó duón le do bè yóm tehe kehgelu udélu lem blóng le, yóm kmonu du. ‘Hentahuhu yóm angat bud klowil tau hulin kdaw.’ Dô ni se duón le dou, Sér,” mon Pol.

²² Bong ke Gubérnor Filik kun, deng hónô tngónen ne yóm mò klan yóm ktolok Jisas, yó gónón temflok du yóm udél Pol, yó monen, “Bê tekuy tagad hendeng he. Na kuy hangat Kmandér Lisiyas sok kól dini.”

²³ Ominen mdók yóm sotu kfitan anì hlós kbentey le ke Pol, okóm là kenbéen du ke wen wè Pol mógów ebéléen mò fen bemlay du yóm wen muhen du.

Ktolok Pol ke Gubérnor Filik ne tuha libunen

²⁴ Sotu kdaw bè yó, bud mógów ebè yó Gubérnor Filik, mung du tuha libunen boluyen Jusila. Libun Ju se kun nim Jusila ni. Omin Filik hangay ke Pol anì hnungol le yóm tulónen bè yóm kehtahu bè Krays Jisas.

²⁵ Bè yóm igò Pol mudél, wen gtóngen bè yóm kebtol nawa, ne bè yóm khulung mafas nawa, ne yóm angat kehdà Dwata kdéen tau bè soluhen. Botong likò Filik bè yóm kungolen du, tódô tenfloken kudél Pol, monen, “Nan geblà yó he. Tódô bud tinoku uu he ke wen urasu.”

²⁶ Ket kiwól Filik hangay ke Pol ne stulón du. Yó hol nô bè nawahen ke wen filak blay Pol du.

²⁷ Bè yóm gewu halay Pol nô bè yó, tólóng tau ne tles gubérnor, boluyen Porsyus Fistus. Okóm ke Filik kun, kóyóen ke hol hyu nawa le ebéléen yó kem Ju, yó gónón là hewà ke Pol.