Kul Nmò 2 - Udél Dwata: Gna Kesfasad ne Lomi Kesfasad

Kgefeten bélê le yóm Tulus Dwata

¹ Timbow deng kól yóm kdaw boluy le du Pintikus, deng le gotu stifun ne yó kem tau hemtahu bè Jisas bè yóm sotu gónô.

² Bè yóm igò le stifun, tódô kento gungol le yóm tey lemungkul gu bè longit, hol lómón ke lungkul yóm tey lenos bong. Tódô lenngeben lem yóm gónô gónó le stifun.

³ Omin le mton yóm lómón tô dilóf ofi, tódô ket tau gónón e seklab nô.

⁴ Yó se kmò ksuten bélê le yóm Tulus Dwata. Bè yóm ksuten bélê le yó, tódô le hulung mudél bè yóm udél là deng tehe kul tngón du, abay se yóm Tulus Dwata fen hetngón du kul.

⁵ Bè yóm kdaw yó, tey dê kem tau Ju nô bè Jirusalim, hono tau gulit klolò le yó kem hlau Dwata. Tódô kdéen benwu talak tonok gónó le gu lemwót.

⁶ Timbow gungol le yóm lemungkul yó, omin le gotu stifun etu. Tey ketnga le, abay se tódô gungol le bè yó kem tau hemtahu bè Jisas yóm udél bè yó kem benwu gónó le gu lemwót.

⁷ Ya tey kehtaw le du, mon le, “Mò le kem tau ni du, igò le kem tau lemwót bè Galili?

⁸ Moen de ke tódô le hulung mudél du yóm kum udél?

⁹ Wen se bélê me lemwót bè benwu Partiya, ne wen se lemwót bè Midya, ne wen se bè Ilam. Wen se bélê me lemwót bè Misuputamya ne Judiya ne Kapadusya ne Pontus ne Asya.

¹⁰ Wen se lemwót bè benwu Frigya ne Pamfilya ne Idyip, balù yó kem benwu glem lem Libya, moni bè syudad Sayrin. Ne wen se lemwót bè syudad Rom.

¹¹ Wen se bélê tekuy tau Ju, ne wen se là Juhen, okóm deng gbót lolò le ne kul hentahu yó kem tau Ju. Wen se bélê kuy lemwót bè yóm sotu hungul te mohin boluyen Krit, ne wen se lemwót bè benwu Arab. Là bangen du botong gbek le tmulón du bè kut udél yóm tey nmò Dwata.”

¹² Ya tey ketnga le, lel yóm tey kesbeweg kegnóm le du. Sónmò le ssólók, mon le, “Tedu de lanen nim ni?”

¹³ Okóm wen se tau bélê le, mom hennê le yó kem tau hemtahu, mon le, “Là. Kaem lengel le yó kem tau yó.”

Ktolok Pitér

¹⁴ Omin Pitér mdà lem blóng le, ne mdà le klohoken yó kem sfolò sotu dumuhen. Hgel Pitér udélen ebè yó kem tey tau sbung, monen, “Ó kem dumuhu Ju, ne yóm kdê ye nô bè ni bè Jirusalim, hol hnungol ye nim monu mò kuy ni. Tulónu kuy lanen yóm deng gungol ye ni koni.

¹⁵ Ofo kuy mon du ke lengel me. Là kô me na a lengel, abay se hanà tolo sóól mneged kdaw he.

¹⁶ Okóm nim deng gungol ye ni koni, deng duhen ni se gónóhen dohò yóm tehe mon yóm sotu tehe tugod Dwata ekni boluyen Juwél, yóm monen,

¹⁷ ‘Sok móyónen kól yóm hol són kdaw, mon Dwata, ni se angat nmou. Angat suu bè kdéen tau yóm dou Tulus. Yó kem ngà ye logi ne kem ngà ye libun, angat tugod le yóm dou udél. Ne yó kem logi lomi lemnok, angat wen gel htonu kul. Ne yó kem tuha logi, angat wen gel heknahu kul.

