Kul Nmò 13 - Udél Dwata: Gna Kesfasad ne Lomi Kesfasad

Khógów le kul le Barnabas ne Sol mò na a tmolok bè yó kem dumu benwu mayuk

¹ Bè yó kem tau hemtahu bè syudad Antyok, wen se bélê le tódô gel tmugod ke Dwata, ne wen se bélê le hulung tmolok. Ni se boluy le: Barnabas, Simyun (yóm niba le Hitem), Lusyus (lemwót bè syudad Sayrin), ne Menain (yóm tehe dumuhen senok Gubérnor Hirod), ne Sol.

² Sotu kdaw bè yó, fasting le. Bè yóm igò le mni, tódô stulón bélê le yóm Tulus Dwata, monen, “Hetfing ye do Barnabas lewu le Sol. Wen hmou kul.”

³ Tahu se. Bud bud le fasting, ne mni le bè Dwata. Omin le semsnok kul le Barnabas lewu le Sol, omin le hewót kul.

Ktolok le bè Siprus, yóm sotu hungul benwu udì te mohin

⁴ Kewót Barnabas bè yó lewu le Sol, tendo nalaken lu yóm Tulus Dwata. Mógów le ebè syudad Silusya. Bè yó gónó le smakay kafal mógów ebè Siprus.

⁵ Timbow le kmó bè yó bè yóm sotu benwu boluyen Selamis, hlós le tmolok udél Dwata bè yó kem gónó le gel stifun yó kem Ju bè yó. Bè yóm kógów le ni, mung kul Jan Mark mò gel tmóbóng kul.

⁶ Kewót le bè yó bè Selamis, tódô hnalak le kól bè Pafus, nô bè doli yóm benwu udì te mohin yó. Bè yóm benwu Pafus yó, wen tau wen lamaten nô bè yó, boluyen Bar-Jisas. Ju snéen kun. Gel monen du se sotu tugod Dwata kun.

⁷ Swè le Bar-Jisas yóm gubérnor bè yó, boluyen Sérgiyus Polus. Tau hulung hedem yóm gubérnor yó. Sotu kdaw, tinoken Barnabas lewu le Sol ebéléen, abay se móyô hmungol du yóm udél Dwata.

⁸ Okóm yóm tau wen lamaten yó koni, tey kekbéen kul. Kóyóen ke là hentahu yóm gubérnor du yóm kul tulón. (Yó boluyen bè Grik nim tau ni, Élimas.)

⁹ Uma kóm yóm Sol, yó sotu gel boluy le du Pol, tey kalaken du yóm Tulus Dwata. Yó nmoen, tódô hnunu tenngelen yóm tau wen lamaten yó, ne monen mò du,

¹⁰ “Tauhi Seitan nim uu. Hohonem yó kem kdéen hyu. Són nô bè nawahem yóm ksukatem kem tau. Deng mom henkéngem yóm hol ktahuhen lemwót bè Dwata.

¹¹ Ngem, ni ne kegtekem yóm ktafak Dwata kóm. Nam na butô efet yóm kehkó Dwata du béléem.” Sen-gengen se mefet bè Élimas yóm kbutóen. Tódô migóf, mebel tau mò malak du.

¹² Timbow deng ton yóm gubérnor yóm kbutô Élimas, hentahuhen ne yóm tulón Pol. Ne tey ketngahen du yóm ktolok le gbak ebè Jisas yóm gónó le mogot.

Ktolok le bè yóm sotu Antyok snakuf Pisidya

¹³ Kewót le Pol bè yó bè Pafus, smakay le kafal mógów ebè Pérga, yóm sotu syudad sendifal mohin, gsakuf prubinsya Pamfilya. Yóm kkól le bè yó, deng mom beklil mulék ebè Jirusalim Jan Mark.

¹⁴ Bud kewót le Pol bè yó, tmonok le e subô ebè yóm sotu syudad boluyen Antyok. Nim Antyok ni, gsakuf prubinsya Pisidya. Timbow hto yóm Kdaw Kehegnô, mung le bè yóm kul gónó gel stifun yó kem Ju bè yó.

¹⁵ Wen senfala yó kem tau malak bè yó lemwót bè yóm hlau Musis ne bè yóm snulat yó kem gna tugod Dwata ekni. Tikóng deng kesfala le, wen udél hgefet le bè le Pol, mon le, “Ó kem dumu me setwoli, móyô me ke wen tulón ye mò gónó ye gemduf kum.”

¹⁶ Omin Pol mdà, dmiwel sigel ebélê le, monen, “Yu kem dumuhu tau Israél, dalang se yu kem tau là Ju le deng hemtahu bè Dwata, hol hnungol ye yóm tulónu kuy.

