Kmukum 8 - Udél Dwata: Gna Kesfasad ne Lomi Kesfasad

Là kegmò yó kem tau Midyan

¹ Bè yóm kdaw yó, yó udél le ebè Gidyun yó kem sfu Ifraim, mon le, “Moen du ke là hmungem kum bè yóm kesgida ye yó kem tau Midyan? Moen du ke lómón ni nmoem bélê me?” Ya tey sidek ksel le ke Gidyun yó kem sfu Ifraim yó.

² Okóm yó balà Gidyun kul, monen, “Yóm dou gendeng ni, tek udì néen ke heskél te bè yóm deng kuy gendeng. Balù yóm là deng kegen ye mung sgida yu kem semfu gu bè Ifraim, bong he kuy gendeng senta yóm kum gendeng mi kem lemwót bè tbong Abisér.

³ Ngem yó dé, deng blay Dwata elem hólól ye yóm lewu kem tau hol geta bè yó kem tau Midyan, Urib lewu le Sib. Là kô deng gmou du he dou yóm nmò ye yó.” Bè yóm kmon Gidyun du yóm yó, botong monol kebut le du yó kem sfu Ifraim.

⁴ Kewót le Gidyun bè yó, mung du yóm tlu latu kem sendaluen mifal le Él Jurdan. Tey sidek kliteg le okóm tódô henlel le kemtes yó kem hohon le.

⁵ Tikóng le kól bè Sukut, yó udél Gidyun ebè yó kem tau malak bè yó, monen, “Ke yó dum hyu bélê ye, henken ye lu dou yó kem sendaluu, deng tey sidek kliteg le. Nim nmò me ni, ktes me le Siba ne Salmuna, yóm lewu kem tau hol geta bè yó kem tau Midyan.”

⁶ Okóm deng mom yó balà le du yó kem tau malak bè Sukut, mon le, “Tedum tô na me hemken kul du yó kem sendaluem? Yakem deng gekfô ye se lu le Siba ne Salmuna.”

⁷ Ne yó udél Gidyun ebélê le, monen, “Yó ne. Ke deng blay yóm sana kut Dwata hol gónó mogot elem hólólu yó kem tau hol geta ketesu ni le Siba ne Salmuna, angate bud semfulék edini, naw gotu hendlà nfes yu. Fesu kuy yó kem tey semnual lemwót bè yóm benwu laen hol wen tauhen.”

⁸ Kewót le Gidyun bè yó, tódô le hlós ebè yóm benwu boluyen Pinwél ne senged snéen tô le bud mni ken bè yó kem tau bè yó. Bud senged se balà le kul yó kem tau bè Pinwél lómón yóm kul balà kul yó kem tau bè Sukut.

⁹ Ne yó udél Gidyun ebélê le, monen, “Ke deng gekfóu yóm lewu kem tau hol geta ktesu ni, bud senfuléku yu naw e genbà nim gónô tahà ye nii, yóm gónó ye gel heklung.”

¹⁰ Blaem lemwót yóm lewu kem tau hol geta bè Midyan, le Siba lewu le Salmuna, deng le nô ditu bè yóm sotu benwu boluyen Karkur, mung kul yó kem sendalù le. Yó kem sendalù dù tebel lemwót bè yóm benwu laen hol wen tauhen fi dmata kdaw Él Jurdan ne tek le sfolò limu libu duen. Deng le gotu matay yóm lematu lewu folò libu kem dumu le.

¹¹ Yó nmò Gidyun, tódô loloen yóm lan hmilol yóm benwu laen hol wen tauhen fi dmata kdaw yó kem benwu boluyen Nuba ne Jugbiha nan e kentut nundug yó kem sendalù hohon le.

¹² Lemwót yóm lewu kem tau hol geta bè Midyan le Siba lewu le Salmuna gotu le mlóy, okóm ktes Gidyun lu ne gekfóen lu. Bè yóm kekfóen kul, gotu le sekla yó kem sendalù mung yóm lewu kem tau hol geta yó lemwót bè yóm tey klangaf le.

¹³ Bè yóm kulék Gidyun gu bè gida lanen mneged bè Hiris.

¹⁴ Ne wen ngà logi lemwót bè Sukut kenfóen bè yó ne hsulaten du yóm hitu folò hitu kem tau malak bè Sukut.

¹⁵ Kewót Gidyun bè yó, hlós ebè Sukut ne yó udélen ebè yó kem tau malak bè yó, monen, “Là deng klifót ye du kô yóm tehe là kóyô ye tmóbóng dou? Là kô dog henken ye kul yó kem sendaluu alì miteg abay se là deng gekfóu kul le Siba lewu le Salmuna? Hnénég ye dé, ni lu.”

