Kmukum 7 - Udél Dwata: Gna Kesfasad ne Lomi Kesfasad

Kegmò Gidyun bè yó kem tau Midyan

¹ Hol hlafus bè yó, tódô temkifu btik Gidyun ne kdê yó kem tauhen na le e kmamfù klohok Sfut Harod. Lemwót kul yó kem tau Midyan fen le kmamfù fi debwak le bè yóm gónón wen datalen bè Bulul Udì Muri.

² Yó mon Dwata mò ke Gidyun, yóm sana kul Dwata hol gónó mogot, “Tey alì gedlug kwen le yó kem tauhem mò mit sgida bè yó kem tau Midyan. Ke hlusu lu sgida yóm kdê le ne ke deng hegmou lu déke mom le heklabak, ofo kul ke lemwót bè kul kgis yóm kegmò le.

³ Heglalagem bè yó kem tauhem ke wen bélê le likò tódô mulék ebè gónóen.” Tahu se, botong lewu folò lewu libuhen tau mulék ne fen sfolò libu tebel.

⁴ Omin Dwata bud mon du mò ke Gidyun, “Tolo le tey wen he ni kem tauhem. Nwitem lu ebè él, hinumem lu. Bè yó gónóhu semtólóng kul. Tngónem bè yó yóm tau hmungu kóm ne yóm tau là hmungu du.”

⁵ Tahu se, gotu nwit Gidyun lu ebè él yó kem tauhen. Ne yó mon Dwata mò du, “Ni kmò kestólóngem kul yó kem tauhem. Tólóng kesbungem yó kem tau minum lem hólól lómón kinum ohu ne tólóng kesbung se yó kem minum dmeef mtud bukol.”

⁶ Tahu se, yó kwen yó kem tau minum lem hólól, tek tlu latu kwen le. Ne lemwót yó kem dumu gotu le minum dmeef mtud bukol.

⁷ Yó mon Dwata mò ke Gidyun, “Lemwót bè nim tlu latu kem tau ni gónóhu lemwà kuy bè yó kem tau Midyan ne blayu lu elem hólól ye. Bong yó kem dumu gotu hulékem lu.”

⁸ Tahu se, gotu hulék Gidyun lu yó kem dumu tau Israél, bede eles nwahen yó kem bnotu le ne kem féw le ne tek tlu latu tau yóm dù tebel béléen. Yóm kul gónó kmamfù yó kem tau Midyan nô sendlem le bè yóm gónón datal.

⁹ Bè yóm kifu yó, dók Dwata Gidyun, monen, “Btiki, nundugem yóm kamfù yó kem tau Midyan. Angat blayu lu elem hólólem.

¹⁰ Okóm ke likoi mundug kul mosoli etu bè kamfù le, nwitem Pura yóm tau tóbóng lówóhem.

¹¹ Ke kóli bè yó, hol hnungolem yóm sentulón le ne bè yó gónón mfól nawahem mundug kul.” Tahu se, lemwót Gidyun lewu le Pura mosol le edlem bè kilil yóm gónó le kmamfù yó kem hohon le.

¹² Gotu le lememek kmamfù bè yó bè datal yó kem tau Midyan ne yó kem tau Amélék ne yó kem tau lemwót bè yóm benwu laen hol wen tauhen fi dmata kdaw Él Jurdan. Lómón kwen le lómón tlangas lememek te tonok. Yóm kwen yó kem kamél le lómón kwen le helek bè kilil mohin, là gbekem msó kul.

¹³ Tikóng le gefet bè yó le Gidyun bè kamfù yó kem hohon le, gungol Gidyun yóm sotu tau tmulón kna bè yóm ween. Yó monen, “Wen knahu. Knahu sbotù mambang barli mluy gu tta ebè ni bè kamfù tekuy ne gesloben yóm sotu kamfù tekuy. Lemwót nim kamfù gesloben ni, gotu gbà lemnal bè tonok.”