¹⁷ Bè yóm tehe yu ekni, deng tódô nélék Dwata yó kem tau gónó tekuy gu semfu. Bè yóm tehe knô le bè Idyip, bè yóm benwu sundu kul du, tey kehból Dwata kul. Ne bè yóm bud kehewaen kul, tey kehegfanen du bélê le yóm kfasangen.

¹⁸ Botong fat folò halayen kegenen hembala du yóm là kimón le du ditu bè yóm benwu laen dù tau menwu du.

¹⁹ Gloken gotu gemlà yó kem hitu kay but tau nô lem yóm benwu Kanan mò gónón hbenwu yó kem tehe fù tekuy.

²⁰ Yó kegenen mò du yóm ni, botong fat latu bud limu folò halayen. Bè yóm deng kbenwu le bè kul benwu bè Kanan, benlay Dwata lu tau mò kmukum bélê le efet kól bè yóm kun kdaw Samwél, yóm sotu tau gna tugod Dwata ekni.

²¹ Bè yóm kdaw yó, yó hni le bè Dwata ke wen tau mò hol geta bélê le mò gónó le galak. Duhen Sol ngà Kis se yóm tendok Dwata mò hol geta bélê le, yóm tau semfu gu bè Bindyamin. Yó kegen Sol geta bélê le, botong fat folò halayen.

²² Timbow kó Dwata Sol, tlesen du Dabid mò tau hol geta bélê le. Wen tulón Dwata gbak ebè Dabid, yó monen, ‘Nim Dabid ngà Jisi ni, tey hyu nawahu ebéléen. Angat gotu nmoen yóm kdê hmou du.’

²³ Ne bè Dabid se gónóhen gu semfu Jisas, yóm tau tehe fasad Dwata yó kem tau Israél mò gónó tekuy gewà gu lem salà.

²⁴ Gu laan Jisas là deng mbut tmolok,” mon Pol, “Jan yóm gna tmolok lem blóng kem tau Israél. Yó gel tulónen, monen, ‘Knogol ye yó kem sidek gel nmò ye, ne hbabtays ye.’

²⁵ Bè yóm deng móyón kegesón yóm kun ktolok Jan, yó udélen ebè yó kem tau, monen, ‘Ofo kuy mon du kô ke ou yóm gel nangat ye? Là gi. Huli dou yóm tau nangat ye yó. Là kóe knóón ke tóe hesek béléen.’

²⁶ Ó kem dumuhu tau Israél,” mon Pol, “kem tau mfù bè Abraham, dalang se yu kem tau là Juhen deng hemtahu bè Dwata, ebélê tekuy se gónó Dwata e hemwit du yóm tulón mò gónó tekuy gewà gu lem hatay.

²⁷ Yó kem tau menwu bè Jirusalim kkólen bè yó kem tau gel malak kul, là kô dilô le du ke Jisas yóm deng nélék Dwata mò lemwà tekuy gu lem hatay. Ne là kô glileb le du snéen yóm tehe udél yó kem tehe gna tugod Dwata ekni, yóm gel senfala le bè ket Kdaw Kehegnô. Okóm bè yóm khatay le ke Jisas, yó se deng gónón dohò yóm udél gel senfala le yó.

²⁸ Balù yóm klaen dù salà ton le bè Jisas mò gónó le hmatay du, ewenem, sana kni le du bè Paylét anì hfatayen.

²⁹ Ne tahu se,” mon Pol, “hfatay le. Tikóng deng gotu nmò le yóm gónón dohò yóm kdê tehe eles hsulat Dwata gbak ebéléen, omin le ma lówóhen bè kros, tódô sù le lem yóm kilib gónó le lembeng du.

³⁰ Okóm bè getluhen kdaw bud hlowil Dwata.

³¹ Kogol yóm deng bud klowilen, dê duléken na bud hegfan bè yó kem tau tehe mung du gu bè Galili etu bè Jirusalim. Ni kmoen ni, lu se gemtanud du bè kdéen tau Israél yóm deng klowilen.

^32-33 Duhen ni se,” mon Pol, “yóm Tulón Hyu tendo kum gel nwit ni. Bè yóm deng klowil Dwata ke Jisas, yó se gónón dohò yóm tehe fasaden yó kem tehe fù tekuy ekni. Duhen ni se tekuy kem tau lugod le fen gmafit du. Du se gónón e gbak yóm tehe hsulat Dwata bè bok Lingón, yóm monen, ‘Uu yóm hol Ngau. Deng duhen ni ne kehegfanu du yóm kngau kóm.’