¹⁶ Omin Gidyun hwa yó kem tey semnual bè yóm benwu laen hol wen tauhen ne hendlà fesen yó kem tau malak bè yó bè Sukut.

¹⁷ Ne gotu genbaen yóm gónô geta gónó le gel heklung bè yó bè Pinwél ne gotu hnatayen snéen yó kem logi bè yóm benwu yó.

¹⁸ Omin Gidyun smólók kul yóm lewu kem tau hol geta yó le Siba ne Salmuna, monen, “Yó kem tau tehe hnatay ye bè Tabur, kmò kton ye kul du?” Bnalà le se, mon le, “Skél le kóm, lómón tô le halas ngà tau hol geta yóm kdê le.”

¹⁹ Mon Gidyun se, “Hono kem dou dumu setwoli, hol me sulil lem. Ke yó dum là tehe hnatay ye kul, smafae bélê ye hlanu bè boluy yóm sana kum Dwata hol gónó mogot, là kô hnatayu kuy se kuy.”

²⁰ Omin Gidyun mudél ebè Jitér, yóm ngaen twogu, monen, “Yó, hnatayem lu.” Okóm yóm ngà logi yó, là kô dog nsoken du sudengen, likò abay se hanà ngà.

²¹ Yó udél Siba ne Salmuna ebè Gidyun, mon le, “Uu ne hmatay kum. Là hyuhen ke hmoem ngà yóm kun nmò yóm tau bong.” Tahu se, hnatay Gidyun lu ne gotu nwahen yó kem klóón mebtes lieg kamél le.

²² Kogolen bè yó, yó mon le mò ke Gidyun yó kem tau Israél, “Deng lenwaem mi bè yó kem tau Midyan, yake uu ne mò mogot kum ne yó mò tlesem hulin kdaw yó kem semfu gu béléem.”

²³ Bnalà Gidyun se, monen, “Là ou du yóm mogot kuy ne là se ngau du, kaem Dwata yóm sana kut Dwata hol gónó mogot.”

²⁴ Okóm yó bud monen mò kul, “Ni wen hnihu bélê ye yóm ket kuy na sotu. Benlay ye o ket kuy na sotu yóm tdé deng negef ye bè yó kem tau Midyan.” (Abay se yó kem tau Midyan sket le temdé tahu blówón, skél le bè yó kem dumu tau menwu bè yóm benwu laen hol wen tauhen.)

²⁵ Yó balà le du yó kem tau, mon le, “Tey hyu nawa me bemlay du kóm.” Hyu wen nes nból le ne sotu kun hemsù tahen sotu tdé tahu blówón deng negef le.

²⁶ Yóm keblat yóm tdé tahu blówón deng blay le ke Gidyun, mukas sfolò wolu kilu. Là gomongen lemen yó kem dumu ngom mebtes yó kem tau hol geta bè Midyan ne yó kem nes megem ginggung gel lesek le ne yó kem klóón mebtes lieg yó kem kamél le.

²⁷ Okóm deng mom yó mu Gidyun du yó kem tdé blówón yó, deng mom nmoen dwata lennged ne suen bè yóm kun benwu bè Ufra. Là legenen bè yó, tódô kdê yó kem tau Israél deng mom knogol le Dwata, gotu le tmaba ebè yóm dwata lennged yó. Ne bè yó se gónón gholot Gidyun ne yó kem fes lówóhen.

²⁸ Duhen yó, deng le gemmò bè yó kem tau Midyan yó kem tau Israél, ne laen kô dù bud gmò le bélê le yó kem tau Midyan yó. Yó kegenen menek kbenwu le yó kem tau Israél, botong fat folò halayen efet katay Gidyun.

Katay Gidyun

²⁹ Bè yóm kulék Gidyun, tódô hlós ebè gónóen.

³⁰ Yó kdê ngaen logi, botong hitu folò abay se tey dê yehenen.

³¹ Wen se libun nmuhen nô bè Sékém ne wen ngaen logi béléen boluyen Abimélék.

³² Song matay Gidyun yóm ngà Juas, deng tey tuha ne, ne lebeng le bè yóm kilib tehe gónó le lembeng ke maen Juas bè benwu le bè Ufra, yóm kul benwu yó kem tbong Abisér.

³³ Bè yóm katay Gidyun, là kô le bud hteneb lemolò ke Dwata yó kem tau Israél. Deng le mom tmaba ebè yó kem dwata lennged boluyen Baal. Wen sotu bélê le boluyen Baal-birit mò kul dwata.

³⁴ Ne là bud lolò le du yóm sana kul Dwata hol gónó mogot, yóm deng lemwà kul lem hólól yó kem hohon le hmilol kul.

³⁵ Balù yóm tey kehyu yóm deng nmò Gidyun lem blóng yó kem tau Israél, ewenem là kô dog nadat le yó kem fes lówóhen.