¹⁸ Bè yóm kdaw yó, mon Dwata, angat suu bè yó kem tau tóbóng lówóhu yóm dou Tulus, logi duhen ke libun, ne angat tugod le yóm dou udél.

¹⁹ Angat wen tey hentaw ton hegfanu bè longit dalang se te tonok. Angat wen tey litô ton le, ne ofi ne kebel, yóm kebel hol lómón ke lobun mget.

²⁰ Tódô angat gseng nóng kdaw ne yóm nóng bulón, angat khulóen litô bè yóm kdaw yó. Nan gotu sut he ni kem ni gu laanen là deng sut yóm kun kdaw yóm gónó tekuy mogot, duhen yóm kdaw angat kkukumen kdéen tau.

²¹ Duhen yó, kihu tau htóbóng bè yóm gónó tekuy mogot, angat gewà gu lem hatay.’ ”

²² Ne bud mon Pitér, “Ó kem dou dumu tau Israél, hol hnungol ye nim monu mò kuy ni. Yóm Jisas lemwót bè Nasarit, deng hógów Dwata edini lem benwu. Yó gónó Dwata hdilô du yóm khógówen du, duhen yó kem hentaw ton deng gel hmò Dwata du lem blóng tekuy. Tódô gotu tngón ye snéen kuy ni kem ni, abay se deng tehe nmoen lem blóng ye bè ni.

²³ Lemwót bè yóm tehe olu Dwata du, yó gónón hemlus du elem tdok ye. Ne lemwót ye se kuy, tódô eted ye ebè yó kem tau là temngón ke Dwata anì hnatay le. Tahu se, hnatay le, duhen yóm le ktutuk le du bè kros.

²⁴ Okóm deng hlowil Dwata, deng hewaen gu lem hatay, abay se là kô gbek hatay tô semgfét du.

²⁵ Yakà wen yóm tehe udél Dabid gbak ebè Jisas, yó monen, ‘Tódô tonu yóm gónóhu mogot eles tendo gel tukô gna dou. Eles tendo hloni béléu, yó gónón mbegel kegnómu du.

²⁶ Ne yó gónón tendo maan nawahu, ne sal gel dilô bè kudélu yóm kligalu. Anien ke mataye, wen hendónu sentuhen,

²⁷ abay se tngónu, Dwata, là kô bayaem dou lem benwu yó kem tau deng matay. Ne là kô hbolokem du lem lebeng lówóhu yakà ou du yóm sotu tóbóng lówóhem là mili nawahen ebéléem.

²⁸ Deng tolokem dou yóm lan gónóhu gmuta yóm klowil laen dù sónen, ne angat tey kehligalu bè yóm angat knóu béléem.’ ”

²⁹ Bud mon Pitér, monen, “Ó kem dumuhu setwoli, wen tulónu kuy gbak ebè yóm tehe fù tekuy Dabid, yóm tehe tau hol geta alì tótól bélê tekuy. Deng tehe matay se kun ne deng lebeng le. Balù ni hem kmoen ni, gbek tekuy hménég du yóm tehe gónó le lembeng du.

³⁰ Du se sotu tehe tugod Dwata ekni, ne tngónen yóm tehe fasad Dwata du, ne tey kehget Dwata du yóm fasaden yó, monen, ‘Angat wen semfu gu béléem mò tles mogot yó kem nogotem.’

³¹ Lemwót bè yóm deng eles ketngón Dabid du yóm angat nmò Dwata hulin kdaw, yó gónón eles tmulón du yóm klowilen gu lem hatay yóm Misaya, yóm tau deng nélék Dwata mò hkamalen yóm klamangen, yó monen, ‘Là kô bayà Dwata du lem benwu yó kem tau deng matay. Ne là kô hboloken du lem lebeng lówóhen.’

³² Ne duhen yó sem Jisas,” mon Pitér, “yóm deng bud hlowil Dwata. Yóm kdê me bè ni, mi se gemtanud du yóm deng bud klowilen.

