Kul Nmò 23 - Udél Dwata: Gna Kesfasad ne Lomi Kesfasad

¹ Bè yóm kdà Pol bè solu yó kem tau mogot kukum, nan na temngel ebélê le, ominen mon du mò kul, “Kem dou dumu tau Israél, bè dou kegnóm du, laen kô du tngónu ke mò blóngu ebè Dwata efet nim kmoen ni.”

² Bè yóm kungol Ananiyas, yóm tau hol geta bè yó kem gel demsù ebè Dwata, yóm udél Pol yó, botong monen ebè yó kem tau mdà klohok Pol, “Hol tnufê ye sumóngen dé.”

³ Ne yó se kun balà du Pol, monen, “Kaem Dwata he tmufê kóm, tau gel hemtedeng knô. Yó tô nmoem bè yóm kyónem yó, knukumem ou hlanem bè yóm hlau tekuy. Igoem se deng mom mulé du se kóm yóm hlau bè yóm lanem htufê dou.”

⁴ Yó udél yó kem tau mdà klohok Pol, mon le, “Tô natuem kô yóm tau hol geta bè yó kem gel demsù ebè Dwata?”

⁵ Bnalà Pol se lu, monen, “Tey, kem dou dumu tau Israél, là kô tngónu du ke du yóm hol geta bè yó kem gel demsù ebè Dwata. Ke tngónu, là kô nmou du, abay se monen bè udél Dwata, ‘Béi mudél sidek ebè yóm tau gónó ye galak.’ ”

⁶ Timbow dilô Pol wen se Sadyusi ne wen se kem Farisi bè yó kem tau mogot kukum, ominen hgel udélen, monen, “Kem dou dumu tau Israél, ou snéen sotu Farisi. Dalang se yó kem tehe fuu, Farisi le snéen kul. Ni se duón yóm kkukum ye dou ni abay se hentahuhu yóm angat klowil tau.”

⁷ Bè yóm kungol le du nim mon Pol ni, deng le mom gotu skaf mon yó kem Farisi ne yó kem Sadyusi, ne deng mom gotu mesgólól nawa yó kem tau kmukum bè yó.

⁸ Abay se yó kem Sadyusi, là kô hentahu le du ke wen bud angat klowil tau. Ne là hentahu le du snéen ke wen hógów Dwata gu bè longit, duhen ke wen lóyóf tau. Okóm yó kem Farisi, fen hentahu le kul yó kem tlu yó.

⁹ Ngang le mò du yóm skuya mon yó koni efet le mom gotu sefetê. Ominen wen bè yó kem Farisi gel tmolok hlau mdà lem blóng le, ne hgel le udél le, mon le, “Laen dù salà ton me béléen nim tau ni” mò ke Pol. “Déke wen tahu hógów Dwata gu bè longit stulón du, duhen ke wen dumu nmò Dwata mò lanen stulón du.”

¹⁰ Deng mom lenwê le yóm alì keseftê le yó. Botong tafa nawa yóm kmandér, hendemen ke senkteng le Pol yó kem tau, ngem kà skó lówóhen lem blóng le. Tódô kendel dóken yó kem sendaluhen anì géhél na le e nangay Pol anì nit le mulék ebè kamfù le.

¹¹ Bè yóm kifu yó, tódô hegfan bè Pol Jisas, yóm gónóhen mogot. Mdà klohoken, monen mò du, “Hgelem nawahem, Pol. Deng tulónem o se bè ni bè Jirusalim. Senged se angat nmoem ditu bè Rom.”

Katul le yóm khatay le ke Pol

¹² Timbow hayahen bè yó, stifun yó kem dumu Ju sensatul le yóm kmò khatay le ke Pol. Hyu deng eles senfasad le, mung du safà le, yóm là tagad kken le ne là kinum le ke là deng ghatay le ke Pol.

¹³ Wen dô mukas fat folò kwen le semsatul du.

¹⁴ Omin le mógów ebè yó kem tau hol geta bè yó kem gel demsù ebè Dwata ne ebè yó kem tuha gónó le gel galak, yó mon le mò kul, “Deng wen tey senfasad me, mung du safà me. Yó senfasad me yóm là tagad kken me ke là deng ghatay me ke Pol.

¹⁵ Yó tô atul me,” mon le, “yu ne yó kem tau mogot kukum, fen ye kut tminok ebè yóm kmandér, anì nan na bud hógów edini Pol, abay se hningón wen tô bud snólók ye béléen. Lemwót yó dum kum, fen hnékét me bè lan.”