¹⁴ Yó balaen du yóm ween yó, monen, “Laen dù dumu lanen yóm knahem yó, kaem sudeng Gidyun yóm tau Israél ngà Juas logi. Deng hatù Dwata bè yó kem tau Midyan ne bè kdê yó kem sendalù tekuy.”

¹⁵ Tikóng gungol Gidyun kna yóm tau yó koni ne yóm lanen, ya tey kdóyónen ke Dwata. Ominen tódô kendel semfulék mneged ebè kamfù yó kem tau Israél ne hgelen udélen tmaba kul, monen, “Btik ye ne, deng blay Dwata elem hólól tekuy yó kem sendalù Midyan.”

¹⁶ Yó nmò Gidyun, nólólen bè tlu bung yó kem tlu latu sendaluen ne sket benlayen lu féw ne kuleng tonok wen solok nô lemen.

¹⁷ Yó hlauhen kul, monen, “Ke denge kól bè kilil yóm kamfù le hol tenngel ye o, tódô lolò ye yóm nmou.

¹⁸ Ke mféw yó kem dou lumbuk, gotu ye mféw se kuy bè yóm gónó ye nô hmilol yóm kamfù le ne gotu ye mensag, mon ye, ‘Ke Dwata lewu le Gidyun.’ ”

¹⁹ Tahu se, deng sóól buteng yóm kkól le bè kilil kamfù yó kem tau Midyan le Gidyun ne yóm lematu kem tau mung du, blaem hanà yó he yóm udas le setles mentey yó kem sendalù Midyan. Tódô kento le Gidyun mféw ne mung kebtù le yóm kuleng tonok anì gfan yóm solok nô lemen.

²⁰ Senged se kul yóm lewu kem dumu lumbuk, kendel nmò le se kul yóm kul nmò le Gidyun. Lemwót yóm solok, ogot le sigel iwóng le ne fen ogot le sigel kwanan le yóm féw, mung du hensag le, mon le, “Yóm sudeng ni, ke Dwata lewu le Gidyun.”

²¹ Tódô le henek mdà hilol kamfù yó kem hohon le yó kem tau Israél. Ya tey sidek kehlangaf Dwata kul yó kem hohon le, gotu le seklab mlóy ya tey langat le.

²² Bè yóm igò le mféw hilol yóm tlu latu kem tau Gidyun, yó nmò Dwata bè yó kem hohon le, gotu le stibó honon lu. Yó kem sendalù là matayen, wen se bélê le mlóy etu bè yóm benwu boluyen Bét Sita, yóm benwu moni bè Saritan ne wen se mlóy etu bè Abél Mihula, yóm benwu moni bè Tabat.

²³ Omin Gidyun htaba yó kem ból Naftali ne ból Asér ne yóm lewu bung bè kun ból Manasi, hektesen kul yó kem tau Midyan.

²⁴ Bud wen kem tau hógów Gidyun ebè yó kem bulul lemnek gónó le menwu yó kem tau semfu gu bè Ifraim, yó udél hwiten kul, monen, “Hol ye mosol edini na ye e gnida lu yó kem tau Midyan. Hnékét ye lu bè Él Jurdan ne bè yó kem dumu él mlel etu bè benwu Bitbara anì là gifal le du yó kem tau Midyan.” Tahu se, gotu le stifun yó kem sfu Ifraim, hnékét le yó kem tau Midyan bè Él Jurdan ne bè yó kem langanen mlel etu bè benwu Bitbara.

²⁵ Kenfô le yóm lewu kem tau hol geta bè yó kem tau Midyan. Yó boluy le Urib ne Sib. Lemwót ke Urib kun, hnatay le bè yóm sotu botu hlós boluy le du Botu Urib. Lemwót ke Sib kun, fen hnatay le bè yóm gónó le gel kemmes él grép ne hlós boluy le du Sib. Tódô henlós le kemtes yó kem tau Midyan. Kogolen bè yó nwit le ebè Gidyun kulu le Urib ne Sib ditu bè kilil Él Jurdan.