³³ Ne ni deng tey kehegeta Dwata du, yóm Maen bè longit. Deng hyónen fi bè kwananen, ne deng blayen du yóm tehe fasaden béléen, duhen yóm kun Tulus. Ne tódô bud heflós Jisas ebélê me se kum yóm Tulus Dwata yó, duhen ni sem deng ton ye bélê me ni, ne deng gungol ye.

³⁴ Yóm tehe udél Dabid yó koni,” mon Pitér, “là kóen gbak ebè kun knô, abay se là kô hyón Dwata ke Dabid bè kwananen. Ngem yóm sotu tehe mon Dabid, yóm monen, ‘Yó udél Dwata ebè yóm gónóhu mogot, monen mò du, Myóni bè ni dii fi bè kwananu.

³⁵ Angat gotu ndau lu elaan yó kem hmohon kóm.’ ”

³⁶ Bud mon Pitér, “Kdê ye kem tau Israél, hol hendem ye dé yóm Jisas deng tnutuk ye bè kros, deng duhen du se yóm deng nélék Dwata mò gónó tekuy mogot. Du se yóm Misaya.”

³⁷ Timbow gungol yó kem tey tau sbung yóm udél Pitér yó, ya tey sidek ktafa nawa le, botong mon le mò ke Pitér ne ebè yó kem dumuhen gel hógów Jisas, mon le, “Ó kem dumu me setwoli, tedu se mò kmò me du?”

³⁸ Mon Pitér se mò kul, monen, “Yake hol kleng ye du te bótóng ne yó kem sidek deng gel nmò ye. Hbabtays ye hlan ye bè boluy Jisas Krays anì hnifót Dwata yó kem salà ye. Ke yó se nmò ye, wen blay Dwata kuy, duhen yóm Tulusen.

³⁹ Yakà deng tehe fasad Dwata du tekuy se ekni, dalang se ebè yó kem angat bud lugod tekuy, kkólen bè yó kem dumu tau bè benwu mayuk. Balù kihu tau mimón yóm ktaba Dwata du, yóm Dwata hol gónó tekuy mogot, suen béléen yóm kun Tulus.”

⁴⁰ Tey dê he dumu tulón Pitér kul, ya tey kmonen du mò kul, monen, “Hol ye eles temgama anì laen dù kuy du yóm angat ktafak Dwata kul yó kem tau là hdon le.”

⁴¹ Tey dê bélê le hemtahu bè yóm ktolok Pitér yó, ne hbabtays le. Bè yóm kdaw yó, wen dô tlu libu kwen le yóm bud temnù bè yó kem tau hemtahu bè Jisas.

⁴² Tódô nbuten bè yó, sónmò le gel htolok bè yó kem hógów Jisas. Tódô le gotu segbót bè yó kem dumu le hemtahu, ne gotu le slomong snéen bè yóm kmò le du yóm ken hemtulón nawa yóm katay Jisas. Dalang se bè yóm gel kni le bè Dwata, gotu le segmung.

Kul klowil yó kem tau hemtahu bè Jisas

⁴³ Bè yóm kdaw yó, tey dê hentaw ton nmò yó kem hógów Jisas. Tey sidek ketnga yó kem tau mton kul, lelen wen klikò le.

⁴⁴ Ne tey kessotu nawa le yó kem tau hemtahu yó. Balù yó kem kimu le, laen kô mtukul mfun du bélê le.

⁴⁵ Gel hbalù le yóm tonok le duhen ke kimu le. Lemwót yó kem blihen, sensólól le bè yó kem tau wen mu le du.

⁴⁶ Ket kdaw le gel stifun ebè Gónô Dwata yó kem tau hemtahu bè Jisas ni. Gel le slawa, ne lel le gel segbót mken. Tey tendo gel kehyu nawa le ne tilob kessadat le.

⁴⁷ Ne là kóen skó yóm tendo kdóyón le ke Dwata. Laen se kô gónó le gemsanil kul yó kem dumu tau. Lemwót bè kun nmò yóm gónó le mogot, tódô ket kdawen gel temnù yó kem tau hemtahu bè Jisas.