¹⁶ Okóm wen ngà fen gemklingu du nim sensatul le ni, bede ngà libun Pol logi. Tódô mógów ebè kamfù yóm ngà logi yó koni, ne tulónen ke Pol yóm deng gungolen.

¹⁷ Timbow gungol Pol se kun, ominen tmaba yóm sotu kfitan, monen mò du, “Yake nitem nim ngà nii ebè yóm kmandér, yakà wen tulónen du.”

¹⁸ Tahu se, niten etu, ne monen bè yóm kmandér, “Hmung yóm tau bnanggù nim ngà logi ni, wen tulónen kóm kun.”

¹⁹ Omin yóm kmandér malak bè sigel yóm ngà logi yó koni, lifut snólóken béléen, monen, “Tedu de yóm tô tulónem dou?”

²⁰ Monen se, “Ó Sér, deng sensatul le Pol yó kem Ju wen glalen, hni le béléem kun ke haya anì hwitem etu bélê le, ne bud hdà le lem blóng yó kem tau hol geta mogot kukum. Hningón wen tô bud snólók le béléen kun.

²¹ Okóm béem abay hwit etu bélê le, abay se deng wen mukas fat folò hmékét du bè lan anì hnatay le. Hyu deng wen senfasad le, mung du safà le, là tagad le mken ne minum ke là deng ghatay le du. Deng le gotu hékét ne yó kem tau yó, nangat le yóm khógówem du etu.”

²² Yó mon yóm kmandér, monen mò du, “Hol béem abay tulón yóm deng sebem dou ni.” Ominen hulék yóm ngà logi yó.

Kwit le ke Pol ebè Gubérnor Filik

²³ Timbow deng mulék yóm ngà logi yó koni, omin yóm kmandér tmaba lewu kfitan, monen mò kul, “Matul ye lewu latu sendalu mò fen mógów tmonok ebè Seseriya, ne hitu folò fen kmudà, ne lewu latu tau hulung mogot buyus. Kifu ni kedeng kewót ye, wen dô senga bong tau, na ye e nomung Pol etu bè Gubérnor Filik.

²⁴ Matul ye kem kudà mò tendo sentufì snakay Pol. Hol tnanud ye do anì laen dù gfaen bè lan.”

²⁵ Ne wen sulat hwit yóm kmandér ebè Gubérnor Filik, yó monen,

²⁶ “Ou Klodyus Lisiyas smulat du nim sulat ni mò hwitu ebéléem, Gubérnor Filik.

²⁷ Ó Sér, nim tau hwitu ebéléem ni, kenfô yó kem Ju, tô hnatay le. Timbow tngónu tau Rom nim tau ni, yó gónóhu halaw du yó kem sendaluu lem hólól le.

²⁸ Deng hdau lem blóng yó kem Ju mogot kukum anì tngónu yóm hol duón le du.

²⁹ Okóm bè yóm dou kmò kilô du, laen kô dù salà tonu béléen nim tau ni ke lewót gónó hmatay du duhen ke mò gónó bmanggù du. Tódô lemwót bè kul là kesegtud nawa lemolò yóm kul hlau nim gónón gemdà bè kukum ni.

³⁰ Timbow wen mseb du dou yóm deng kessatul le hmatay du yó kem Ju, yó gónóhu kendel hemwit du edyó béléem. Deng tulónu yó kem tau alì dmuón du hyu ke dyó béléem gónó le kmamo du.”

³¹ Tahu se, tódô lolò yó kem sendalù yóm dók yóm kmandér, nangay le Pol yóm kifu yó, ne omin le lemwót. Ngang le mógów efet le kól bè syudad Antipatris.

³² Tikóng hayahen bè yó, omin le gotu bud beklil mulék yó kem sendalù mógów tmonok, fen le hlós mung ke Pol yó kem sendalù smakay kudà.

³³ Bè yóm kgefet le bè Seseriya, ogu le bè yóm gubérnor yóm sulat, ne tebel le bè yó Pol. Omin le bud lemwót mulék se kul.

³⁴ Timbow deng senfala Filik yóm sulat, ominen smólók ke Pol ke tedu yóm kun prubinsya gónó lemwót? Timbow gtukulen lemwót bè Silisya, sotu kun benwu snakuf,

³⁵ yó gónón mon du, “Hnungolu he yóm duón le kóm ke deng le sut bè ni yó kem tau kmamo kóm.” Ominen yó mdók yó kem sendaluhen anì nwit le Pol ebè yóm sotu gónô tehe hdà yóm tehe Hirod anì ditu gónón hbentey du kul.