Kmukum 9 - Udél Dwata: Gna Kesfasad ne Lomi Kesfasad

Abimélék

¹ Sotu kdaw lemwót Abimélék yóm ngà Gidyun logi, mógów ebè Sékém yóm benwu gónóhen nô yéen ne yó kem mà dien.

² Yó monen mò kul ne bè yó kem dumu fes lówó yéen, “Snólók ye do kun yó kem tau bè ni bè Sékém ke mahil du nóyô le mò mogot kul, yóm hitu folò kem ngà Gidyun logi kô duhen ke olon sotu tau? Hentulón ye nawa ou se hol kuy dumu ne kuy litô.”

³ Tahu se, stulón le bè yó kem dumu tau bè Sékém yó kem mà dì Abimélék. Ne yó atul yó kem tau bè Sékém, Abimélék yóm nóyô le mò mogot kul abay se hol kul litô.

⁴ Wen hitu folò botù blówón bukay blay le ke Abimélék lemwót bè gónô yóm kul dwata lennged boluyen Baal-birit. Yó muhen du mò sukéy yó kem lumbuk tau gel mò sidek mò mung du.

⁵ Kewót Abimélék bè yó, niten yó kem tau yó ebè gónô maen bè Ufra ne bè yó ta yóm sotu botu bong gónó le hmatay yóm hitu folò kem dumun setwoli, hono kem ngà Gidyun logi. Okóm wen sotu ngà Gidyun són twoli boluyen Jutam fen hebnos ne là ghatay Abimélék du.

⁶ Omin le gotu stifun yóm kdê tau bè Sékém ne bè Bit-milu, mógów le ebè yóm koyu boluyen ok bè yó bè Sékém, nô klohok yóm hehek hetfing le bè yóm sotu dwata lennged le ne bè yó gónó le hembaling ke Abimélék mò tau hol geta bélê le.

⁷ Timbow gungol Jutam nim nmò le ni, yó gónón mneged eta Bulul Girisim hgelen udélen, monen, “Ó kem tau bè Sékém, hol hnungol ye ou anì hnungol Dwata yu se kuy.

⁸ Bè yóm tehe yu kun ekni, yó atul yó kem koyu, tô le mélék sotu koyu mò geta bélê le. Yó udél le ebè yóm koyu ulib, mon le, ‘Uu ne mò geta bélê me.’

⁹ Okóm là móyóen yóm koyu ulib yó. Mom yó balaen kul, monen, ‘Kóyô ye kô ke là bud wen hnolohu ne fene hegdiwel gu ta yó kem dumu koyu mung bè lenos? Ke nmungu yó, gónó ye tô ma hnolo du mò gónó ye hegfan yóm kadat ye ke Dwata ne tau? Bée dou.’

¹⁰ Ne senged snéen udél le ebè yóm koyu fig, mon le, ‘Uu ne mò geta bélê me.’

¹¹ Okóm ke koyu fig là kóen móyô, monen, ‘Kóyô ye kô ke tenfloku kbunguhu igoen tey mnóm ne fene hegdiwel gu ta yó kem dumu koyu mung bè lenos? Bée dou.’

¹² Ne yó bud udél le ebè grép, mon le, ‘Uu ne mò geta bélê me.’

¹³ Okóm yó balà grép kul, monen, ‘Kóyô ye kô ke là bude mungu ne fene hegdiwel gu ta yó kem dumu koyu mung bè lenos? Ke nmungu yó, gónó ye tô ma tifas grép mò ninum ye du mò gónó ye hefligal ke Dwata ne tau? Bée dou.’

¹⁴ Bè sónen beklil le ebè yóm ngà koyu lefungu semnual, mon le, ‘Uu ne mò geta bélê me.’

¹⁵ Yó balaen kul yóm ngà koyu semnual yó, monen, ‘Yó ne. Ke hol ye móyô ke ou geta bélê ye mógów ye edini, tilów ye hgolung laanu. Ke là móyô ye, angat wen ofi lemwót béléu mò mlób yó kem koyu sidar alì lembang bè Libanun.’ ”

¹⁶ “Duhen ni,” mon Jutam, “deng hol lemwót bè ktikaw nawa ye kô yóm kélék ye ke Abimélék mò tau hol geta bélê ye? Bè yóm kehegeta ye ke Abimélék, ni kô gónó ye hegfan du yóm tehe kadat ye ke tehe mà ne yó kem fes lówóhen lemwót bè yóm tey hyu tehe nmoen bélê ye?

¹⁷ Hendem ye dé yóm tehe kesgida mà bè yó kem tau Midyan. Là kô nalihen du klowilen, botong lanen mofin kuy anì gewà ye lem hólól yó kem tau Midyan.

¹⁸ Okóm kemdaw ni, deng mom hohon ye yó kem fes lówó mà. Gotu hnatay ye yóm hitu folò kem ngaen logi ta yóm sotu botu. Yó gónó ye mò du yóm yó lemwót bè yóm kélék ye ke Abimélék, yóm ngà mà bè yóm libun nmuhen lemwót bè Sékém. Yó gónó ye mélék du abay se kuy dumu.

¹⁹ Duhen ni, ke ni se gónó ye hegfan du yóm nawa ye ebè Gidyun ne bè yó kem fes lówóhen, hol ye hligal sen mung ke Abimélék ne hyu ke hligal bélê ye se kun.

²⁰ Okóm ke là tikawen bè nawa ye yóm kélék ye du, wen ofi gu bè Abimélék gotu nlóben yó kem tau bè Sékém ne bè Bit-milu. Ne bud wen se ofi gu bè yó kem tau bè Sékém ne bè Bit-milu na le e nlób Abimélék se kun.”

²¹ Duhen yó, lemwót bè yóm klikò Jutam ke Abimélék yóm dumun setwoli, yó nmoen tódô mlóy etu bè yóm benwu boluyen Bir.

²² Yó kegen Abimélék mogot bè Israél, tek tlu halay.

²³ Yó nmò Dwata, senbewegen kehedem Abimélék ne yó kem tau bè Sékém, ne yó nmò yó kem tau bè Sékém senfatay le Abimélék.

²⁴ Yó gónón lómón ni kmò Dwata kul anì gbelesen yóm nmò Abimélék ne yó kem tau bè Sékém bè yóm kbonok le yóm hitu folò kem ngà Gidyun. Là gomongen bè nili yóm bérs 25 efet kól bè bérs 57. Yó tulónen yóm kmò ktafak Dwata ke Abimélék ne yó kem tau bè Sékém anì sfatay le honon lu ne efet ghatay le Abimélék ne tey dê matay bè yó kem tau bè Sékém. Ni se yóm kmò kbeles Dwata kul yóm hitu folò kem ngà Gidyun deng hnatay le. Ni se hnigaden yóm udél Jutam eta le. Là gomongen bè nili yóm tsaptér 10 efet kól bè tsaptér 12. Yó tulónen yó kem dumu tau nélék Dwata mò malak yó kem tau Israél. Wen sotu tau néléken boluyen Jifta mò mit sgida bè yó kem tau Amurayt, yóm hohon yó kem tau Israél ne gemmò bélê le. Bud du snéen mit sfatay bè yó kem sfu Ifraim, yó kem kun dumu Israél lemwót bè yóm tey dê udél le etahen là tahuhen ne yó gónó Dwata hegmò du bélê le.