³⁴ Deng eles tulón Dwata snéen yóm angat kehlowilen ke Jisas, ne yóm là kehboloken du lówóhen lem lebengen. Yó udél Dwata, monen, ‘Angat hdohou etahem yóm tehe fasadu ke Dabid ekni.’

³⁵ Wen sotu tehe utóm lingón Dabid ebè Dwata ekni, monen, ‘Là kô nam e bayà hbolok du lem lebengen yóm tau tóbóng lówóhem gotu nawahen kóm.’

³⁶ Yóm utóm lingón Dabid yó, là kóen gbak ebè kun knô. Abay se bè yóm deng gotu kdeng Dabid yóm hmò Dwata du, matay se kun, ne lebeng le klohok yó kem tehe fuen, ne deng kem bolok ne lówóhen.

³⁷ Okóm yóm tehe kehlowil Dwata ke Jisas, là kóen bolok lówóhen.

^38-39 Yó gónóm mon, kem dumuhu tau Israél,” mon Pol, “hol kóyóu ke tngón ye bè Jisas se gónó Dwata hlan du yóm kehlifóten salà kem tau. Bong bè yó dum klolò tekuy yóm hlau Musis, laen dù gónón mkó du salà te. Okóm ke nô kihu tau hemtahu bè Jisas, yó se gónón gewà gu lem salà.

⁴⁰ Yó gónóm mon du, hol ye eles temgama anì là getdoken ebélê ye yó kem tehe udél yó kem gna tugod Dwata ekni, yóm mon le,

⁴¹ ‘Tenngel ye dé, yu kem tau là hemtahuhen. Igò ye se tnga du yóm gel ton ye, deng ye mom megtuled du. Baluen he ke wen tau hol tmulón du kuy yóm nmou ni, ewenem là kô ne ye e hentahu du.’ ”

⁴² Bè yóm bud kewót le Pol ne Barnabas bè yóm gónó le gel stifun yó, eles bud tinok le lu yó kem tau hmungol kul yó koni anì bud le tmolok bélê le ke bud hto yóm Kdaw Kehegnô.

⁴³ Timbow le deng gotu skas bè yó, tey dê tau mung kul le Pol. Wen se tau Ju ne wen se là Juhen, okóm hemtahu le bè Dwata. Tey kegduf Pol ne Barnabas kul anì là hentula le du yóm któbóng Dwata kul.

⁴⁴ Bè yóm bud kestifun le bè yóm Kdaw Kehegnô yó kem tau yó koni, tódô tô kdê yó kem tau bè yóm syudad yó gotu mung na le e bud hnungol yóm Udél Dwata.

⁴⁵ Timbow ton yó kem Ju yóm tey tau wen, deng mom mélés nawa le le Pol. Deng mom hennê le yóm tulón nwit Pol, lel le semdekà du.

⁴⁶ Okóm kul le Pol ne Barnabas, là kô wen klikò le malà kul, mon le, “Igoen hyu ke yu gna tnulón me yóm tulón nwit me, okóm mom kenbê ye. Ilóem ofo kuy mon du ke laen dù mu ye du yóm udél gónó ye gmuta klowil laen dù sónen. Tódô tnagak me yu, mógów me ebè yó ne kem tau là Ju le.

⁴⁷ Yakà ni du se yóm deng hmò Dwata kum, tehe monen mò kum, ‘Yóm khógówu kuy ni, hol lómón ke yu yóm layag lem blóng yó kem tau là Ju le, anì gefet bè klamangen benwu yóm lan tau gewà gu lem hatay.’ ”

⁴⁸ Timbow gungol yó kem tau là Ju le yóm tulón le Pol yó, ya tey kehligal le, ne tey kdóyón le ke Dwata bè yóm udélen. Ne kdê yó kem tau tehe olu Dwata eta le yóm klowil laen dù sónen, gotu le hemtahu.

⁴⁹ Tódô lengeben klamang yóm benwu yó gónón e mból yóm udél Dwata.

⁵⁰ Okóm tey keklit le kul le Pol yó kem Ju. Gotu nofong le yó kem tau wen glal le bè yóm syudad yó, dalang se yó kem libun boi là Juhen deng hemtahu bè Dwata anì kenbê le Pol ne Barnabas, ne hdó le lu bè yó.

⁵¹ Yó gónó le Pol ne Barnabas olo tmótók kfung laan ti le mò ilô yóm klaen dù bud kul du ne ke tnafak Dwata lu yó kem tau kembê kul. Ne hlós le ebè syudad Ikunyum.

⁵² Okóm tey kehligal le yó kem tau lomi hemtahu bè Jisas bè Antyok. Sónmò le halak bè yóm Tulus Dwata.